Mishumo 15:1-41

15  Ha ḓa vhaṅwe vhanna vha bvaho Yudea nahone vha thoma u funza vhahavho vha ri: “Arali na sa fumba u ya nga Mulayo wa Mushe, ni nga si kone u tshidzwa.”  Fhedzi Paulo na Baranaba vha vha hanedza vhukuma na u ṱaṱa khani navho, ha mbo ḓi dzudzanywa uri Paulo na Baranaba, na vhe vha vha vhe navho vha gonye ngei Yerusalema kha vhaapostola na vhahulwane malugana na eneo mafhungo.  Nga murahu ha u fhelekedzwa nga tshivhidzo, vhenevho vhanna vha buḓekanya nga Fenikia na Samaria, vha tshi ṱalutshedza nga vhuḓalo nga ha u rembuluwa ha vhathu vha dzitshaka, nahone zwenezwo zwa takadza vhahavho vhoṱhe.  Musi vha tshi swika Yerusalema vha ṱanganedzwa zwavhuḓi nga tshivhidzo na nga vhaapostola na vhahulwane, nahone vha vha vhudza zwithu zwinzhi zwe Mudzimu a vha thusa uri vha zwi ite.  Naho zwo ralo, vhaṅwe vha tshigwada tsha Vhafarisei vhe vha vha vhatendi vha takuwa vha ri: “Zwo tea uri vha fumbiswe nahone vha laiwe uri vha tevhedze mulayo wa Mushe.”  Ngauralo, vhaapostola na vhahulwane vha kuvhangana u itela u dzudzanya eneo mafhungo.  Musi vho no haseledza lwa tshifhinga tshilapfu, Petro a takuwa a amba navho a ri: “Vhahashu, ni a zwi ḓivha zwavhuḓi uri u bva kale Mudzimu o nnanga vhukati haṋu uri ndi vhudze dzitshaka mafhungo maḓifha uri dzi tende.  Nahone Mudzimu ane a ḓivha mbilu, o ṋea vhuṱanzi ha uri o vha ṱanganedza nga u vha ṋea muya mukhethwa u fana na riṋe.  Ho ngo vha ṱalula kha riṋe, fhedzi o vha ṱanzwa mbilu dzavho nga lutendo. 10  Zwino ndi ngani ni tshi linga Mudzimu nga u hwesa vhafunziwa dzhogo kha mitsinga ye riṋe na vhomakhulukuku washu ra kundwa u i hwala? 11  Naho zwo ralo, ri na lutendo lwa uri ri ḓo tshidzwa nga vhuthu vhuhulu ha Murena Yesu nga nḓila i fanaho na yavho.” 12  Gogo ḽoṱhe ḽa fhumula, nahone ḽa thoma u thetshelesa Baranaba na Paulo vha tshi ṱalutshedza vhuṱolo vhunzhi na zwithu zwi mangadzaho zwe Mudzimu a zwi ita kha vha dzitshaka a tshi shumisa vhone. 13  Musi vho no fhumula, Yakobo a amba navho a ri: “Vhahashu, nthetsheleseni. 14  Simioni o ri ṱalutshedza nga vhuḓalo nḓila ye Mudzimu a livhisa ngayo ṱhogomelo kha vha dzitshaka lwa u thoma nahone kha vhenevho a ḓinangela vhathu vhane vha ḓo vhidzwa nga dzina ḽawe. 15  Zwenezwo zwi tendelana na zwo ambiwaho nga Vhaporofita, samusi ho ṅwalwa ha pfi, 16  ‘Yehova o amba uri nga murahu ha zwenezwi zwithu ndi ḓo vhuya nda fhaṱulula nnḓu ya Davida ye ya vha yo wa; ndi ḓo fhaṱulula shubi ḽawo, 17  uri vhathu vho salaho vha ṱoḓe Yehova nga mbilu yavho yoṱhe, khathihi na vhathu vha tshaka dzoṱhe, vhane vha vhidzwa nga dzina ḽanga vhane vha khou ita zwenezwi zwithu, 18  zwo ḓivhiwaho u bva kale.’ 19  Nga zwenezwo, phetho yanga a si ya u dina vha dzitshaka vhane vha khou rembulutshela kha Mudzimu, 20  fhedzi ndi u vha ṅwalela uri vha iledze zwithu zwo tshikafhadzwaho nga midzimu ya zwifanyiso, vhupombwe, u ḽa zwo faho nga u tou tzhipiwa, na malofha. 