Mateo 5:1-48

5  Huno a tshi vhona gogo, a gonya thavhani; musi o no dzula fhasi vhafunziwa vhawe vha ḓa khae.  A thoma u vha funza, a ri:  “Hu takala vhane vha ṱhogomela uri vha ṱoḓa u ḓivha Mudzimu, ngauri Muvhuso wa ṱaḓulu ndi wa vhenevho.  “Hu takala vhane vha lila, ngauri vha ḓo fhumudzwa.  “Hu takala vho vuḓaho, ngauri vha ḓo vha vhaṋe vha ḽifhasi.  “Hu takala vha re na nḓala na ḓora ḽa zwo lugaho, ngauri vha ḓo fushwa.  “Hu takala vhakhathutsheli, ngauri vha ḓo khathutshelwa.  “Hu takala vha mbilu dzo ṱambaho, ngauri vha ḓo vhona Mudzimu.  “Hu takala vhadzia-mulalo, ngauri vha ḓo vhidzwa vharwa vha Mudzimu. 10  “Hu takala vhe vha tovholwa nga nṱhani ha u luga, ngauri Muvhuso wa ṱaḓulu ndi wa vhenevho. 11  “Ni takale musi vhathu vha tshi ni sema na u ni tovhola, vha tshi ni pomoka vhuvhi hoṱhe hu u zwifha nga nṱhani ha dzina ḽanga. 12  Takalani ni pembele, ngauri malamba aṋu ndi manzhi ngei ṱaḓulu, na vhaporofita vhe vha vha hone phanḓa haṋu vho ḓi vha tovhola. 13  “Inwi ni muṋo wa ḽifhasi, fhedzi arali muṋo wa fhelelwa nga ludungela, hu nga itwa mini uri u dovhe u dunge? A u tsheena mushumo, tshawo ndi u laṱwa kule wa kandekanywa nga vhathu. 14  “Inwi ni tshedza tsha shango. Muḓi u re nṱha ha thavha a u dzumbami. 15  Vhathu vha funga luvhone vha lu vhea kha tshiṱomambone, vha si lu tibe nga tshirundu uri lu vhonetshele nnḓu yoṱhe. 16  Nga hu fanaho, na tshaṋu tshedza kha tshi vhonetshele vhathu, uri vha vhone mishumo yaṋu mivhuya nahone vha ṋee Khotsi aṋu wa ṱaḓulu vhugala. 17  “Ni songo humbula uri ndo ḓela u fhelisa Mulayo kana Vhaporofita. Ndo ḓa u ḓadzisa, hu si u fhelisa, 18  ngoho ndi a ni vhudza uri hu si kale hu ḓo lovha ḽiṱaḓulu na ḽifhasi hu sa athu lovha na ‘i’ na nthihi na kuswayo kuthihi kha Mulayo u swika zwithu zwoṱhe zwi tshi ḓadzea. 19  Ngauralo, muṅwe na muṅwe ane a pfuka muthihi wa yeneyi milayo miṱuku nahone a funza vhathu u ita nga u ralo, u ḓo vhidzwa ‘muṱuku’ Muvhusoni wa ṱaḓulu. Ane a i tevhedza na u i funza, onoyo u ḓo vhidzwa ‘muhulwane’ Muvhusoni wa ṱaḓulu. 20  Ngauri ndi a ni vhudza uri arali u luga haṋu hu sa fhiri ha vhamaṅwalo na Vhafarisei, a ni nga ḓo vhuya na dzhena Muvhusoni wa ṱaḓulu. 21  “No zwi pfa uri ho ambiwa na vha kale ha pfi: ‘U songo vhulaha, fhedzi ane a vhulaha, u ḓo sengiswa khothe.’ 22  Naho zwo ralo, ndi a ni vhudza uri muṅwe na muṅwe ane a dzulela u sinyutshela wahawe u ḓo sengiswa khothe, fhedzi ane a vhuya a sema wahawe u ḓo sengiswa Khothe Khulwane, ane a vhuya a ri, ‘U tou vha tsilu!’ o eḓanwa nga u iswa muliloni wa Gehena.* 23  “Arali u tshi khou isa tshifhiwa tshau aletareni nahone musi u henefho wa humbula uri wahau o u sinyutshela, 24  sia tshifhiwa tshau henefho phanḓa ha aletare, u thome u ye u ite mulalo na wahau, nga murahu u kone u ṋekedza tshifhiwa tshau. 25  “Ṱavhanya u dzudzanye mafhungo na we a u hwelela mulandu musi u nae nḓilani, uri ane a khou hwelela a sa ḓo u kumedza kha muhaṱuli, muhaṱuli a u kumedza kha muḓinḓa nahone wa iswa dzhele. 