Mishumo 1:1-26

1  Theofilo, kha bugu yanga ya u thoma, ndo ṅwala nga ha zwithu zwoṱhe zwe Yesu a thoma u zwi ita na u zwi funza,  u swikela nga ḓuvha ḽe a takulelwa ngaḽo nṱha, musi o no ṋea vhaapostola vhe a vha nanga ndaela dzawe a tshi shumisa muya mukhethwa.  Musi o no tambudzwa, o ya khavho a vha sumbedza vhuṱanzi vhunzhi ho khwaṱhaho ha uri u khou tshila. Vha fhedza maḓuvha a fuiṋa (40) vha tshi mu vhona nahone a tshi vha ṱalutshedza nga ha Muvhuso wa Mudzimu.  Musi a tshi ṱangana navho o vha vhudza a ri: “Ni songo ṱuwa Yerusalema, fhedzi ni dzule no lindela zwe Khotsi a ni fulufhedzisa, zwe na zwi pfa nga nṋe;  ngauri Yohane o lovhedza nga maḓi, fhedzi inwi ni ḓo lovhedzwa nga muya mukhethwa maḓuvha a si gathi nga murahu ha zwenezwi.”  Musi vho kuvhangana, vha vhudzisa Yesu vha ri: “Murena, naa u ḓo vusulusa muvhuso wa Isiraele nga tshenetshi tshifhinga?”  A vha fhindula a ri: “Ndi Khotsi wa ṱaḓulu fhedzi ane a vha na maanḓa a u vhea tshifhinga tshine zwithu zwa ḓo itea ngatsho, inwi a no ngo tea u ḓivha tshenetsho tshifhinga;  fhedzi ni ḓo wana maanḓa musi muya mukhethwa u tshi ḓa kha inwi, nahone ni ḓo vha ṱhanzi dzanga Yerusalema na kha ḽoṱhe ḽa Yudea na ḽa Samaria, u swika tshipiḓani tsha kule vhukuma tsha ḽifhasi.”  Musi o no amba zwenezwo zwithu vha tshi kha ḓi vha vho mu lavhelesa, a takulelwa nṱha, a tsirwa nga gole nahone vhafunziwa vha si tsha mu vhona. 10  Vha tshi kha ḓi vha vho lavhelesa nṱha musi Yesu a tshi khou ṱuwa, nga khathihi fhedzi vha vhona vhanna vhavhili vho ambara zwiambaro zwitshena vho ima tsini navho, 11  nahone vha amba navho vha ri: Vhanna vha Galilea, ndi ngani no ima afha no lavhelesa nṱha? Onoyo Yesu we na mu vhona a tshi takulelwa nṱha u ḓo vhuya nga nḓila i fanaho na ye na mu vhona a tshi ṱuwa ngayo. 12  Nga zwenezwo, vha mbo ḓi tsa Thavhani ya Miṱwari vha vhuyelela Yerusalema he ha vha hu si kule, hu tshi ṱoḓa u vha khilomithara nthihi.* 13  Musi vha tshi swika, vha ya kamarani ya nṱha, he vha vha vha tshi dzula hone; ho vha hu na Petro, Yohane, Yakobo, Andrea, Filipo, Thomasi, Baratholomeo, Mateo, Yakobo murwa wa Alifeo, Simoni a fhiseaho, na Yudasi murwa wa Yakobo. 14  Vha ḓi dzula vha tshi rabela nga vhuthihi, vhe na vhaṅwe vhafumakadzi khathihi na Maria mme a Yesu na vharathu vhawe. 15  Misini yeneyo Petro a ima vhukati ha vhatendi ngae (vhathu vhe vha vha vhe henefho vho vha vha tshi ṱoḓa u lingana 120) a ri: 16  Vhahashu, zwo vha zwo tea uri luṅwalo lu ḓadzee, samusi muya mukhethwa wo dzula wo amba u tshi shumisa Davida malugana na Yudasi, we a vha o ranga phanḓa vhe vha fara Yesu, 17  ngauri o vha e muṅwe washu nahone o vha e na mukovhe kha honovhu vhuḓinḓa. 18  (Onoyo munna o mbo ḓi renga tsimu nga yeneyo tshelede ya u sa fulufhedzea hawe, a wa nga ṱhoho thumbu yawe ya balea, mala awe a hushuwa. 19  Zwenezwo zwa ḓivhiwa nga vhadzulapo vhoṱhe vha Yerusalema, ndi ngazwo yeneyo tsimu nga luambo lwavho vho i vhidza uri Hakeldama, zwine zwa amba, Tsimu ya Malofha.) 20  Ngauri kha bugu ya Dzipsalme ho ṅwalwa u pfi, ‘Vhudzulo hawe kha vhu sale vhu shubi, hu songo vha na ane a ḓo dzula henefho,’ na ‘Mushumo wawe wa u ingamela kha u dzhiiwe nga muṅwe.’ 21  Nga zwenezwo, zwo tea uri muṅwe wa vhenevha vhanna vhe vha vha vhe na riṋe tshifhinga tshoṱhe musi ri na Murena Yesu, 22  u bva a tshi lovhedzwa nga Yohane u swika ḓuvha ḽe a vhuyelela ṱaḓulu, a vhe ṱhanzi khathihi na riṋe malugana na mvuwo ya Yesu. 23  Ngauralo, ha nangiwa vhanna vhavhili, Yosefa ane a vhidzwa Barasaba, we a vha a tshi vhidzwa Yusto, na Mathia. 24  Vha rabela vha ri: Iwe Yehova u ḓivhaho mbilu dza vhathu vhoṱhe, ri sumbedze uri wo nanga ufhio kha avha vhanna vhavhili, 25  uri a ite mushumo wa vhuḓinḓa na wa vhuapostola, we Yudasi a u ṱutshela a fara nḓila yawe. 26  Vha ita madeṅwa, ha mvaṱiwa Mathia, a vha muṅwe wa vhaapostola khathihi na vha fumi-nthihi (11).

Ṱhaluso dzi re magumoni a siaṱari

Nga Lugerika ‘sabbatou . . . odon’ ndi tshikhala tshe Muyuda a vha a tshi tendelwa u tshi tshimbila nga Sabatha.