Mishumo 23:1-35

23  Paulo a lavhelesa Sanhedrini* a ri: “Vhahashu, ndo ḓifara zwavhuḓi phanḓa ha Mudzimu nahone ṋamusi ndi ḓipfa ndi na luvalo lwo ṱambaho.”  Musi tshifhe muhulu Anania a tshi pfa zwenezwo, a laedza vho imaho tsini nae uri vha mu bomodze.  Ndi hone Paulo a tshi amba nae a ri: “Mudzimu u ḓo rwa iwe ane wa nga luvhondo lu re na mashika lwo hulungwaho nga muvhala mutshena. Naa wo dzulela u ntsengisa u ya nga Mulayo ngeno iwe u tshi khou pfuka Mulayo nga u laedza uri nṋe ndi rwiwe?”  Vhe vha vha vho ima henefho tsini vha ri: “Naa u khou sema tshifhe muhulu wa Mudzimu?”  Paulo a ri: “Vhahashu, ndo vha ndi sa zwi ḓivhi uri ndi ene tshifhe muhulu. Ngauri ho ṅwalwa u pfi, ‘U songo sema muvhusi wa lushaka lwa hau.’”  Musi Paulo a tshi ṱhogomela uri vhaṅwe vhanna vhe vha vha vhe henefho vho vha vhe Vhasadukei vhaṅwe vhe Vhafarisei, a vhidzelela henefho Sanhedrini a ri: “Vhahashu, nṋe ndi Mufarisei, ndi murwa wa Vhafarisei. Ndi khou haṱulwa ngauri ndi tenda kha mvuwo.”  Nga nṱhani ha zwenezwo, ha vha na phambano vhukati ha Vhafarisei na Vhasadukei, nahone tshenetsho tshigwada tsha fhandekana nga vhukati.  Ngauri Vhasadukei vho vha vha tshi ri a hu na mvuwo, muruṅwa, kana tshivhumbiwa tsha muya, ngeno Vhafarisei vha tshi tenda kha zwenezwo zwithu zwoṱhe.  Ngauralo, vha zhamba zwihulu nahone vhaṅwe vhaḓivhi vha mulayo vha tshigwada tsha Vhafarisei vha takuwa vha thoma u hanedza nga vhuhali vha ri: “Riṋe uyu munna a ri mu vhoni mulandu; fhedzi hu pfi mini arali tshivhumbiwa tsha muya kana muruṅwa o amba nae,—.” 10  Musi honoho u hanedzana hu tshi hulela, mulangammbi a ofha uri vha ḓo fara Paulo vha mu ṱhukhukanya, a laedza maswole uri a ye a mu bvise vhukati havho nahone a mu ise gammbani ya maswole. 11  Fhedzi nga honoho vhusiku, Murena a ima phanḓa hawe a ri: “U songo ofha! Ngauri samusi wo ṱanziela nga vhuḓalo nga ha nṋe fhano Yerusalema, u tea u ita nga u ralo na ngei Roma.” 12  Musi ḽo no tsha, Vhayuda vha luka maano mavhi nahone vha ana uri vha fanela uri vha semiwe arali vha nga si ḽe kana u nwa vha sa athu mu vhulaha. 13  Vhanna vhe vha luka eneo maano mavhi vho vha vha tshi fhira fuiṋa (40); 14  nahone vha ya ha vhotshifhe vhahulu na vhahulwane vha ri: “Riṋe ro ana ra tou khwaṱhisa uri ri nga si ḽe ri songo thoma ra vhulaha Paulo. 15  Ngauralo, inwi khathihi na Sanhedrini ni fanela u ḓivhadza mulangammbi uri a ḓise Paulo kha inwi, ni ite u nga ni khou ṱoḓa u ṱolisisa mulandu wawe nga vhuḓalo. Fhedzi musi a sa athu swika riṋe ri ḓo dzula ro mu lindela uri ri mu vhulahe.” 16  Naho zwo ralo, muḓuhulu wa Paulo a pfa nga ha tshenetsho tshikwekwe, a ya gammbani ya maswole a sevha Paulo nga ha eneo mafhungo. 