Mishumo 24:1-27

24  Nga murahu ha maḓuvha maṱanu, tshifhe muhulu Anania na vhaṅwe vhahulwane na muambeli we a vha a tshi pfi Teritulo, vha ḓa vha vhudza muvhusi mafhungo o khakheaho nga ha Paulo.  Musi Teritulo a tshi vhidzwa, a thoma u pomoka Paulo, a ri: “Samusi ḽo lala tshoṱhe nga nṱhani hau nahone tshanduko dzi tshi khou vha hone kha lwonolu lushaka lwashu ngauri u dzula u tshi ri humbulela,  misi yoṱhe ri tshi zwi vhona fhethu hoṱhe, iwe Thovhela Felikisi, ri a livhuha zwihulu.  Fhedzi a thi ṱoḓi u dovha nda u fareledza, ndi khou humbela uri u ri sumbedze vhuthu hau nga u ri thetshelesa zwiṱuku.  Ngauri ro wana uri hoyu muthu u vusa bonyongo na u ita uri Vhayuda vhoṱhe u mona na ḽifhasi vha vutshele muvhuso nahone ndi ene murangaphanḓa wa tshigwada tsho pambuwaho tsha Vhanazareta.  O dovha a lingedza na u tshikafhadza thembele, ngauralo riṋe ra mu fara. 7 * ——  Musi u tshi mu sengisa u ḓo kona u pfesesa nga ha hezwi zwithu zwoṱhe zwine ra khou mu pomoka zwone.”  Na Vhayuda vha ṱanganela kha u sema Paulo, nahone vha amba uri zwo tou ralo. 10  Musi muvhusi a tshi mu tendela uri a ambe, Paulo a fhindula a ri: “Ndi a zwi ḓivha zwavhuḓi uri wo no fhedza miṅwaha minzhi u muhaṱuli wa ulu lushaka, ndi ngazwo ndi tshi khou ḓiambela, 11  samusi u tshi nga ḓiwanela vhuṱanzi, a thi athu fhedza maḓuvha a fumi-mbili (12) u bva tshee nda gonya Yerusalema u rabela; 12  nahone a vho ngo vhuya vha nngwana ndi tshi khou ṱaṱa khani na muthu thembeleni kana ndo vusa bonyongo, sinagogoni kana muḓini woṱhe. 13  A vha na vhuṱanzi ha zwine vha khou mpomoka zwone zwino. 14  Fhedzi tshine ndi si tshi hanedze ndi hetshi, nṋe ndi itela Mudzimu wa vhomakhulukuku washu tshumelo khethwa nga nḓila ine havha vha ri ndi ‘tshigwada tsho pambuwaho,’ ndi a tenda zwoṱhe zwo ṅwalwaho Mulayoni na kha bugu dza Vhaporofita; 15  nahone fulufhelo ḽine nda vha naḽo kha Mudzimu, na vhenevha vhathu vha naḽo, ndi ḽa uri hu ḓo vha na mvuwo ya vho lugaho na vha songo lugaho. 16  Malugana na enea mafhungo, ndi lwela uri ndi dzule ndi na luvalo lwo ṱambaho phanḓa ha Mudzimu na vhathu. 17  Ngauralo, nga murahu ha miṅwaha yo vhalaho ndo ḓa nda ṋea vhathu vha lushaka lwa hashu zwifhiwa zwa khathutshelo, na u ṋekedza zwiṱhavhelo. 18  Vho nngwana thembeleni ndi tshi kha ḓi ita zwenezwo, musi ndo no fhedza u ḓikunakisa nga lwa mulayo, nahone ndo vha ndi si na gogo ḽa vhathu kana ndi sa khou vusa bonyongo. Ho vha hu na vhaṅwe Vhayuda vha bvaho tshiṱirikini tsha Asia, 19  ndi vhone vhe vha vha vho fanela vho ḓa phanḓa hau u itela u mpomoka, arali vho vha vhe na zwine vha nga mpomoka ngazwo. 20  Litsha vhathu vha re fhano vha u vhudze uri ndi vhukhakhi vhufhio he vha vhu wana musi ndi phanḓa ha Sanhedrini,* 21  a hu na zwiṅwe nga nnḓa ha zwe nda amba ndo ima phanḓa havho ndi tshi ri, ‘Ṋamusi ndi khou haṱulwa phanḓa hau malugana na u vuswa ha vhafu!’” 22  Naho zwo ralo, nge Felikisi a vha a tshi ḓivha zwavhuḓi mafhungo a Nḓila ya Murena, a mbo ḓi vha balanganya nahone a ri: “Ndi ḓo dzhia phetho nga ha mafhungo a ni kwamaho musi Lisia mulangammbi a tshi swika.” 23  A laedza nduna uri i dzule yo mu linda, fhedzi i mu ṋee mbofholowo, nahone i tendele vhahawe vha Vhakriste vha tshi mu ṋea zwine a zwi shaya. 24  Ho no fhela maḓuvhanyana Felikisi a swika na mufumakadzi wawe Drusilla, we a vha e Muyuda, a vhidza Paulo uri a mu thetshelese musi a tshi amba nga ha u tenda Kristo Yesu. 25  Fhedzi musi a tshi amba nga ha u luga, u ḓifara, na nga ha khaṱulo ine ya khou ḓa, Felikisi a dzhenwa nga nyofho nahone a fhindula Paulo a ri: “U nga vha wo ṱuwa, fhedzi musi ndi tshi wana tshifhinga ndi ḓo dovha nda u vhidza.” 26  Hone nga tshenetsho tshifhinga, o vha a tshi fulufhela uri Paulo u ḓo mu ṋea tshelede ya tshanḓanguvhoni. Ndi ngazwo o vha a tshi mu vhidza lunzhi-lunzhi uri a ambe nae. 27  Fhedzi ho no fhela miṅwaha mivhili, Portio Festo a vha muvhusi vhudzuloni ha Felikisi; nahone nga nṱhani ha uri Felikisi o vha a tshi khou ṱoḓa u takadza Vhayuda, a litsha Paulo o valelwa henefho dzhele.

Ṱhaluso dzi re magumoni a siaṱari

Sedzani ṱhaluso i re magumoni a siaṱari i re kha Mat 17:21.
Yo vha i khoro khulwane ya Vhayuda.