Mishumo 27:1-44

27  Samusi ho vha ho no itwa phetho ya uri ri alavhe nga tshikepe ri ye Italia, vha dzhia Paulo na zwiṅwe zwivhotshwa vha vha kumedzela iṅwe nduna ya mmbi ya Augusto ye ya vha i tshi pfi Yulio.  Ra ṋamela tshikepe tshi bvaho Adaramite tshe tsha vha tshi tshi ḓo fhira nga miḓini ya tshiṱirikini tsha Asia, ro vha ri na Aristariko wa Makedonia a bvaho Thesalonika.  Nga ḓuvha ḽi tevhelaho ra swika Sidoni, nahone Yulio a sumbedza Paulo vhuthu nga u mu tendela a tshi ya kha khonani dzawe uri dzi mu ṱhogomele.  U bva henefho ra alavha nga tshikepe ra fhira tsini na Kipiro he ra vha ro khuda kha maḓumbu e a vha a tshi khou bva he ra vha ri tshi khou ya hone;  ra alavha ra pfuka nga Kilikia na Pamfilia nahone ra swika Mira ngei Likia.  Fhedzi henefho nduna ya wana tshikepe tshi bvaho Alesandria tshe tsha vha tshi tshi khou ya Italia, ya ri dzhenisa khatsho.  Musi ro no fhedza maḓuvha manzhi ri tshi khou tshimbila nga luvhilo luṱuku ra konḓelwa u swika Kinido, ngauri ḓumbu ḽo vha ḽi tshi khou ri thivhela, ra alavha tsini na Kereta ngei Salamone he ra vha ro khuda kha maḓumbu,  ra tshimbila henefho zwi tshi khou konḓa ra vhuya ra swika fhethu hune ha pfi Vhuimazwikepe ho Khudaho, henefho tsini ho vha hu na muḓi wa Lasea.  Ro vha ro no fhedza maḓuvha manzhi nahone u alavha zwo vha zwi tshi vho ofhisa ngauri ḓuvha ḽa u pfumelelwa* ḽo vha ḽo no fhira, ngauralo Paulo a vha eletshedza, 10  a ri: “Vhahashu, ndi khou zwi vhona zwa uri lwendo lwashu lu ḓo ita uri ri xelelwe zwihulu nga thundu, tshikepe na vhutshilo hashu.” 11  Naho zwo ralo, nduna ya thetshelesa mutshimbidzi wa tshikepe na muṋe watsho nṱhani ha u thetshelesa zwe zwa vha zwi tshi khou ambiwa nga Paulo. 12  Samusi vhuimazwikepe honoho ho vha hu songo khuda vhuriha, vhathu vhanzhi vha tendelana u ṱuwa henefho vha tshi fulufhela uri vha ḓo fhedza vhuriha Fenike, hune ha vha vhuimazwikepe ha Kereta ho lavhelesaho devhula-vhubvaḓuvha na tshipembe-vhubvaḓuvha. 13  Zwiṅwe hafhu, musi muya u bvaho tshipembe u tshi vhudzula zwavhuḓi, vha humbula uri vha ḓo swika hune vha khou ya hone, vha ṱomola thikho vha thoma u alavha khunzi-khunzini ya lwanzhe vho livhana na Kereta. 14  Naho zwo ralo, nga khathihi fhedzi ha vuwa ḓumbu ḽihulu ḽi bvaho devhula-vhubvaḓuvha.* 15  Samusi tshikepe tsho vha tshi tshi khou vhudzulwa nahone zwi sa konadzei u tshi livhanya na ḽeneḽo ḓumbu, ra tshi litsha tshi tshi vhudzulwa nga muya. 16  Ra khuda tshiṱangadzimeni tshine tsha pfi tsha Klauda, nahone ra kundwa u langa tshikepe tshiṱuku tshi re nga murahu tshikepeni. 17  Musi vho no kokodzela tshikepe tshiṱuku nga ngomu vha tshi vhofha nga dzithambo; vha tshi khou ofha uri tshi ḓo phirimela khunzi-khunzini dza Siriti, vha tsitsa masila nahone vha litsha tshikepe tshi tshi vhudzulwa nga muya. 18  Nga nṱhani ha uri ro vha ri tshi khou vhudzulwa nga maḓumbu, nga ḓuvha ḽi tevhelaho vha fhungudza muhwalo we wa vha u tshikepeni; 19  nga ḓuvha ḽa vhuraru, vha laṱela lwanzheni zwithu zwe vha vha vha tshi zwi shumisa henefho tshikepeni. 20  Musi ho no fhela maḓuvha manzhi ri sa vhoni ḓuvha na dziṋaledzi, ri tshi khou vhudzulwa nga ḓumbu ḽihulu, ri si tsha vha na fulufhelo ḽa uri ri ḓo tshila. 21  Musi vho no fhedza tshifhinga tshilapfu vha sa ḽi, Paulo a ima vhukati havho a ri: “Vhahashu, ngavhe ni thetshelese nyeletshedzo yanga ya uri ri si ṱuwe ngei Kereta ro vha ri tshi ḓo vha ri songo ṱangana na heyi khombo. 