Mishumo 8:1-40

8  Saulo o takalela u vhulahwa ha Stefano. U bva nga tshenetsho tshifhinga, tshivhidzo tsha Yerusalema tsha tovholwa zwihulu; vhoṱhe vha balangana vha ya madzinguni a Yudea na Samaria nga nnḓa ha vhaapostola.  Fhedzi vhanna vhe vha vha vha tshi ofha Mudzimu vha dzhia Stefano vha mu vhulunga, nahone vha mu lilela zwihulu.  Naho zwo ralo, Saulo a thoma u fara tshivhidzo lwa tshiṱuhu. O vha a tshi bva kha iṅwe nnḓu a tshi ya kha iṅwe, a tshi kokodza vhanna na vhafumakadzi, a tshi vha isa dzhele.  Naho zwo ralo, vhe vha balangana vho bvela phanḓa vha tshi ḓivhadza mafhungo maḓifha a ipfi ḽa Mudzimu.  Filipo o tsela muḓini wa Samaria nahone a thoma u vha funza nga ha Kristo.  Vhathu vhoṱhe vho vha vho thetshelesa nga vhuronwane zwe Filipo a vha a tshi khou zwi amba na u sedza vhuṱolo he a vha a tshi khou vhu ita.  Ngauri vhanzhi vhe vha vha vhe na mimuya mivhi, yo vha i tshi bva khavho i tshi khou zhamba. Zwiṅwe hafhu, vhathu vhanzhi vho omaho lurumbu na vha ṱudzaho vha fhodzwa.  Ngauralo, vhathu vha muḓi wonoyo vha takala zwihulu.  Kha wonoyo muḓi ho vha hu na muṅwe munna we a vha a tshi pfi Simoni, we a vha a tshi ita zwa madambi nahone a tshi mangadza lushaka lwa Samaria, o vha a tshi ḓiita muthu a re na maanḓa. 10  Vhathu vhoṱhe, vhaṱuku na vhahulwane, vho vha vha tshi mu thetshelesa nahone vha tshi ri: “Hoyu munna u na maanḓa mahulwane a bvaho ha Mudzimu.” 11  Ngauralo, vho vha vha tshi mu thetshelesa ngauri ho vha ho no fhela tshifhinga a tshi vha mangadza nga madambi awe. 12  Fhedzi musi vho no tenda Filipo, we a vha a tshi khou ḓivhadza mafhungo maḓifha a muvhuso wa Mudzimu na a dzina ḽa Yesu Kristo, vha lovhedzwa, vhanna na vhafumakadzi. 13  Simoni na ene a vha mutendi, musi o no lovhedzwa, o vha a tshi dzula e na Filipo; nahone o vha a tshi mangala musi a tshi vhona zwiga na mishumo mihulu ye ya vha i tshi itwa. 14  Musi vhaapostola ngei Yerusalema vha tshi pfa uri vhathu vha Samaria vho ṱanganedza ipfi ḽa Mudzimu, vha ruma Petro na Yohane uri vha ye khavho; 15  vhenevho vha tsela henengei nahone vha vha rabelela uri vha wane muya mukhethwa. 16  Ngauri vho vha vho lovhedzwa dzinani ḽa Murena Yesu, fhedzi vha sa athu ṱanganedza muya mukhethwa. 17  Vha vha vhea zwanḓa, nahone vha thoma u wana muya mukhethwa. 18  Musi Simoni a tshi vhona uri vhathu vhane vha khou vhewa zwanḓa nga vhaapostola vha khou wana muya mukhethwa, a vha fulufhedzisa u vha ṋea tshelede, 19  a ri: “Na nṋe mpheni enea maanḓa, uri muṅwe na muṅwe ane nda ḓo mu vhea zwanḓa a wane muya mukhethwa.” 20  Petro a amba nae a ri: “U nga ri u nga fa na tshelede yau, ngauri u humbula uri u nga renga tshifhiwa tsha fhedzi tsha Mudzimu nga tshelede. 21  A u na mukovhe kha hovhu vhuḓinḓa, ngauri a u fulufhedzei phanḓa ha Mudzimu. 