Mishumo 4:1-37

4  Musi vhenevha vhavhili vha tshi khou amba na vhathu, vhotshifhe vhahulu, vhalanguli vha thembele, na Vhasadukei vha ḓa khavho.  Vho vha vho sinyuwa ngauri vho vha vha tshi khou funza vhathu na u amba khagala uri Yesu o vuswa vhafuni;  vha vha fara vha vha valela dzhele u swika nga ḓuvha ḽi tevhelaho, ngauri ḓuvha ḽo vha ḽo no kovhela.  Naho zwo ralo, vhunzhi ha vho thetshelesaho vha tenda, nahone ho vha hu vhanna vhane vha ṱoḓa u vha zwigidi zwiṱanu.  Nga ḓuvha ḽi tevhelaho ha kuvhangana vharangaphanḓa vhavho, vhahulwane na vhamaṅwalo ngei Yerusalema  (na Anasi tshifhe muhulu, Kayafa, Yohane, Alesandere, na mashaka a tshifhe muhulu),  vha vha imisa vhukati havho vha thoma u vha vhudzisa vha ri: “Naa ni ita yeneyi mishumo nga maanḓa a nnyi kana nga dzina ḽa nnyi?”  Nga zwenezwo, Petro a mbo ḓadzwa nga muya mukhethwa, a fhindula a ri: “Vhavhusi vha vhathu na vhahulwane,  arali ṋamusi ri tshi khou sengiswa nga ha mushumo wavhuḓi wa u fhodza munna a lwalaho, nahone ni ṱoḓa u ḓivha uri ndi nnyi we a fhodza onoyu munna, 10  inwi na vhathu vhoṱhe vha Isiraele ḓivhani uri dzinani ḽa Yesu Kristo wa Munazareta, we na mu ombela kha danda nahone Mudzimu a mu vusa vhafuni, ndi ene o itaho uri uyu munna o imaho phanḓa haṋu a fhole. 11  Ḽeneḽi ndi ‘tombo ḽe ḽa laṱwa nga inwi vhafhaṱi ngeno ḽi ḽone thikho ya tshifhaṱo.’ 12  Zwiṅwe hafhu, a hu na muṅwe ane a kona u tshidza, ngauri a hu na ḽiṅwe dzina shangoni ḽe Mudzimu a ḽi nanga kha vhathu uri a ri tshidze ngaḽo.” 13  Musi vha tshi vhona Petro na Yohane vha tshi amba nga tshivhindi, nahone vha tshi ṱhogomela uri vho vha vhe vhanna vha songo funzeaho na vho ḓoweleaho,* vha mangala. Ndi hone vha tshi zwi ṱhogomela uri vho vha vha tshi anzela u tshimbila na Yesu. 14  Musi vha tshi vhona onoyo munna we a fhodzwa o ima navho, vha si fhindule tshithu. 15  Ngauralo, vha ri vha bvele nnḓa ha holo ya Sanhedrini,* vhone vha sala vha tshi ambedzana nga tshavho, 16  vha ri: “Ri ite mini nga avha vhanna? Ngauri vho ita tshiga tshi mangadzaho tshe tsha vhonwa nga vhathu vhoṱhe vha Yerusalema; nahone ri nga si kone u tshi hanedza. 17  Naho zwo ralo, uri zwi si phaḓalale mashangoni a kule, kha ri vha shushedze nahone ri vha vhudze uri vha songo tsha dovha vha amba nga ha ḽeneḽi dzina.” 18  Ngauralo, vha vha vhidza vha vha laya uri vha songo tsha amba tshithu kana u funza naho hu ngafhi nga dzina ḽa Yesu. 19  Fhedzi Petro na Yohane vha vha fhindula vha ri: “Haṱulani inwi vhaṋe arali zwo luga phanḓa ha Mudzimu uri ri thetshelese inwi nṱhani ha u thetshelesa Mudzimu. 20  Fhedzi riṋe ri nga si litshe u amba nga ha zwithu zwe ra zwi vhona na u zwi pfa.” 21  Ngauralo, musi vho no dovha vha vha shushedza, vha vha vhofholola, ngauri vho vha vha si na tshiitisi tsha u vha pfisa vhuṱungu na uri vho vha vha tshi khou ofha vhathu, ngauri vhathu vhoṱhe vho vha vha tshi khou renda Mudzimu nga nṱhani ha zwe zwa itea. 22  Munna we a fhodzwa nga vhuṱolo o vha e na miṅwaha i fhiraho fuiṋa (40). 