22  Naho zwo ralo, ndi khou ni humbela uri ni takale, ngauri a hu na na muthihi waṋu ane a ḓo lovha, hu ḓo lovha tshikepe fhedzi. 23  Ngauri vhusiku vhuno Mudzimu ane nda mu itela tshumelo khethwa o ruma muruṅwa, 24  a ri, ‘Paulo u songo ofha. Ngauri u fanela u sengiswa nga Kesare,* nahone Mudzimu u ḓo u tshidza khathihi na vhoṱhe vhane wa vha navho.’ 25  Ngauralo, inwi vhanna ni songo ofha; ngauri ndi fulufhela uri zwe Mudzimu a mmbudza zwi ḓo itea. 26  Naho zwo ralo, ri kha ḓi ḓo pwashetshelwa nga tshikepe kha tshiṅwe tshiṱangadzime.” 27  Nga vhusiku ha ḓuvha ḽa vhufumi-iṋa (14) ri tshi khou vhudzulelwa ngeno na ngei nga ḓumbu lwanzheni lwa Adria, vhukati ha vhusiku vhaalavhi vha thoma u pfa u nga ri khou sendela tsini ha shango. 28  Nahone vha ela vha wana ho tsa mithara dza furaru-rathi (36); ngauralo vha tshimbila tshikhalanyana nahone vha dovha vha ela vha wana ho tsa mithara dza fumbili-sumbe (27). 29  Nga nṱhani ha uri ro vha ri tshi khou ofha uri tshikepe tshi ḓo gekha matombo, vha mbo ḓi tsitsa thikho nṋa dze dza vha dzi murahu tshikepeni nahone vha lindela uri ḽi tshe. 30  Musi vhaalavhi vha tshi lingedza u shavha tshikepeni nga u tsitsa tshikepe tshiṱuku vha tshi ḓiita u nga vha khou ṱoḓa u tsitsa thikho nga phanḓa ha tshikepe, 31  Paulo a amba na nduna na maswole a ri: “Arali havha vhathu vha bva tshikepeni, inwi ni nga si tshile.” 32  Ngauralo, maswole a mbo ḓi ṱhukhula thambo dze dza vha dzo vhofha tshikepe tshiṱuku nahone vha tshi litsha tsha kumbiwa. 33  Musi ḽi tshi vho tsha Paulo a ṱuṱuwedza vhoṱhe uri vha ḽe, a ri: “Ho no fhela maḓuvha a fuiṋa (40) no dzula no fhaṱuwa ni sa ḽi tshithu. 34  Zwino-ha, ndi khou ni ṱuṱuwedza uri ni ḽe uri ni tshile, ngauri na vhudzi na ḽithihi ḽi re ṱhohoni yaṋu a ḽi nga lovhi.” 35  Musi o no amba zwenezwo, na ene a mbo ḓi dzhia tshinkwa a livhuha Mudzimu vha tshi zwi vhona, a tshi ṅwatekanya, a thoma u ḽa. 36  Ngauralo, vha takala nahone vha thoma u ḽa. 37  Roṱhe vhe ra vha ri henefho tshikepeni ro vha ri maḓana mavhili na mahumi maṱanu na muthihi (276). 38  Musi vho no fhedza u ḽa, vha fhungudza mihwalo ye ya vha i tshikepeni nga u posa goroi lwanzheni. 39  Musi ḽi tshi vho tsha, vha si ḓivhe shango ḽe vha vha vhe khaḽo, fhedzi vho vha vha tshi khou vhona khunzi-khunzi, nahone vho vha vho ḓiimisela u imisa tshikepe khunzi-khunzini arali vha tshi nga kona. 40  Ngauralo, vha ṱhukhula thambo dza thikho nahone vha dzi litsha dza wela lwanzheni, vha dovha vha vhofholola na thanda dza u tshimbidza tshikepe, nahone musi vho no ṱharamudza masila, vha swika khunzi-khunzini. 41  Musi vha tshi khou fhira tsini na ndunduma ya muṱavha, tshikepe tsha phirimela nga phanḓa hatsho nahone tshi si tsha kona u ya phanḓa, fhedzi tsha thoma u pwashekana nga murahu. 42  Maswole a tshi vhona zwenezwo, a langana uri a vhulahe zwivhotshwa, uri hu si vhe na tshithihi tshine tsha bambela tsha shavha. 43  Fhedzi nduna yo vha i tshi khou ṱoḓa u tsireledza Paulo, ya amba navho uri vha si ite zwe vha vha vho zwi humbula. Nduna ya laedza uri vhane vha kona u bambela vha fhufhele lwanzheni uri hu vhe vhone vha u thoma u swika shangoni, 44  nahone vhaṅwe vho vha vha tshi ḓo tevhela, vhaṅwe vho vha vha tshi khou bambela vho farelela mabulannga nahone vhaṅwe vho farelela zwipiḓa zwa tshikepe. Nga zwenezwo, vhoṱhe vha swika shangoni vho tsireledzea.

Ṱhaluso dzi re magumoni a siaṱari

Ho vha hu nga ṅwedzi wa Thisiri (September/October) hune ha vha hu tshi khou thoma tshifhinga tsha mvula na musi lwanzhe lwo halifha.
Yurokwilo.
Khosi.