Vharoma 1:1-32

1  Paulo, mulanda wa Yesu Kristo we a vhidzwa uri a vhe muapostola, o nangwa uri a ḓivhadze mafhungo maḓifha a Mudzimu.  O fulufhedzisa hu tshee nga phanḓa a tshi shumisa vhaporofita vhawe Maṅwaloni makhethwa,  malugana na Murwa wawe we nga lwa ṋama a bva kha mbeu ya Davida,  nga nṱhani ha maanḓa a muya mukhethwa o ṱalulwa sa Murwa wa Mudzimu. Zwenezwo zwo itea musi a tshi vuswa vhafuni. Onoyo Murwa ndi Yesu Kristo Murena washu.  Ngae ro wana vhuthu vhuhulu na vhuapostola uri vhathu vha tshaka dzoṱhe vha tende dzina ḽawe.  Na inwi ni vhukati ha tshaka dzenedzo dze dza vhidzwa nga Yesu Kristo—  Ndi ṅwalela vhoṱhe vha re ngei Roma vha funwaho nga Mudzimu, vho vhidzwaho uri vha vhe vhakhethwa: Vhuthu vhuhulu na mulalo zwi bvaho ha Mudzimu Khotsi ashu na Murena Yesu Kristo nga zwi vhe na inwi.  Tsha u thoma, ndi livhuha Mudzimu wanga nga Yesu Kristo malugana na inwi, ngauri shangoni ḽoṱhe hu khou ambiwa nga ha lutendo lwaṋu.  Ngauri Mudzimu ane nda mu itela tshumelo khethwa nga mbilu yanga yoṱhe malugana na mafhungo maḓifha a ambaho nga ha Murwa wawe, ndi ṱhanzi yanga ya uri ndo ḓi dzula ndi tshi ni amba kha thabelo dzanga, 10  ndi tshi humbela uri arali zwi tshi nga konadzea ndi kone u ḓa ha inwi, arali zwi zwine Mudzimu a zwi funa. 11  Ngauri ndo ṱulutshelwa u ni vhona, uri ndi ni kovhele tshiṅwe tshifhiwa tsha muya uri tshi ni khwaṱhise; 12  uri ri ṱuṱuwedzane, nga lutendo lwaṋu na lwanga. 13  Vhahashu, ndi ṱoḓa ni tshi zwi ḓivha uri ndi lunzhi ndi tshi lingedza u ḓa ha inwi, fhedzi ndi tshi thivhelwa, nahone ndo vha ndi tshi ṱoḓa uri u huwelela hanga henefho hu vhe na mvelelo dzavhuḓi vhukati haṋu sa zwe nda zwi ita kha dziṅwe tshaka dzoṱhe. 14  Ndi na mulandu wa u ya kha Vhagerika na kha vhane vha si vhe Vhagerika, kha vho ṱalifhaho na vha sa ḓivhi tshithu: 15  ngauralo, ndi swela u ni ḓivhadza mafhungo maḓifha na ngeo Roma. 16  A thi na ṱhoni dza u amba mafhungo maḓifha; ngauri ndi maanḓa a Mudzimu a u tshidza vhathu vhoṱhe vha re na lutendo, o thoma u ḓivhadzwa Vhayuda nga murahu a ḓivhadzwa kha Vhagerika; 17  ngauri kha eneo mafhungo hu dzumbululwa u luga ha Mudzimu hune ha bva kha lutendo ha isa lutendoni, samusi ho ṅwalwa ha pfi: “O lugaho u ḓo tshila zwi tshi bva kha lutendo.” 18  Ngauri Mudzimu o dzumbulula zwi tshi bva ṱaḓulu uri u vhenga vhoṱhe vha sa mu ofhi na vha songo lugaho vhane vha kanganyisa ngoho nga nḓila i songo lugaho, 19  zwine zwa ḓivhea nga ha Mudzimu zwi tou vhonala zwavhuḓi, ngauri Mudzimu o zwi bvisela khagala khavho. 20  Ngauri naho pfaneleo dzawe dzi sa vhonali, vhathu vha nga dzi vhona zwavhuḓi musi vha tshi sedza zwe a zwi sika u bva tshee shango ḽa sikwa, uri maanḓa awe a sa fheli na uri ndi Mudzimu ngangoho zwi ṱalukanyiwa nga zwe a zwi sika, nga zwenezwo a vha na tshiitisi tsha u ḓiimelela; 21  ngauri naho Mudzimu vha tshi mu ḓivha, a vho ngo mu hulisa sa Mudzimu naho hu u mu livhuha, fhedzi mihumbulo yavho yo vha ya vhutsilu nahone mbilu dzavho dza swifhalelwa. 22  Naho vha tshi ḓiita vho ṱalifhaho vho mbo ḓi vha matsilu 23  vho shandula vhugala ha Mudzimu a sa sini, vha hulisa tshifanyiso tsha muthu a sinaho na tsha zwiṋoni na zwipuka zwa milenzhe miṋa na zwikokovhi. 24  Ndi zwone zwe Mudzimu a vha litsha ngazwo vha dzhena mashikani nga nyemulo dza mbilu dzavho, vha tshinya mivhili yavho vhone vhaṋe. 25  Vho nanga u tenda mazwifhi nṱhani ha u tenda ngoho ya Mudzimu, nahone vha rabela na u itela tshivhumbwa tshumelo khethwa nṱhani ha u itela we a vha sika, o fanelwaho nga u rendwa lini na lini. Amen. 26  Ndi ngazwo Mudzimu o vha litsha vha dzhena kha nyemulo dza vhudzekani dzi shonisaho, ngauri vhafumakadzi vho shandula nḓila yavho ya lwa tsiko, vha vho ita zwine zwa lwisana na tsiko; 27  zwi ngaho zwenezwo, na vhanna vho litsha u funana na vhafumakadzi, vha vho thoma u emulana nga tshavho, munna na munna, vha tshi ita zwi nengisaho nahone vho no ḓi pfiswa vhuṱungu nga nṱhani ha vhuṱudzi havho. 28  Samusi vho vha vha songo ḓiimisela u ḓivha Mudzimu nga nḓila yo teaho, Mudzimu o vha litsha vha vha na mihumbulo mivhi, uri vha ite zwithu zwi songo teaho. 29  Vha ita vhutshinyi hoṱhe, vhuvhi, vhupangwa, vho ḓala vivho, u vhulaha, khani, vhufhura, vengo, zwitshele, 30  u pomoka, u vhenga Mudzimu, vhuhali, u ḓihudza, u zuwa, u vhamba maano a zwithu zwivhi, u sa thetshelesa vhabebi, 31  vhutsilu, u sa fulufhedzea, u sa vha na lufuno, na u sa vha na khathutshelo. 32  Naho vha tshi ḓivha nga vhuḓalo khaṱulo ya Mudzimu yo lugaho, ya uri vhoṱhe vhane vha ita zwenezwo zwithu vho tewa nga u fa, vha ḓi bvela phanḓa vha tshi zwi ita vha dovha vha takalela na vhane vha zwi ita.

Ṱhaluso dzi re magumoni a siaṱari