Vhakolosa 2:1-23

2  Ndi ṱoḓa ni tshi zwi ṱhogomela uri ndi khou lwa nndwa khulwane ndi tshi itela inwi na vha Laodikea na vha sa athu mmbona.  Zwenezwi ndi uri vha khuthadzwe na uri vha vhe na vhuthihi lufunoni malugana na lupfumo lwoṱhe lune lwa bveledza khwaṱhisedzo ya u pfesesa havho, uri vha wane nḓivho yo teaho ya tshiphiri tshikhethwa tsha Mudzimu, tshine tsha vha Kristo.  Madzanga oṱhe na vhuṱali na nḓivho zwo dzumbwa khae nga vhuronwane.  Ndi khou zwi ambela uri hu si vhe na muthu ane a ni fhura nga maipfi a kungaho.  Naho ndi siho nga lwa ṋama, fhedzi ndi na inwi nga lwa muya, ndi takalela u vhona nḓila ye na dzudzanyea ngayo na u vha na lutendo lwo khwaṱhaho kha Kristo.  Nga zwenezwo, vhunga no ṱanganedza Murena Kristo Yesu, bvelani phanḓa ni tshi tshimbila nga vhuthihi nae,  ni vhe vho ṱokaho midzi no fhaṱelaho khae na u khwaṱha lutendoni, samusi no funzwa zwenezwo, ni tshi fhufhuma lutendo musi ni tshi livhuha.  Itani vhungoho ha uri hu si vhe na muthu ane a ni thuba nga pfunzo dza maṱali na vhufhura ha sialala ḽa vhathu, u ya nga zwithu zwa mutheo zwa shango, hu si u ya nga Kristo.  Ngauri pfaneleo dza Mudzimu dzi khae nga vhuḓalo. 10  A ni shayi tshithu nga nṱhani hawe, ngauri ndi ṱhoho ya mivhuso na vhavhusi vhoṱhe. 11  No fumbiswa nga u vha na vhushaka nae, hu si nga zwanḓa zwa vhathu, fhedzi nga u bvula muvhili wa ṋama u re na tshivhi, ngauri yeneyo ndi nḓila ine vhashumeli vha Kristo vha fanela u fumbiswa ngayo. 12  Ngauri no vhulungwa nae kha ndovhedzo yawe, nahone nga nṱhani hawe no vuswa khathihi nae nga lutendo lwaṋu kha mishumo ya maanḓa ya Mudzimu, we a mu vusa vhafuni. 13  Zwiṅwe hafhu, naho no vha no fa vhutshinyini haṋu nahone ni songo fumbiswa ṋamani, Mudzimu o ita uri ni tshile khathihi nae. Nga vhuthu o ri hangwela vhutshinyi hashu hoṱhe 14  o thutha tshoṱhe mulayo we ra vha ro ṅwalelwa wone. Nahone a u fhelisa nga u u ombela kha danda ḽa tshengedzo. 15  O bvula mivhuso na vhavhusi a vha ṱana khagala sa vho kundwaho, na u vha ranga phanḓa sa mathubwa. 16  Ngauralo, ni songo tenda naho e nnyi a tshi ni haṱula malugana na zwine na ḽa na zwine na nwa kana nga u tevhedza vhuṱambo kana musi ṅwedzi u tshi dzula kana nga sabatha. 17  Zwenezwo ndi murunzi wa zwi ḓaho, muvhili ndi wa Kristo. 18  Ni songo tendela muthu ane a takalela zwa u ḓiṱukufhadza lwa muhoyo na u gwadamela vharuṅwa a tshi ita uri ni si wane malamba, “a tshi ima” nga zwithu zwe a zwi vhona. U a ḓikukumusa a si na tshiitisi tshi pfalaho nga nṱhani ha mahumbulele awe a lwa ṋama, 19  nahone ha khou farelela kha ṱhoho, ine muvhili woṱhe wa ṱumekanywa nga zwiendanungo na misipha wa kona u aluwa zwi tshi itiswa nga Mudzimu. 20  Arali no fa khathihi na Kristo malugana na zwithu zwa mutheo zwa shango, ndi ngani ni tshi kha ḓi tshila sa vhane vha kha ḓi vha tshipiḓa tsha shango nga u tevhedza ndaela dzine dza ri: 21  “Ni songo fara, u thetshela, kana u kwama,” 22  zwi tshi ambela kha zwithu zwine musi zwi tshi shumiswa zwa fhela? Zwenezwi zwi tshimbidzana na ndaela na pfunzo dza vhathu. 23  Naho zwenezwo zwithu zwi tshi nga vhonala zwi vhuṱali kha mufuda wa vhurabeli une muthu a tou ḓinangela na u ḓiṱukufhadza ha khole-khole, na u tambudza muvhili, a zwi thusi muthu u lwa na nyemulo dza ṋama.

Ṱhaluso dzi re magumoni a siaṱari