Mishumo 22:1-30

22  “Vhahashu na vhokhotsi anga, zwino thetshelesani musi ndi tshi ni ṱalutshedza.”  (Musi vha tshi pfa a tshi khou amba navho nga Luheberu, vha fhumula tshoṱhe, ene a ri:)  “Ndi Muyuda, o bebelwaho Tariso kha ḽa Kilikia, fhedzi ndo funzwa kha wonoyu muḓi nga Gamaliele, nda funzwa Mulayo wa vhomakhulukuku washu nga vhuḓalo ndi tshi fhisetshela Mudzimu u fana na inwi ṋamusi.  Ndo tovhola vho faraho yeneyi Nḓila ya Murena na u ita uri vha vhulahwe, nda vhofha vhanna na vhafumakadzi nda vha isa dzhele,  samusi tshifhe muhulu na vhanna vhoṱhe vhahulwane vho kuvhanganaho vha tshi nga ṱanziela zwine nda khou zwi amba, ndi vhone vho nṋeaho marifhi a uri ndi ye kha vhahashu ngei Damaseko, nahone ndo vha ndi tshi khou ṱoḓa uri vhane vha vha henengei ndi vha ḓise Yerusalema vho vhofhiwa uri vha rwiwe.  “Fhedzi musi ndi lwendoni nahone ndi tsini na u swika Damaseko, ḽi tshi vho ṱoḓa u vha masiari, nga u ṱavhanya nda mbo ḓi vhonetshelwa nga lupenyo lu bvaho ṱaḓulu,  nda wela fhasi nahone nda pfa ipfi ḽi tshi amba na nṋe ḽi tshi ri, ‘Saulo, Saulo, ndi ngani u tshi khou ntovhola?’  Nda fhindula nda ri, ‘Muṋe wanga, ndi iwe nnyi?’ Ene a ri, ‘Ndi nṋe Yesu wa Nazareta, ane wa khou mu tovhola.’  Vhanna vhe nda vha ndi navho vha vhona tshedza, fhedzi vha si pfe ipfi ḽa we a vha a tshi khou amba na nṋe. 10  Ngauralo nda ri, ‘Murena, ndi ite mini?’ Murena a mphindula a ri, ‘Takuwa u ye Damaseko, henengei u ḓo vhudzwa zwoṱhe zwe wa nangelwa uri u zwi ite.’ 11  Fhedzi ngauri ndo vha ndi sa koni u vhona nga nṱhani ha tshedza tsha lupenyo, nda swika Damaseko, ndo farwa nga tshanḓa nga vhe nda vha ndi navho. 12  “Ho vha hu na muṅwe munna we a vha a tshi pfi Anania we a vha a tshi ofha Mudzimu u ya nga Mulayo nahone a tshi ambiwa zwavhuḓi nga Vhayuda vhane vha dzula henefho, 13  a ḓa kha nṋe. A ima tsini hanga a ri, ‘Saulo, wahashu, bonyolowa!’ Nda mbo ḓi vhona nga tshenetsho tshifhinga. 14  A ri, ‘Mudzimu wa vhomakhulukuku washu o u nanga uri u ḓivhe zwine a zwi funa, u vhone o lugaho na u pfa ipfi ḽawe, 15  ngauri u ḓo ṱanziela nga hae kha vhathu vhoṱhe nga ha zwithu zwe wa zwi vhona na u zwi pfa. 16  Zwino u kha ḓi lengela’ni? Takuwa u lovhedzwe u ṱanzwiwe zwivhi zwau nga u vhidzelela dzina ḽa Yesu.’ 17  “Musi ndo no vhuyelela Yerusalema nahone ndi tshi khou rabela thembeleni, nda vhona bono 18  Murena a amba na nṋe a ri, ‘Ṱavhanya u ṱuwe fhano Yerusalema, ngauri a vha nga ṱanganedzi vhuṱanzi vhune wa ḓo vhu amba nga ha nṋe.’ 19  Nṋe nda ri, ‘Murena, vhathu vha a zwi ḓivha zwavhuḓi uri ndo vha ndi tshi tshimbila sinagogoni dzoṱhe ndi tshi valela dzhele na u rwa vhane vha u tenda; 20  huno musi hu tshi vhulahwa Stefano ṱhanzi yau, ndo vha ndo ima henefho, nda takalela lufu lwawe; huno nda linda zwiambaro zwa nga nnḓa zwa vho mu vhulayaho.’ 21  Naho zwo ralo, a amba na nṋe a ri, ‘Tshimbila, ngauri ndi ḓo u ruma wa ya kha tshaka dzi re kule.’” 22  Vha mu thetshelesa u swika a tshi amba zwenezwo. Vha zhamba vha ri: “Hoyu munna nga a vhulahwe, ngauri ho ngo tewa nga u tshila!” 23  Ngauri vho vha vha tshi khou zhamba, vha tshi posa na zwiambaro zwavho zwa nga nnḓa, vha tshi phusula na mabuse, 24  mulangammbi a laedza uri a ḓiswe gammbani ya maswole nahone a amba uri u fanela u rwiwa a tshi vhudziswa uri ndi ngani vhathu vha tshi khou mu zhambela nga yeneyi nḓila. 25  Musi vha tshi khou mu vhamba uri vha mu rwe, Paulo a amba na nduna ye ya vha yo ima henefho a ri: “Naa zwo tendelwa uri ni rwe Muroma a songo vhonwa mulandu?” 26  Musi nduna i tshi pfa zwenezwo, ya ya kha mulangammbi ya amba nae ya ri: “Wo ḓiimisela u ita mini? Hoyu munna ndi Muroma.” 27  Ndi hone mulangammbi a tshi ya khae a ri: “Mmbudze, naa u Muroma?” A mu fhindula a ri: “Ee.” 28  Mulangammbi a fhindula a ri: “Ndo renga yeneyi ndugelo ya u vha mudzulapo nga tshelede nnzhi vhukuma.” Paulo a ri: “Fhedzi nṋe ndo bebwa ndi Muroma.” 29  Ngauralo, vhanna vhe vha vha vha tshi khou ṱoḓa u mu sengisa vha mbo ḓi mu litsha; nahone mulangammbi a ofha nge a ṱhogomela uri Paulo o vha e Muroma na uri o vha o mu vhofha nga ngeḓane. 30  Nga ḓuvha ḽi tevhelaho, musi a tshi khou ṱoḓa u ḓivha zwavhuḓi uri ndi ngani Vhayuda vha tshi khou mu pomoka, a mu vhofholola nahone a laedza vhotshifhe vhahulu na miraḓo yoṱhe ya Sanhedrini* uri vha kuvhangane. A ḓisa Paulo a mu imisa vhukati havho.

Ṱhaluso dzi re magumoni a siaṱari

Yo vha i khoro khulwane ya Vhayuda.