Mishumo 16:1-40

16  A swika Derebe nahone nga murahu a ya Lisitara. Henefho ho vha hu na muṅwe mufunziwa we a vha a tshi pfi Timotheo, murwa wa mufumakadzi wa Muyuda wa mutendi, fhedzi khotsi awe o vha e Mugerika,  nahone o vha e na bvumo ḽavhuḓi kha vhahawe vha Lisitara na Ikonio.  Paulo o vha a tshi tama u tshimbila na Timotheo, nahone a mu dzhia a mu fumbisa nga nṱhani ha uri Vhayuda vhoṱhe vhe vha vha vhe henefho fhethu vho vha vha tshi zwi ḓivha uri khotsi awe o vha e Mugerika.  Musi vha tshi khou tshimbila na yeneyo miḓi vho vha vha tshi laya vhatendi uri vha tevhedze mulayo we wa vhewa nga vhaapostola na vhahulwane ngei Yerusalema.  Nga zwenezwo, zwivhidzo zwa ḓi bvela phanḓa zwi tshi khwaṱhiswa lutendoni na u engedzea ḓuvha ḽiṅwe na ḽiṅwe.  Zwiṅwe hafhu, vha buḓekanya mashango a Firigia na Galata, ngauri muya mukhethwa wo vha dzivhisa u amba ipfi ḽa Mudzimu tshiṱirikini tsha Asia.  Zwiṅwe hafhu, musi vha tshi swika Misia vha ita vhuḓidini ha uri vha ye Bithinia, fhedzi muya wa Yesu* u si vha tendele.  Vha buḓekanya vha ya Misia nahone vha tsela Tiroasi.  Huno Paulo a vhona bono vhusiku: ho vha ho ima munna wa Makedonia henefho a tshi khou mu humbela a tshi ri: “Wela ngeno Makedonia u ri thuse.” 10  Musi Paulo a tshi kha ḓi tou bva u vhona bono ḽeneḽo, ra mbo ḓi humbula uri ri ye Makedonia, nge ra dzhia phetho ya uri Mudzimu u khou ri ruma henefho u itela u vha ḓivhadza mafhungo maḓifha. 11  Nga zwenezwo, ra ṱuwa Tiroasi nga tshikepe ra livha Samotirake, fhedzi nga ḓuvha ḽi tevhelaho ra ya Neapoli, 12  u bva henefho ra ya Filipi, muḓi une wa vhuswa nga Roma, une wa vha muḓi muhulwane wa tshiṱiriki tsha Makedonia. Ra dzula kha wonoyo muḓi lwa tshifhinganyana. 13  Nga ḓuvha ḽa sabatha ra bvela nnḓa ha muḓi ra ya tsini na mulambo, he ra vha ri tshi humbula uri ri ḓo wana fhethu hune ha rabelwa hone; ra mbo ḓi dzula fhasi ra thoma u amba na vhafumakadzi vhe vha vha vho kuvhangana henefho. 14  Muṅwe mufumakadzi ane a pfi Lidia, we a vha e murengisi wa zwiambaro zwa phephulu, we a vha a tshi dzula muḓini wa Thiathira na we a vha a tshi gwadamela Mudzimu, o vha o thetshelesa, Yehova a vula tshoṱhe mbilu yawe uri a pfe zwe Paulo a vha a tshi khou zwi amba. 15  Musi ene na vha muṱa wawe vho no lovhedzwa, a ri humbela a ri: “Arali inwi no vhona uri ndi a fulufhedzea kha Yehova, iḓani ni dzule nḓuni yanga.” A ri kwengweledza ra vhuya ra ya. 16  Ha ri ḽiṅwe ḓuvha ri tshi khou ya fhethu ha u rabela, ra ṱangana na muṅwe musidzana wa mushumeli we a vha e na dimoni ḽa u bvumba. O vha a tshi pfumisa vhaṋe vhawe nga u bvumba. 17  Onoyo musidzana o vha a tshi dzulela u tevhela Paulo na riṋe a tshi khou huwelela a tshi ri: “Havha vhanna ndi vhalanda vha Mudzimu Wa-Ṱaḓulu-ṱaḓulu, vha khou ni ḓivhadza nḓila ya u tshidzwa.” 18  O fhedza maḓuvha manzhi a tshi khou ita zwenezwo. Paulo a fheleledza o neta, a rembuluwa a amba na ḽeneḽo dimoni a ri: “Ndi khou u laya nga dzina ḽa Yesu Kristo, ndi ri ibva khae.” Ḽeneḽo dimoni ḽa mbo ḓi bva nga tshenetsho tshifhinga. 