23  Musi vho no vhofhololwa vha ṱuwa vha ya kha vhatendi ngavho nahone vha vha vhudza zwe vhotshifhe vhahulu na vhahulwane vha vha vhudza zwone. 24  Vha tshi pfa zwenezwo vha rabela Mudzimu nga ipfi ḽihulu vha ri: “Murena Muvhusahoṱhe, ndi iwe wo sikaho ḽiṱaḓulu, ḽifhasi, lwanzhe na zwoṱhe zwi re khazwo, 25  wo amba nga muya mukhethwa u tshi shumisa Davida makhulukuku washu, mushumeli wau, wa ri, ‘Ndi ngani tshaka dzo sinyuwa nahone vhathu vha tshi elekanya nga ha zwithu zwi si na mushumo? 26  Mahosi a ḽifhasi o ḓilugisela u lwa nahone vhavhusi vho kuvhangana vha vha tshigwada tshithihi u itela u lwa na Yehova na muḓodzwa wawe.’ 27  Herode na Pontio Pilato na vhathu vha dziṅwe tshaka na Vhaisiraele vho vha vho kuvhangana kha wonoyu muḓi u itela u lwa na mushumeli wau mukhethwa Yesu, we wa mu ḓodza, 28  uri vha ite zwe wa dzula wo zwi amba uri zwi ḓo itea malugana na maanḓa au na ndivho yau. 29  Zwino Yehova, sedza u sinyuwa havho, nahone u ite uri vhalanda vhau vha dzule vha tshi amba ipfi ḽau nga tshivhindi, 30  ngeno iwe wo imisa tshanḓa tshau u itela u fhodza na musi hu tshi itea vhuṱolo na zwithu zwi mangadzaho nga dzina ḽa mushumeli wau mukhethwa Yesu.” 31  Musi vha tshi fhedza u rabela, fhethu he vha vha vho kuvhangana hone ha dzinginyea; vhoṱhe vha ḓadzwa nga muya mukhethwa nahone vha amba ipfi ḽa Mudzimu nga tshivhindi. 32  Zwiṅwe hafhu, vhe vha tenda vho vha vhe na vhuthihi,* nahone ho vha hu si na na muthihi we a vha a tshi dzhia thundu dze a vha e nadzo sa dzine dza vha dzawe e eṱhe, fhedzi vho vha vha tshi kovhekana zwithu zwoṱhe zwe vha vha vhe nazwo. 33  Zwiṅwe hafhu, vhaapostola vha bvela phanḓa vha tshi ṱanziela vhe na maanḓa mahulu malugana na u vuswa vhafuni ha Murena Yesu; nahone Mudzimu a sumbedza vhoṱhe vhuthu hawe vhuhulwane. 34  Zwi re zwone ndi uri ho vha hu si na we a vha a tshi shaya tshithu vhukati havho; ngauri vhoṱhe vhe vha vha vhe na masimu kana dzinnḓu vho vha vha tshi zwi rengisa nahone vha ḓisa tshelede ya zwithu zwe vha zwi rengisa 35  vha i ṋea vhaapostola. Nga murahu, vho vha vha tshi kovhela muṅwe na muṅwe, u ya nga zwine a zwi shaya. 36  Ngauralo, Yosefa, we vhaapostola vha vha vha tshi mu vhidza Baranaba, zwine zwi tshi ṱalutshedzelwa zwa amba uri Murwa wa Khuthadzo, o vha e Mulevi o bebelwaho Kipiro, 37  onoyo o vha e na tsimu nahone a i rengisa, tshelede ya hone a i ṋea vhaapostola.

Ṱhaluso dzi re magumoni a siaṱari

Zwi ambela kha u sa gudiswa zwikoloni zwa vhurereli zwa Tshiheberu.
Yo vha i khoro khulwane ya Vhayuda.
Ṱhalutshedzelo ya ipfi nga ipfi i ri “mbilu nthihi na muya muthihi.”