Mishumo 6:1-15

6  Misini yeneyo, musi vhafunziwa vha tshi khou ḓi anda vha tshi ya, Vhayuda vha ambaho Lugerika vha thoma u gungulela Vhayuda vha ambaho Luheberu, ngauri tshilikadzi dzavho dzo vha dzi tshi khou dzimiwa mukovhe wa ḓuvha ḽiṅwe na ḽiṅwe.  Ngauralo, vha fumi-mbili (12) vha vhidza vhafunziwa vhoṱhe vha amba navho vha ri: “A zwo ngo tea uri riṋe ri litshe u amba nga ha ipfi ḽa Mudzimu uri ri kovhele vhathu zwiḽiwa.  Vhahashu, ḓiṱoḓeleni vhanna vha sumbe vha re na bvumo ḽavhuḓi vhukati haṋu, vhane vha vha na muya mukhethwa na vhuṱali, uri ri vha vhee uri vha ṱhogomele wonoyu mushumo wa ndeme;  fhedzi riṋe ri ḓo ḓikumedza kha u rabela na kha u funza ipfi ḽa Mudzimu.”  Mafhungo eneo a takadza vhafunziwa vhoṱhe, nahone vha nanga Stefano, munna we a vha e na lutendo luhulwane na muya mukhethwa, Filipo, Poroxoro, Nikanoro, Timoni, Paramena, na Nikolao, ṱhunḓu* i bvaho Antiokia.  Vha vha ḓisa kha vhaapostola, nahone musi vho no rabela, vha vha vhea zwanḓa.  Nga zwenezwo, ipfi ḽa Mudzimu ḽa phaḓalala, tshivhalo tsha vhafunziwa tsha bvela phanḓa tshi tshi engedzea vhukuma ngei Yerusalema; nahone vhotshifhe vhanzhi vha vha vhatendi.  Stefano we a vha a tshi takalelwa vhukuma nga Mudzimu nahone e na maanḓa, o vha a tshi khou ita zwithu zwihulu zwi mangadzaho na vhuṱolo vhathuni.  Fhedzi ha ḓa vhaṅwe vhanna vha Sinagogoni ya vho Vhofhololwaho, na vhaṅwe vhanna vha Vhakirene, Vhaalesandria, na vha bvaho Kilikia na Asia, uri vha pikise Stefano. 10  Naho zwo ralo, a vho ngo kona u hanedza vhuṱali hawe musi a tshi amba ngauri o vha a tshi khou thuswa nga muya mukhethwa. 11  Nga zwenezwo, vha langana na vhaṅwe vhanna tshiphirini uri vha ambe uri: “Ro mu pfa a tshi khou sema Mushe na Mudzimu.” 12  Vha ṱuṱuwedza vhathu, vhahulwane, na vhamaṅwalo, vha ḓa nga khathihi vha mu fara, vha mu isa Sanhedrini.* 13  Vha vhidza ṱhanzi dza mazwifhi, dza ri: “Hoyu munna u dzulela u sema afha fhethu hukhethwa na Mulayo. 14  Sa tsumbo, ro mu pfa a tshi amba uri hoyu Yesu wa Munazareta u ḓo thutha afha fhethu nahone a shandula maitele e Mushe a ri ṋea one.” 15  Vhoṱhe vhe vha vha vho dzula Sanhedrini vha mu lavhelesa, vha vhona tshifhaṱuwo tshawe tshi tshi nga tsha muruṅwa.

Ṱhaluso dzi re magumoni a siaṱari

Kana “vho ṱanganedzaho Tshiyuda.”
Yo vha i khoro khulwane ya Vhayuda.