19  Musi vhaṋe vhawe vha tshi vhona uri nḓila ye vha vha vha tshi wana ngayo lupfumo yo fhela, vha fara Paulo na Silasi vha vha kokodzela makete he ha vha hu na vhavhusi. 20  Vha vha isa ha vhakoma, vha swika vha ri: “Havha vhanna vha khou vusa bonyongo ḽihulu muḓini washu. Ndi Vhayuda, 21  nahone vha khou funza milayo ine riṋe ri si fanele u i ṱanganedza kana u i tevhedza, nga nṱhani ha uri ri Vharoma.” 22  Gogo ḽa vha vutshela; musi vhakoma vho no vha kherukanyela zwiambaro zwavho zwa nga nnḓa, vha laedza uri vha rwiwe nga ṱhamu. 23  Ha ri vho no vha rwa ṱhamu nnzhi, vha vha kudza dzhele nahone vha laedza mulindadzhele uri a vha linde vhukuma. 24  Nge a vha o laedzwa nga u ralo, a vha kudza bvungwi ha dzhele nahone a pata milenzhe yavho nga thanda. 25  Vhukati ha vhusiku Paulo na Silasi vho vha vha tshi khou rabela vha tshi khou renda Mudzimu na u mu imbela; nahone zwivhotshwa zwo vha zwo thetshelesa. 26  Nga u ṱavhanya ha mbo ḓi vha na mudzinginyo muhulu, we wa ita uri mutheo wa dzhele u dzinginyee. Nga khathihi fhedzi mavothi oṱhe a vulea, ngeḓane dza vhoṱhe vhe vha vha vho farwa dza vhofholowa. 27  Musi mulindadzhele a tshi karuwa nahone a tshi vhona uri mavothi a dzhele o vulea, a ṱomola banga a tshi ṱoḓa u ḓivhulaha, ngauri o vha a tshi humbula uri zwivhotshwa zwo shavha. 28  Fhedzi Paulo a vhidzelela a ri: “U songo ḓihuvhadza, ngauri ri hone roṱhe!” 29  Ngauralo, mulindadzhele a humbela uri hu ḓiswe luvhone nahone a dzhena nga ngomu dzhele a tshi khou tetemela, a wela fhasi phanḓa ha Paulo na Silasi. 30  Nga zwenezwo, a vha bvisela nnḓa a vha vhudzisa a ri: “Vhaṋe vhanga, ndi fanela u ita mini uri ndi tshidzwe?” 31  Vhone vha ri: “Tenda Murena Yesu nahone u ḓo tshidzwa iwe na vha muṱa wau.” 32  Vha mu funza ipfi ḽa Yehova khathihi na vhoṱhe vha nnḓu yawe. 33  A ṱuwa navho nga honoho vhusiku nahone a vha ṱanzwa mbonzhe dzavho. Nga khathihi fhedzi ene na vha muṱa wawe woṱhe vha mbo ḓi lovhedzwa. 34  A dzhena navho nḓuni yawe a vha lugiselela zwiḽiwa, ene na vha muṱa wawe woṱhe vha takala zwihulu nge vha tenda Mudzimu. 35  Musi ḽo no tsha, vhakoma vha ruma vhaḓinḓa vha ri: “Vhofhololani vhenevho vhanna.” 36  Ngauralo, mulindadzhele a vhudza Paulo zwe a laedzwa a ri: “Vhakoma vho rumela vhathu uri inwi vhavhili ni vhofhololwe. Zwino ibvani ni ṱuwe nga mulalo.” 37  Fhedzi Paulo a amba navho a ri: “Vho ri rwa phanḓa ha vhathu ri songo sengiswa naho ri Vharoma, nahone vha ri kudza dzhele; naa zwino vha khou ri bvisa zwi sa ḓivhei? Kha vha tou ḓa vha ri bvise vhone vhaṋe.” 38  Vhaḓinḓa vha ya vha vhudza vhakoma zwe Paulo a zwi amba. Musi vha tshi pfa zwauri vhenevho vhanna ndi Vharoma vha ofha. 39  Nga nṱhani ha zwenezwo, vha ḓa vha vha kwengweledza, vha vha bvisela nnḓa, vha vha humbela uri vha ṱuwe muḓini. 40  Vha tshi bva dzhele vha ya nḓuni ya Lidia, nahone musi vha tshi vhona vhatendi ngavho, vha vha ṱuṱuwedza nahone vha kona u ṱuwa.

Ṱhaluso dzi re magumoni a siaṱari

Wonoyu ndi muya mukhethwa we Yesu a u ṱanganedza u tshi bva ha Mudzimu.