Vharoma 14:1-23

14  Ṱanganedzani muthu a shayaho nungo lutendoni, fhedzi ni songo mu haṱula nga mavhonele aṋu.  Muṅwe muthu u na lutendo lwa u ḽa tshiṅwe na tshiṅwe, fhedzi muthu a shayaho nungo u ḽa miroho.  Ane a ḽa a songo nyadza a sa ḽi, na ane a si ḽe a songo haṱula a ḽaho, ngauri Mudzimu o mu ṱanganedza.  Iwe u nnyi ane wa haṱula mulanda wa muṅwe? Arali a tshi ima kana a tshi wa u itela muṋe wawe. Vhukuma, u ḓo takuswa, ngauri Yehova u ḓo mu imisa.  Muṅwe muthu u dzhia ḽiṅwe ḓuvha ḽi ḽa ndeme u fhira ḽiṅwe; muṅwe muthu u dzhia maḓuvha oṱhe a tshi fana; muṅwe na muṅwe kha tende kha zwe a dzula o phetha zwone.  Ane a dzhia ḓuvha ḽi ḽo khetheaho, u ḽi dzhia ḽo khethea kha Yehova. Hafhu, ane a ḽa, u ḽa uri a hulise Yehova, ngauri u livhuha Mudzimu; ane a litsha u ḽa, u litshela u hulisa Yehova, na ene a ḓi livhuha Mudzimu.  A hu na na muthihi washu ane a ḓitshilela ene muṋe, nahone a hu na ane a fa a tshi itela ene muṋe;  ngauri musi ri tshi tshila, ri tshilela Yehova, na musi ri tshi fa, ri fela Yehova. Nga zwenezwo, musi ri tshi tshila na musi ri tshi fa, ri vha Yehova.  Kristo o fa nahone a dovha a tshila uri a vhe Murena wa vho faho na vha tshilaho. 10  Fhedzi ndi ngani u tshi haṱula wahau? Kana ndi ngani u tshi nyadza wahau? Ngauri roṱhe ri ḓo ima phanḓa ha tshidulo tsha khaṱulo tsha Mudzimu. 11  Ngauri ho ṅwalwa ha pfi: “Yehova u ri, ‘Ndi ana nga vhutshilo hanga, ndi ri, muthu muṅwe na muṅwe u ḓo ngwadamela, nahone vhathu vhoṱhe vha ḓo tenda uri ndi nṋe Mudzimu.’” 12  Ngauralo, muṅwe na muṅwe washu u ḓo ḓifhindulela ha Mudzimu. 13  Nga zwenezwo, ri songo tsha haṱulana, nṱhani hazwo itani phetho uri ni si vhee tshikhukhulisi phanḓa ha wahaṋu. 14  Ndi a zwi ḓivha nahone ndi a tenda kha Murena Yesu uri a hu na tshithu tshine tsha vha na tshika nga tshone tshiṋe; tshi na tshika kha muthu ane a humbula uri tshi na tshika. 15  Arali u tshi ṱungufhadza wahau nga zwiḽiwa, a u tsha tshimbila u tendelana na lufuno. U songo tshinya we Kristo a mu fela nga zwine wa ḽa. 16  Ni songo tendela zwivhuya zwine na zwi ita zwi tshi soliwa. 17  Ngauri a ri dzheni muvhusoni wa Mudzimu nga u ḽa na u nwa, fhedzi nga u luga na mulalo na dakalo ḽi ḓiswaho nga muya mukhethwa. 18  Ngauri ane a vha phuli ya Kristo nga yeneyo nḓila u a ṱanganedzwa nga Mudzimu nahone vhathu vha a mu takalela. 19  Kha ri tovhole zwithu zwine zwa ḓisa mulalo na zwithu zwine zwa fhaṱa. 20  Litshani u thutha mushumo wa Mudzimu nga nṱhani ha zwiḽiwa. Ndi ngoho uri zwithu zwoṱhe zwo kuna, fhedzi zwo khakhea arali muthu a tshi ḽa ngeno a tshi khukhulisa muṅwe. 21  Ndi zwavhuḓi u sa ḽa ṋama, u sa nwa waini, kana u ita tshiṅwe na tshiṅwe tshine tsha nga khukhulisa wahau. 22  Lutendo lune na vha nalwo kha lu vhe vhukati haṋu na Mudzimu. Hu takala muthu ane a si ite uri a haṱulwe nga zwine a takalela u zwi ita. 23  Fhedzi arali a tshi timatima, o no ḓi vha na mulandu arali a tshi ḽa, ngauri u ḽa hawe a ho ngo thewa kha lutendo. Vhukuma, zwoṱhe zwi songo thewaho kha lutendo ndi tshivhi.

Ṱhaluso dzi re magumoni a siaṱari