Mishumo 2:1-47

2  Nga ḓuvha ḽa vhuṱambo ha Pentekoste vhoṱhe vho vha vho kuvhangana fhethu huthihi.  Nga u ṱavhanya ha pfala muungo u bvaho ṱaḓulu u tshi nga ḓumbu, wa ḓa wa ḓadza nnḓu yoṱhe ye vha vha vhe khayo.  Vha vhona khavhu dza mulilo dzi ngaho ndimi, dza phaḓalala dza kavha kha muṅwe na muṅwe wavho,  vhoṱhe vha ḓadzwa nga muya mukhethwa nahone vha thoma u amba nga nyambo dzo fhambanaho, sa zwe muya mukhethwa wa vha u tshi khou vha funza zwone.  Nga tshenetsho tshifhinga, ho vha hu na Vhayuda vha ofhaho Mudzimu vha bvaho mashangoni oṱhe vhe vha vha vha tshi khou dzula Yerusalema.  Nga zwenezwo, musi vha tshi pfa wonoyu muungo, vhathu vhanzhi vha kuvhangana nahone vha mangala, ngauri muṅwe na muṅwe o vha a tshi khou pfa hu tshi ambiwa luambo lwawe.  Vhukuma, vho vha vho mangala zwihulu nahone vha ri: “Vhonani, naa avha vhathu vhane vha khou amba a si Vhagalilea?  Zwi ḓa hani uri muṅwe na muṅwe washu a pfe hu tshi khou ambiwa nga luambo lwawe lwa ḓamuni?  Vhaparita, Vhameda, Vhaelamu, na vhadzulapo vha Mesopotamia, Yudea, Kapadokia, Ponto, tshiṱirikini tsha Asia, 10  Firigia, Pamfilia, Egipita, madzinguni a Libia, hune ha vha thungo dza Kirene, na vhaeni vha bvaho Roma, Vhayuda na ṱhunḓu, 11  Vhakereta, na Vhaarabia, ri vha pfa vha tshi khou amba nga ha mishumo ya maanḓa ya Mudzimu.” 12  Vhoṱhe vha mangala nahone vha ḓaḓa, vha amba nga tshavho vha ri: “Zwenezwi zwithu zwi amba mini?” 13  Naho zwo ralo, vhaṅwe vha vha holedza vha ri: “Vho kambiwa nga waini i ḓifhaho.” 14  Fhedzi Petro a takuwa e na vhaapostola vha fumi-nthihi (11) nahone a amba navho nga ipfi ḽihulwane a ri: “Vhathu vha Yudea na inwi vhadzulapo vhoṱhe vha Yerusalema, thetshelesani nga vhuronwane zwine nda khou zwi amba. 15  Havha vhathu a vho ngo kambiwa, sa zwine na khou amba, ngauri zwino ndi hone hu tshifhinga tsha vhuraru.* 16  U fhambana na zwenezwo, hezwi ndi zwe zwa ambiwa hu tshi shumiswa muporofita Yoele a tshi ri, 17  Mudzimu u ri: ‘“Maḓuvhani a vhufhelo, ndi ḓo shululela vhathu vhoṱhe muya wanga,* vharwa vhaṋu na vhananyana vhaṋu vha ḓo porofita nahone vhaṱhannga vhaṋu vha ḓo vhona mabono, vhahulwane vhaṋu vha ḓo lora; 18  na vhalanda vhanga vha vhanna na vha vhafumakadzi ndi ḓo vha shululela muya wanga misini yeneyo, nahone vha ḓo porofita. 19  Ndi ḓo ita vhuṱolo kha ḽiṱaḓulu na zwiga kha ḽifhasi, hu ḓo vha na malofha, mulilo na ḓitsi; 20  ḓuvha ḽi ḓo swifhala nahone ṅwedzi u ḓo tswuka sa malofha hu sa athu swika ḓuvha ḽihulu na ḽi swayeaho ḽa Yehova. 21  Huno muṅwe na muṅwe ane a vhidzelela dzina ḽa Yehova u ḓo tshidzwa.”’ 22  “Vhathu vha Isiraele, thetshelesani zwi tevhelaho: Yesu wa Munazareta o vha e muthu we Mudzimu a ni sumbedza ene khagala nga mishumo ya maanḓa, na nga vhuṱolo na zwiga zwe Mudzimu a zwi ita vhukati haṋu a tshi shumisa ene, samusi ni tshi zwi ḓivha. 23  Onoyu munna we a kumedzwa nga khoro na we Mudzimu a vha a tshi ḓivha zwe zwa vha zwi tshi ḓo itea khae hu tshee nga phanḓa, no mu ombela kha danda ni tshi shumisa vhanna vhavhi nahone na mu vhulaha. 24  Fhedzi Mudzimu o mu vhofholola kha mbofho dza lufu nga u mu vusa, ngauri zwo vha zwi sa konadzei uri lufu lu dzule lwo mu vhofha. 25  Davida o amba nga hae a ri, ‘Tshifhinga tshoṱhe Yehova o vha a tshi ḓi dzula e phanḓa hanga; ngauri u kha thungo ya tshanḓa tshanga tsha u ḽa uri ndi si vhuye nda dzinginyea. 