26  Ngoho ndi a u vhudza ndi ri: A u nga ḓo vhuya wa bva henefho u sa athu lifha tshelede yoṱhe. 27  “No zwi pfa uri ho ambiwa ha pfi: ‘U songo ṱonḓola.’ 28  Fhedzi ndi a ni vhudza uri muṅwe na muṅwe ane a dzulela u lavhelesa mufumakadzi nga u mu emula, o no ita vhuṱonḓolo nae mbiluni yawe. 29  Arali ḽiṱo ḽau ḽa tsha u ḽa ḽi tshi u khakhisa, u ḽi nongole nahone u ḽi laṱe kule. Ngauri ndi khwine u tshi xelelwa nga muraḓo muthihi nṱhani ha uri muvhili wau woṱhe u poswe Gehena. 30  Zwiṅwe hafhu, arali tshanḓa tshau tsha u ḽa tshi tshi u khakhisa, u tshi tumule u tshi laṱe kule. Ngauri ndi khwine u tshi xelelwa nga muraḓo muthihi nṱhani ha uri muvhili wau woṱhe u poswe Gehena. 31  “Ho dovha ha ambiwa u pfi: ‘Ane a ṱala mufumakadzi wawe, a mu ṋee luṅwalo lwa u mu ṱala.’ 32  Huno nṋe ndi ri ane a vhuya a ṱala mufumakadzi wawe arali hu si nga mulandu wa vhupombwe, u ita uri mufumakadzi wawe a vhe muṱonḓoli, na a vhingaho mufumakadzi o ṱalwaho, u ita vhuṱonḓolo. 33  “Nahone no zwi pfa uri vha kale vho ambiwa navho ha pfi: ‘U songo ana wa fhedza wa si ite, fhedzi u fanela u ita zwe wa anela Yehova.’ 34  Hone, ndi a ni vhudza ndi ri: U songo ana na luthihi nga ḽiṱaḓulu, ngauri ndi khuluṋoni ya Mudzimu; 35  naho hu nga ḽifhasi, ngauri ndi vhukando ha milenzhe yawe; na nga Yerusalema, ngauri ndi muḓi wa Khosi khulu. 36  U songo ana nga ṱhoho yau, ngauri u nga si kone u shandula luvhudzi na luthihi lwa vha lutshena kana lutswu. 37  Itani uri ‘ee’ yaṋu i vhe ee, ‘hai’ yaṋu i vhe hai, ngauri zwi fhiraho zwenezwi zwi bva kha muvhi. 38  “No zwi pfa uri ho pfi: ‘Ḽiṱo nga ḽiṱo, ḽiṋo nga ḽiṋo.’ 39  Huno nṋe ndi ri: Ni songo hanedza muvhi, fhedzi muṅwe na muṅwe ane a ni vhanda kha shama ḽa tsha u ḽa, ni mu ṋekedze na ḽiṅwe. 40  Arali muthu a tshi ṱoḓa u u isa khothe uri a dzhie tshiambaro tshau tsha nga ngomu, u mu litshe a dzhie na tshiambaro tshau tsha nga nnḓa, 41  arali muthu a re na maanḓa a u kombetshedza u tshimbila khilomithara nthihi, u tshimbile nae khilomithara mbili. 42  U ṋee ane a u humbela, nahone u songo dzima muthu ane a ṱoḓa u hadzima kha iwe. 43  “No zwi pfa uri hu pfi: ‘U tea u funa wahau, u vhenge swina ḽau.’ 44  Naho zwo ralo, ndi a ni vhudza ndi ri: Bvelani phanḓa ni tshi funa maswina aṋu, ni rabelele vhane vha ni tovhola, 45  uri zwi vhonale uri ni vhana vha Khotsi aṋu a re ṱaḓulu, samusi a tshi ṱavhisela ḓuvha ḽawe vhavhi na vhavhuya na u nisela mvula vho lugaho na vha songo lugaho. 46  Ngauri arali ni tshi funa vhane vha ni funa, ndi malamba afhio ane na ḓo a wana? Naa vhathelisi a vha iti nga u ralo? 47  Nahone arali ni tshi lumelisa vhahaṋu fhedzi, ndi zwithu zwifhio zwi songo ḓoweleaho zwine na khou zwi ita? Naa na vha dziṅwe tshaka a vha iti nga u ralo? 48  Nga zwenezwo, ivhani vho fhelelaho samusi na Khotsi aṋu wa ṱaḓulu o fhelela.

Ṱhaluso dzi re magumoni a siaṱari

Ndi fhethu he ha vha hu tshi fhiswa mathukhwi nnḓa ha Yerusalema.