22  Ngauralo, rembuluwa u laṱe vhuvhi hau, u rabele Yehova uri arali zwi tshi konadzea, u hangwelwe tshimbevha tshi re mbiluni yau; 23  ndo u vhona uri u na vivho nahone tshifhinga tshoṱhe u ṱoḓa u ita zwithu zwivhi.” 24  Simoni a fhindula a ri: “Ndi khou humbela uri ni nthabelele kha Yehova uri zwoṱhe zwe na zwi amba zwi si itee kha nṋe.” 25  Nga zwenezwo, musi vho no ṱanziela nga vhuḓalo na u amba nga ha ipfi ḽa Yehova, vha vhuyelela Yerusalema, vha enda vha tshi ḓivhadza mafhungo maḓifha miḓanani minzhi ya Vhasamaria. 26  Muruṅwa wa Yehova a amba na Filipo a ri: “Takuwa u ye thungo ya tshipembe nḓilani ine ya bva Yerusalema i tshi ya Gaza.” (Yeneyi ndi nḓila i re sogani.) 27  Filipo a mbo ḓi takuwa a ya, a vhona munna wa Muetiopia, we a vha e gota ḽa khosi ya mufumakadzi Kandatse wa Vhaetiopia, we a vha a tshi ṱhogomela lupfumo lwoṱhe lwa onoyo mufumakadzi. O vha o ya Yerusalema u rabela, 28  fhedzi o vha a tshi khou humela murahu nahone o dzula goloini yawe a tshi khou vhalela nṱha bugu ya muporofita Yesaya. 29  Ngauralo, muya mukhethwa wa amba na Filipo wa ri: “Sendela tsini na yeneyo goloi.” 30  Filipo a gidima a vhambelana na yeneyo goloi a pfa gota ḽi tshi khou vhalela nṱha bugu ya muporofita Yesaya, a vhudzisa a ri: “Naa u a pfesesa zwine wa khou zwi vhala zwa vhukuma?” 31  A fhindula a ri: “Ndi nga zwi pfesesa hani arali hu si na muthu ane a nga mpfunza?” A humbela Filipo uri a ṋamele a dzule nae. 32  Ndimana ya Luṅwalo lwe a vha a tshi khou lu vhalela nṱha yo vha i tshi ri: “O vha a tshi nga nngu i tshi ya u ṱhavhiwa, nahone a tshi nga ngwana i sa lili musi i tshi vheulwa, na ene ho ngo amba tshithu. 33  Tshifhingani tsha u nyadziwa hawe ho ngo haṱulwa nga nḓila yo teaho. Ndi nnyi ane a nga ri vhudza nga vhuḓalo nga ha murafho wawe? Ngauri u ḓo vhulahwa fhano kha ḽifhasi.” 34  Gota ḽa fhindula Filipo ḽa ri: “Ndi khou humbela uri u mmbudze uri muporofita o vha a tshi khou zwi ambela kha nnyi? Naa o vha a tshi khou ambela kha ene muṋe kana o vha a tshi khou amba muṅwe muthu?” 35  Filipo a thoma u amba nga ha lwonolwo Luṅwalo, a mu ḓivhadza mafhungo maḓifha nga ha Yesu. 36  Musi vha tshi khou tsa nga yeneyo nḓila, vha vhona tivha ḽa maḓi, nahone ḽeneḽo gota ḽa ri: “Tivha ḽa maḓi kheḽi; ndi mini tshine tsha nthivhela uri ndi lovhedzwe?” 37 * —— 38  Musi a tshi ralo a imisa goloi, Filipo na ḽeneḽo gota vha dzhena maḓini; Filipo a mu lovhedza. 39  Musi vha tshi bva maḓini, muya mukhethwa wa Yehova wa mbo ḓi ṱuwisa Filipo nga u ṱavhanya, ḽeneḽo gota ḽi si tsha dovha ḽa mu vhona, fhedzi gota ḽa ṱuwa ḽo takala. 40  Filipo a ya Asidodo, nahone a bvela phanḓa a tshi ḓivhadza mafhungo maḓifha miḓini yoṱhe u swika Kesarea.

Ṱhaluso dzi re magumoni a siaṱari

Sedzani ṱhaluso i re magumoni a siaṱari i re kha Mat 17:21.