17  Ngauralo, Paulo a vhidza muṅwe wa dzinduna a ri: “Ṱuwa na hoyu muṱhannga u mu ise ha mulangammbi, ngauri u na zwine a ṱoḓa u zwi vhiga khae.” 18  A dzhia onoyo muṱhannga a mu isa ha mulangammbi a ri: “Paulo uḽa wa tshivhotshwa o mmbidza uri ndi ḓise uyu muṱhannga ha iwe, ngauri hu na zwine a ṱoḓa u u vhudza zwone.” 19  Mulangammbi a mu fara nga tshanḓa vha imela thungo nahone a mu vhudzisa a ri: “Ndi mini zwine wa khou ṱoḓa u mmbudza zwone?” 20  A fhindula a ri: “Vhayuda vho langana uri vha humbele Paulo uri a ḓiswe Sanhedrini matshelo uri zwi tou nga hu khou ṱoḓa u ṱolisiswa mulandu wawe nga vhuḓalo. 21  Fhedzi u songo vha tendela vha tshi u ṱuṱuwedza, ngauri vhanna vha fhiraho fuiṋa (40) vho mu lalela, nahone vho ana uri vha nga si ḽe kana u nwa vha songo thoma vha mu vhulaha; nahone vho no ḓilugisa, vho lindela phindulo yau.” 22  Ngauralo, mulangammbi a vhudza onoyo muṱhannga uri a ṱuwe, a ri: “U songo vhuya wa vhudza muthu uri wo ntsevhela enea mafhungo.” 23  Ndi hone mulangammbi a tshi vhidza nduna mbili a ri: “Kuvhanganyani maswole a maḓana mavhili na vhaṋameli vha dzibere vha fusumbe (70) na maswole a maḓana mavhili o faraho mapfumo uri a ḓilugisele u ya Kesarea, nahone a vhe o luga nga tshifhinga tsha vhuraru.* 24  Ni dovhe ni lugisele na Paulo bere uri a ṋamele a swike ha muvhusi Felikisi o tsireledzea.” 25  Nahone a ṅwala vhurifhi vhune ha ri: 26  “Nṋe Klaudio Lisia ndi ṅwalela iwe thovhela muvhusi Felikisi: Ri a vusa! 27  Hoyu munna o vha o farwa nga Vhayuda nahone vha tshi khou ṱoḓa u mu vhulaha, nga u ṱavhanya nṋe na maswole anga ra ya ra mu lamulela, ngauri ndo vha ndo pfa uri ndi Muroma. 28  Nga nṱhani ha uri ndo vha ndi tshi ṱoḓa u ḓivha zwe a vha a tshi khou pomokwa zwone, nda mu isa Sanhedrini yavho. 29  Vho vha vha tshi khou mu pomoka nga ha mafhungo ane a tshimbidzana na Mulayo wavho, fhedzi o vha a si na mulandu na muthihi une wa nga ita uri a fanelwe nga u vhulahwa kana u valelwa dzhele. 30  Fhedzi ngauri ndo pfa tshimbevha tshe vha tshi itela onoyu munna, ndo vhona uri ndi khwine ndi tshi mu rumela ha iwe, nahone nda vhudza na vhapomoki vhawe uri vha ḓe vha ambe mafhungo avho phanḓa hau.” 31  Nga zwenezwo, eneo maswole a ita zwe a laedzwa, a dzhia Paulo nahone a mu isa Antipatri vhusiku. 32  Nga ḓuvha ḽi tevhelaho vhanameli vha dzibere vha ṱuwa nae, nahone maswole oṱhe a vhuyelela gammbani yao. 33  Vhanameli vha dzibere vha swika Kesarea vha ṋea muvhusi vhurifhi na u dovha vha mu kumedza Paulo. 34  Ngauralo, a vhu vhala nahone a mu vhudzisa vunḓu ḽine a bva khaḽo nahone a pfa uri u bva Kilikia. 35  A ri: “Ndi ḓo u sengisa zwavhuḓi musi vhapomoki vhau vha tshi swika.” A mbo ḓi laedza uri a dzule o lindwa pfamoni ya Herode.

Ṱhaluso dzi re magumoni a siaṱari

Yo vha i khoro khulwane ya Vhayuda.
Hu ṱoḓaho u vha nga awara ya vhuṱahe nga madekwana.