Vharoma 10:1-21

10  Zwine nda zwi tama na zwine nda humbelela vhahashu ha Mudzimu ndi zwauri vha tshidzwe.  Ndi a vha ṱanzielela zwauri vha a fhisetshela Mudzimu; fhedzi hu si u ya nga nḓivho yo teaho;  ngauri a vha ḓivhi u luga ha Mudzimu, fhedzi vha ṱoḓa nḓila u ya nga zwine vha zwi funa, a vha tevhedzi u luga ha Mudzimu.  Ngauri Mulayo wo guma nga Kristo, uri muṅwe na muṅwe ane a vha na lutendo a pfi o lugaho.  Ngauri Mushe o ṅwala uri muthu we a tevhedza u luga ha Mulayo u ḓo tshila ngawo.  U luga hu bveledzwaho nga lutendo ho amba nga heyi nḓila: “U songo amba mbiluni yau wa ri, ‘Ndi nnyi ane a ḓo gonya a ya ṱaḓulu?’ zwine zwa amba u tsitsa Kristo;  kana, ‘Ndi nnyi ane a ḓo tsela mugodini?’ zwine zwa amba u ya u bvisa Kristo vhafuni.”  Zwino Luṅwalo lu ri mini? Lu ri: “Ipfi ḽi tsini hau, ḽi mulomoni wau na mbiluni yau”; zwine zwa amba “ipfi” ḽa lutendo, ḽine ra khou ḽi huwelela.  Arali u tshi ḓivhadza khagala ḽeneḽo ‘ipfi ḽi re mulomoni wau,’ uri Yesu ndi Murena, na u vha na lutendo lu bvaho mbiluni uri Mudzimu o mu vusa vhafuni, u ḓo tshidzwa. 10  Ngauri muthu u tenda nga mbilu a ḓo kona u itwa o lugaho, fhedzi muthu u ḓivhadza khagala nga mulomo a kona u ḓo tshidzwa. 11  Luṅwalo lu ri: “Muṅwe na muṅwe ane a vha na lutendo khae ha nga farwi nga ṱhoni.” 12  Ngauri a hu na phambano vhukati ha Muyuda na Mugerika, huufha Murena e muthihi kha vhoṱhe, ane a ṋea phaṱhutshedzo nnzhi vhoṱhe vhane vha mu vhidzelela. 13  Ngauri “muṅwe na muṅwe ane a vhidzelela dzina ḽa Yehova u ḓo tshidzwa.” 14  Naho zwo ralo, vha nga vhidzelela hani we vha si mu tende? Vha nga mu tenda hani vha songo mu pfa a tshi ambiwa? Vha nga pfa hani hu si na muthu we a huwelela? 15  Vha nga huwelela hani arali vha songo rumiwa? Samusi ho ṅwalwa ha pfi: “Ndi yavhuḓi lungafhani milenzhe ya vhane vha ḓivhadza mafhungo maḓifha a zwithu zwavhuḓi!” 16  Huno a si vhoṱhe vho thetshelesaho mafhungo maḓifha. Ngauri Yesaya o ri: “Yehova, ndi nnyi we a tenda zwe a zwi pfa nga riṋe?” 17  Ngauralo, muthu u tenda musi o no pfa. Mafhungo ane a pfiwa ndi a Kristo. 18  Naa zwenezwi zwi amba uri a vho ngo pfa wonoyo mulaedza? Na kathihi, “vhathu huṅwe na huṅwe kha ḽifhasi vho pfa wonoyo mulaedza na vhoṱhe vhane vha dzula migumoni ya ḽifhasi vho pfa wonoyo mulaedza.” 19  Naa zwenezwi zwi amba uri Isiraele ho ngo pfa wonoyo mulaedza? Na kathihi, o u pfa. Ho thoma Mushe a ri: “Ndi ḓo shumisa vhathu vha dziṅwe tshaka, ndi ḓo ita uri ni vhe na vivho; nda ni sinyusa nga lushaka lwa matsilu.” 20  Fhedzi Yesaya o vha na tshivhindi a amba a ri: “Ndo wanwa nga vhe vha vha vha sa nṱoḓi; ndo ḓivhiwa nga vhe vha si mmbudzise.” 21  Fhedzi malugana na Isiraele o ri: “Ndo fhedza ḓuvha ḽoṱhe ndo ṋekedzela zwanḓa zwanga kha vhathu vha sa thetshelesi vha mashandukwa.”

Ṱhaluso dzi re magumoni a siaṱari