Mishumo 10:1-48

10  Ngei Kesarea ho vha hu na muṅwe munna we a vha a tshi pfi Koronelio, mulangammbi wa tshigwada tsha maswole a Italia, samusi tsho vha tshi tshi vhidzwa nga u ralo.  Ene na muṱa wawe vho vha vho ḓikumedza kha Mudzimu nahone vha tshi mu ofha, o vha a tshi ṋea vhathu zwifhiwa nahone o vha a tshi rabela Mudzimu tshifhinga tshoṱhe.  Hu ṱoḓaho u vha nga tshifhinga tsha vhuṱahe* a vhona bono nahone muruṅwa wa Mudzimu a amba nae a ri: “Koronelio!”  Koronelio a mu lavhelesa o tshuwa nahone a mu vhudzisa a ri: “Murena, ndi mini?” Muruṅwa a mu fhindula a ri: “Thabelo dzau na zwifhiwa zwa khathutshelo zwo swika ṱaḓulu phanḓa ha Mudzimu uri zwi vhe tshihumbudzo.  Ngauralo, ruma vhanna ngei Yope uri vha ye u vhidza Simoni ane a vhidzwa Petro.  Onoyo munna ndi mueni wa Simoni, musuki wa mikumba ane nnḓu yawe ya vha tsini na lwanzhe.”  Nga u ṱavhanya musi muruṅwa we a amba nae a tshi tou ṱuwa, a mbo ḓi vhidza vhaṅwe vhashumeli vhawe vhavhili vha nḓuni na swole ḽo ḓikumedzaho vhukati ha vhe vha vha vha tshi mu shumela tshifhinga tshoṱhe,  a vha anetshela zwoṱhe nahone a kona u vha ruma Yope.  Nga ḓuvha ḽi tevhelaho musi vhe lwendoni lwavho vhe tsini na u swika muḓini, Petro a gonya ṱhangani ya nnḓu hu ṱoḓaho u vha nga tshifhinga tsha vhurathi* u itela u rabela. 10  A farwa nga nḓala khulu nahone o vha a tshi ṱoḓa u ḽa. Musi vha tshi kha ḓi lugisela zwiḽiwa, a vhona bono 11  ḽiṱaḓulu ḽo vulea, ha tsela tshithu kha ḽifhasi tshi ngaho labi ḽihulwane ḽo farwa nga khuḓa dzaḽo nṋa; 12  nahone nga ngomu ho vha hu na zwipuka zwa milenzhe miṋa na zwikokovhi zwa mifuda yoṱhe zwa kha ḽifhasi na zwiṋoni zwa ṱaḓulu. 13  Ngauralo, a pfa ipfi ḽi tshi amba nae ḽi tshi ri: “Petro, takuwa u ṱhavhe u ḽe!” 14  Fhedzi Petro a ri: “Na kathihi Murena, ngauri a thi athu vhuya nda ḽa tshithu tshi songo kunaho na tshi re na tshika.” 15  Ha dovha ha pfala ipfi lwa vhuvhili ḽa ri: “Litsha u amba uri zwithu zwo kunakiswaho nga Mudzimu zwi na tshika.” 16  Ha dovha ha pfala ipfi lwa vhuraru, nahone nga u ṱavhanya tshiḽa tshithu tsha dovha tsha gonyiselwa nṱha ṱaḓulu. 17  Musi Petro a tshi kha ḓi vha o mangala uri bono ḽe a ḽi vhona ḽi nga vha ḽi tshi amba mini, vhaḽa vhanna vhe vha vha vho rumiwa nga Koronelio vho vha vho no vhudzisa hune nnḓu ya Simoni ya vha hone nahone vho vha vho no ima henefho khoroni. 18  Ngauralo, vha vhudzisa arali hu na mueni henefho ane a pfi Simoni ane a vhidzwa Petro. 19  Musi Petro a tshi kha ḓi elekanya nga ha bono, muya mukhethwa wa ri: “Hu na vhanna vhararu vhane vha khou u ṱoḓa. 20  Ngauralo, takuwa, u tsele kamarani ya fhasi u ṱuwe navho, u songo timatima na luthihi ngauri ndi nṋe ndo vha rumaho.” 21  Nga zwenezwo, Petro a tsa a ya kha vhenevho vhanna nahone a amba navho a ri: “Muthu ane na khou mu ṱoḓa ndi nṋe. No ḓela mini fhano?” 22  Vha ri: “Koronelio, mulangammbi, munna o lugaho na a ofhaho Mudzimu, ane ha ambiwa zwavhuḓi nga hae nga lushaka lwoṱhe lwa Vhayuda, Mudzimu o ruma muruṅwa mukhethwa, a vhudza Koronelio uri a u rambe nḓuni yawe u itela u pfa zwine wa ḓo amba.” 23  Ngauralo, a ri vha dzhene nḓuni nahone vha vha vhaeni vhawe. Nga matshelo a ṱuwa navho, khathihi na vhaṅwe vhahawe vha bvaho Yope. 24  Nga ḓuvha ḽi tevhelaho a swika Kesarea. Koronelio o vha o vha lavhelela nahone o vha o kuvhanganya mashaka awe na khonani dzawe dza tsini. 25  Musi Petro a tshi swika, Koronelio a mu ṱanganedza, a gwadama a mu losha. 