26  Nga nṱhani ha zwenezwo, mbilu yanga i a takala nahone ndo amba nga dakalo ḽihulu. Zwiṅwe hafhu, ndi ḓo dzula ndi na fulufhelo; 27  ngauri a u nga ḓo nnditsha* ndi Vhudzulavhafu,* nahone a u nga tendeli muvhuya wau a tshi sina. 28  Wo ntsumbedza nḓila dzi yaho vhutshiloni, u ḓo ita uri ndi dzule ndo takala phanḓa hau.’ 29  “Vhahashu, zwo tea uri ndi ambe ndo vhofholowa nga ha makhulukuku washu Davida, uri o fa a vhulungwa nahone vhiḓa ḽawe ḽi kha ḓi vha hone na ṋamusi. 30  Ngauri o vha e muporofita nahone a tshi ḓivha uri Mudzimu o mu fulufhedzisa nga muano uri muṅwe wa vhaḓuhulu vhawe u ḓo dzula kha khuluṋoni yawe, 31  o zwi vhona hu tshee nga phanḓa nahone a dzula o amba nga ha u vuswa ha Kristo, uri ha nga ḓo litshwa Vhudzulavhafu nahone ṋama yawe a i nga sini. 32  Roṱhe ri ṱhanzi dza uri Mudzimu o vusa Yesu. 33  Ngauri o takulelwa nṱha thungo ya tshanḓa tsha u ḽa tsha Mudzimu a ṋewa muya mukhethwa we a fulufhedziswa wone nga Khotsi, a ri shululela wone, ndi ngazwo ni tshi khou vhona zwine na khou zwi vhona na u zwi pfa. 34  Davida ho ngo gonya a ya ṱaḓulu, fhedzi o ri, ‘Yehova o amba na Murena wanga a ri: “Dzula thungo ya tshanḓa tshanga tsha u ḽa, 35  ndi vhuye ndi ite maswina au vhukando ha milenzhe yau.”’ 36  Nga zwenezwo, lushaka lwoṱhe lwa Isiraele lu fanela u ḓivha uri vhukuma onoyo Yesu we na mu ombela, Mudzimu o mu ita Murena na Kristo.” 37  Musi vha tshi pfa zwenezwi zwithu, zwa tou nga vho ṱhavhiwa dzimbilu, vha amba na Petro na vhaapostola vhoṱhe vha ri: “Vhahashu, ri ite mini?” 38  Petro a amba navho a ri: “Rembuluwani, nahone muṅwe na muṅwe waṋu a lovhedzwe dzinani ḽa Yesu Kristo uri ni hangwelwe zwivhi zwaṋu, nahone ni ḓo wana tshifhiwa tsha fhedzi tsha muya mukhethwa. 39  Zwenezwi ndi zwe na fulufhedziswa zwone, khathihi na vhana vhaṋu, na vhoṱhe vha re kule, na vhoṱhe vhane Yehova Mudzimu washu a ḓo vha vhidza.” 40  A dovha a vha vhudza mafhungo manzhi, a ṱanziela nga vhuḓalo nahone a bvela phanḓa a tshi vha ṱuṱuwedza a ri: “Ni songo fheliswa na uyu murafho wo tshinyalaho.” 41  Nga zwenezwo, vhe vha ṱanganedza eneo mafhungo nga mbilu yoṱhe vha lovhedzwa, nahone nga ḽeneḽo ḓuvha vhathu vha ṱoḓaho u vha zwigidi zwiraru vha engedza mbalo ya vhafunziwa. 42  Vha bvela phanḓa vha tshi ḓiṋekedzela pfunzo ya vhaapostola, vhe na vhuthihi, vha tshi ḽa, na u rabela vhoṱhe. 43  Vhathu vha dzhenwa nga nyofho nge vhaapostola vha vha vha tshi khou ita zwithu zwi mangadzaho na vhuṱolo vhunzhi. 44  Vhoṱhe vho vhaho vhatendi vho vha vha tshi konana vha tshi kovhelana zwine vha vha nazwo, 45  vha rengisa thundu dzavho na ndaka yavho vha kovhela vhoṱhe u ya nga zwishaiwa zwavho. 46  Ḓuvha ḽiṅwe na ḽiṅwe vho vha vha tshi kuvhangana vhoṱhe thembeleni, vha tshi ḽa zwiḽiwa mahayani avho nahone vho takala, 47  vha tshi renda Mudzimu nahone vha tshi takalelwa nga vhathu vhoṱhe. Ḓuvha ḽiṅwe na ḽiṅwe Yehova a ḓi bvela phanḓa a tshi engedza vha tshidzwaho.

Ṱhaluso dzi re magumoni a siaṱari

Hu ṱoḓaho u vha nga awara ya vhuṱahe nga matsheloni.
Ṱhalutshedzelo ya ipfi nga ipfi i ri “kha ṋama yoṱhe.”
Ṱhalutshedzelo ya ipfi nga ipfi i ri “muya wanga.”
Nga Lugerika ndi haiʹdes. Sedzani Ṱhumetshedzo 7.