21  U bva zwifhingani zwa kale ho vha hu na vhe vha vha vha tshi huwelela vha tshi shumisa bugu dza Mushe miḓini yoṱhe, vha tshi dzi vhalela nṱha sabatha iṅwe na iṅwe dzisinagogoni.” 22  Nga zwenezwo, vhaapostola na vhahulwane khathihi na tshivhidzo tshoṱhe vha ita phetho ya uri vha nange vhanna vhukati havho uri vha vha rume Antiokia khathihi na Paulo na Baranaba. Ho vha hu Yudasi ane a vhidzwa Barasaba na Silasi, vhanna vhe vha vha vha tshi ranga phanḓa vhukati ha vhahavho. 23  Vha ṅwala uri: “Riṋe vhaapostola na vhahulwane na vhahaṋu, ri ṅwalela inwi vhahashu vha re Antiokia, Siria na Kilikia vhane vha bva kha dzitshaka ri ri: Ri a vusa! 24  Samusi ro zwi pfa uri vhaṅwe vhukati hashu vho ni khakhisa nga pfunzo dzavho, vha tshi lingedza u ni kanganyisa kha zwine na zwi tenda, naho ri songo vha ruma, 25  ro tendelana roṱhe nahone ra phetha uri ri nange vhanna uri vha ḓe ha inwi khathihi na Baranaba na Paulo vhane ra vha funa, 26  vhanna vho ḓikumedzaho vha tshi itela dzina ḽa Murena washu Yesu Kristo. 27  Ngauralo, ri khou ni rumela Yudasi na Silasi, uri vha ni vhudze eneo mafhungo. 28  Muya mukhethwa wo ri thusa uri ri swikele phetho ya uri ri si dovhe ra ni hwesa muṅwe muhwalo, nga nnḓa ha hezwi zwithu zwi tevhelaho zwa ndeme, 29  dzulani ni tshi iledza zwithu zwo ṋekedzwaho midzimu ya zwifanyiso, malofha, u ḽa zwo faho nga u tou tzhipiwa na vhupombwe. Arali na iledza zwenezwo zwithu nga vhuronwane, ni ḓo bvelela. Takalani!” 30  Musi vhenevho vhanna vha tshi swika Antiokia, vha kuvhanganya gogo nahone vha ḽi ṋekedza vhurifhi. 31  Ha ri vho no fhedza u vhu vhala, vha takala zwihulu ngauri ho vha ṱuṱuwedza. 32  Samusi Yudasi na Silasi vho vha vhe vhaporofita, vho ṱuṱuwedza vhahavho nga nyambo nnzhi dze vha dzi ṋekedza na u vha khwaṱhisa. 33  Musi vho no fhedza tshifhinganyana vhe henefho, vha onesana na vhahavho nga mulalo nahone vha vhuyelela ha vhaapostola. 34 * —— 35  Naho zwo ralo, Paulo na Baranaba khathihi na vhaṅwe vhanzhi vha sala Antiokia vha tshi funza na u ḓivhadza mafhungo maḓifha a ipfi ḽa Yehova. 36  Nga murahu ha maḓuvha a si gathi, Paulo a amba na Baranaba a ri: “Kha ri dovhe ri dalele vhahashu miḓini yoṱhe ye ra vhuya ra ḓivhadza ipfi ḽa Yehova khayo u itela u vhona uri vho vuwa hani.” 37  Baranaba o vha o ḓiimisela uri vha ṱuwe na Yohane, we a vha a tshi vhidzwa Marko. 38  Fhedzi Paulo ho ngo takalela u ṱuwa nae, ngauri o ṱuwa a vha sia ngei Pamfilia nahone a si ye navho mushumoni. 39  Nga nṱhani ha zwenezwo, ha vuwa khani khulu, lwe vha vhuya vha fhambana; nahone Baranaba a ṱuwa na Marko nga tshikepe vha ya Kipiro. 40  Paulo a nanga Silasi, nahone musi vhatendi ngae vho no mu kumedza vhuthu vhuhulu ha Yehova, a mbo ḓi ṱuwa. 41  A buḓekanya ḽa Siria na ḽa Kilikia, a tshi khwaṱhisa zwivhidzo.

Ṱhaluso dzi re magumoni a siaṱari

Sedzani ṱhaluso i re magumoni a siaṱari i re kha Mat 17:21.