26  Fhedzi Petro a mu takusa, a ri: “Takuwa; na nṋe ndi tou vha muthu zwawe.” 27  Petro a dzhena a tshi khou amba na Koronelio nahone a wana vhathu vhanzhi vho kuvhangana henefho, 28  a amba navho a ri: “Ni a zwi ḓivha uri a zwo ngo tendelwa nga Tshiyuda u konana kana u amba na muthu wa luṅwe lushaka; naho zwo ralo, Mudzimu o ntsumbedza uri a tho ngo fanela u amba uri muṅwe muthu ho ngo kuna kana u na tshika. 29  Ndi ngazwo ndi songo hana musi ndi tshi vhidzwa. Nga zwenezwo, ndi ri no mbidzela’ni?” 30  Koronelio a ri: “Maḓuvha maṋa o fhiraho musi ndi tshi khou vhalela u bva nga tshenetshi tshifhinga ndo vha ndi tshi khou rabela nḓuni yanga nga tshifhinga tsha vhuṱahe,* musi hu tshi bvelela munna o ambaraho zwiambaro zwi penyaho a ima phanḓa hanga 31  nahone a ri, ‘Koronelio, thabelo yau yo pfiwa nahone Mudzimu o humbula zwifhiwa zwau zwa khathutshelo zwe wa ṋea vhashai. 32  Ngauralo, ruma vhathu uri vha ye ngei Yope u vhidza Simoni, a vhidzwaho Petro. Onoyo munna ndi mueni nḓuni ya Simoni musuki wa mikumba, a dzulaho tsini na lwanzhe.’ 33  Nga zwenezwo, nga u ṱavhanya nda rumela vhathu uri vha u vhidze, nahone wo ita zwone wa ḓa. Zwino roṱhe ro kuvhangana phanḓa ha Mudzimu u itela u pfa zwoṱhe zwe wa laedzwa nga Yehova uri u zwi ambe.” 34  Musi Petro a tshi pfa zwenezwo a ri: “Zwino ndi a zwi pfesesa ngangoho uri Mudzimu ha ṱaluli, 35  fhedzi kha tshaka dzoṱhe muthu ane a mu ofha nahone a ita zwo lugaho u a mu ṱanganedza. 36  O rumela Vhaisiraele mulaedza nga u vha ḓivhadza mafhungo maḓifha a mulalo a tshi shumisa Yesu Kristo: Onoyu ndi Murena wa vhoṱhe. 37  Ni a ḓivha mafhungo e a ambiwa kha ḽoṱhe ḽa Yudea, u thoma Galilea nga murahu ha ndovhedzo ye ya vha i tshi khou huwelelwa nga Yohane, 38  nga ha Yesu we a vha a tshi bva Nazareta. Mudzimu o mu ḓodza nga muya mukhethwa nahone a mu ṋea maanḓa, a tshimbila a tshi ita zwivhuya shangoni ḽoṱhe na u fhodza vhoṱhe vho tsikeledzwaho nga Diabolo; ngauri Mudzimu o vha e nae. 39  Zwino ri ṱhanzi dza zwoṱhe zwe a zwi ita shangoni ḽa Vhayuda na ngei Yerusalema; fhedzi vho mu vhulaha nga u mu ombela kha danda. 40  Mudzimu o mu vusa nga ḓuvha ḽa vhuraru nahone a si tende a tshi vhonwa 41  nga vhathu vhoṱhe, fhedzi nga ṱhanzi dze dza dzula dzo nangiwa nga Mudzimu, nga riṋe ro ḽaho na u nwa nae musi o no vuswa vhafuni. 42  Zwiṅwe hafhu, o ri laedza uri ri huwelele kha vhathu nahone ri ṱanziele nga vhuḓalo uri onoyo ndi we a rumiwa nga Mudzimu uri a vhe muhaṱuli wa vha tshilaho na vho faho. 43  Vhaporofita vhoṱhe vho ṱanziela nga hae, vha ri muṅwe na muṅwe ane a vha na lutendo khae u ḓo hangwelwa zwivhi dzinani ḽawe.” 44  Musi Petro a tshi kha ḓi amba nga ha eneo mafhungo, vhoṱhe vhe vha vha vho mu thetshelesa vha ṱanganedza muya mukhethwa. 45  Vhatendi vho fumbiswaho vhe vha ḓa na Petro vho vha vho mangala, ngauri vhathu vha dziṅwe tshaka vho vha vho shululelwa tshifhiwa tsha fhedzi tsha muya mukhethwa. 46  Ngauri vho vha pfa vha tshi khou amba nga nyambo dzi sili vha tshi khou renda Mudzimu. Nga zwenezwo, Petro a ri: 47  “Naa hu na ane a nga hana musi vhenevha vhathu vhe vha ṱanganedza muya mukhethwa u fana na riṋe vha tshi lovhedzwa?” 48  A amba navho uri vha lovhedzwe dzinani ḽa Yesu Kristo. Vha mu humbela uri a dzule navho maḓuvhanyana.

Ṱhaluso dzi re magumoni a siaṱari

Hu ṱoḓaho u vha nga awara ya vhuraru nga masiari.
Hu ṱoḓaho u vha nga awara ya vhufumi-mbili (12) nga masiari.
Hu ṱoḓaho u vha nga awara ya vhuraru nga masiari.