Mishumo 18:1-28

18  Nga murahu ha zwenezwo, Paulo a ṱuwa Athene a ya Korinta.  Nahone a wana muṅwe Muyuda we a vha a tshi pfi Akwila, o bebelwaho ngei Ponto, we a vha a tshi kha ḓi bva u swika a tshi bva kha ḽa Italia e na Prisila mufumakadzi wawe, ngauri Klaudio o vhudza Vhayuda vhoṱhe uri vha pfuluwe Roma. Nga zwenezwo a ya khavho  a dzula hayani havho, nahone a shuma navho, ngauri vho vha vha tshi runga madennde.  Naho zwo ralo, o vha a tshi funza nga sabatha iṅwe na iṅwe sinagogoni nahone o vha a tshi ita uri Vhayuda na Vhagerika vha tende.  Musi Silasi na Timotheo vha tshi tsa vha tshi bva Makedonia, Paulo a thoma u farekanea vhukuma nga u huwelela ipfi, a tshi ṱanziela kha Vhayuda u itela u vha sumbedza uri Yesu ndi Kristo.  Fhedzi musi vho no mu hanedza na u mu sema, a fhufhura zwiambaro* zwawe nahone a vha vhudza uri: “Malofha aṋu nga a vhe kha ṱhoho dzaṋu. Nṋe a thi na mulandu. U bva zwino ndi ḓo ya kha vhathu vha dzitshaka.”  Nga nṱhani ha zwenezwo, a mbo ḓi ṱuwa henefho a ya nḓuni ya munna ane a pfi Titiosi Yusto, a gwadamelaho Mudzimu, nnḓu yawe yo vha yo vhandekana na sinagogo.  Hone Krisipo, muingameli wa sinagogo, a mbo ḓi tenda Murena na vha muṱa wawe woṱhe. Na Vhakorinta vhanzhi vhe vha thetshelesa vha tenda nahone vha lovhedzwa.  Huno Murena a amba na Paulo nga bono vhusiku a ri: “U songo ofha, fhedzi dzula u tshi amba, u songo fhumula, 10  ngauri ndi na iwe nahone a hu na muthu ane a ḓo u huvhadza; ngauri ndi kha ḓi vha na vhathu vhanzhi kha wonoyu muḓi.” 11  Ngauralo, a dzula henefho ṅwaha woṱhe na miṅwedzi ya rathi, a tshi khou vha funza ipfi ḽa Mudzimu. 12  Musi Galioni e muvhusi wa dzingu ḽa Axaya, Vhayuda vha langana vha vutshela Paulo nahone vha mu isa tshiduloni tsha khaṱulo, 13  vha ri: “Hoyu muthu u khou ṱuṱuwedza vhathu uri vha gwadamele Mudzimu nga nḓila i sa tendelani na mulayo.” 14  Fhedzi musi Paulo a tshi ri u a amba, Galioni a amba na Vhayuda a ri: “Inwi Vhayuda, arali uyu muthu a vhe o khakha kana o tshinya, ndo vha ndi tshi ḓo vha na tshiitisi tsha u ni thetshelesa. 15  Arali hu u hanedzana nga maipfi, madzina, na mulayo waṋu, zwi dzudzanyeni nga tshaṋu. A thi ṱoḓi u vha muhaṱuli wa zwenezwi zwithu.” 16  A tshi fhedza u amba zwenezwo a vha pandela henefho tshiduloni tsha khaṱulo. 17  Ngauralo, vhoṱhe vha mbo ḓi fara Sostene muingameli wa sinagogo nahone vha mu rwa henefho tshiduloni tsha khaṱulo. Fhedzi Galioni a si vhuye a zwi dzhena. 18  Naho zwo ralo, musi o no dzula maḓuvha o vhalahonyana, Paulo a onesana na vhahashu a alavha nga tshikepe a ya Siria, a ṱuwa na Prisila na Akwila. A fhungudza mavhudzi awe musi e ngei Kenkrea, ngauri o vha o ita muano. 19  Ngauralo, vha swika Efeso, nahone a sia Prisila na Akwila henefho; fhedzi ene a ya sinagogoni a ambedzana na Vhayuda nga Maṅwalo. 20  Naho vho vha vha tshi khou humbela lunzhi-lunzhi uri a dzule navho tshifhinga tshilapfu, a si tende, 21  fhedzi a vha onesa a amba navho a ri: “Ndi ḓo dovha nda vhuya kha inwi, arali Yehova a tshi funa.” Nahone a alavha a tshi bva Efeso 22  a tsela Kesarea. A gonya Yerusalema a lumelisa tshivhidzo, nahone a tsela Antiokia. 23  Musi o no fhedza tshifhinga tshilapfu e henefho, a ṱuwa, a buḓekanya mashango a Galata na Firigia, a tshi khwaṱhisa vhafunziwa vhoṱhe. 24  Muḓini wa Efeso ha swika muṅwe munna wa Muyuda ane a pfi Apolo, o bebelwaho ngei Alesandria; o vha e na vhukoni ha u amba, a tshi ḓivha zwavhuḓi Maṅwalo. 25  Onoyu munna o vha o funzwa nḓila ya Yehova nahone o vha a tshi fhisea nga nṱhani ha muya mukhethwa, o vha a tshi amba na u funza zwithu zwo teaho nga ha Yesu, a tshi ḓivha nga ha ndovhedzo ya Yohane fhedzi. 26  A thoma u funza sinagogoni nga tshivhindi nahone musi Prisila na Akwila vha tshi mu pfa, vha mu vhidzela thungo vha mu ṱalutshedza nḓila ya Mudzimu zwavhuḓi. 27  Zwiṅwe hafhu, ngauri o vha a tshi ṱoḓa u wela Axaya, vhahashu vha Efeso vha ṅwalela vha Axaya vha tshi khou vha ṱuṱuwedza uri vha mu ṱanganedze zwavhuḓi. Musi a tshi swika henefho, a thusa zwihulu vhe vha vha vhatendi nga nṱhani ha vhuthu vhuhulu ha Mudzimu; 28  a sumbedza Vhayuda zwavhuḓi nga u ḓiimisela huhulu uri vha khou khakha, musi a tshi shumisa Maṅwalo phanḓa ha vhathu u itela u sumbedza uri Yesu o vha e Kristo.

Ṱhaluso dzi re magumoni a siaṱari

U fhufhura zwiambaro zwo vha zwi tshi sumbedza uri muthu ha na mulandu.