Mateo 4:1-25

4  Ndi hone muya mukhethwa u tshi isa Yesu sogani uri a lingwe nga Diabolo.  Musi o no ḓidzima zwiḽiwa maḓuvha a fuiṋa (40) na vhusiku hao, a farwa nga nḓala.  Nga tshenetsho tshifhinga, Mulingi a ḓa a amba nae a ri: “Arali u murwa wa Mudzimu, amba na haya matombo a shanduke a vhe tshinkwa.”  A fhindula a ri: “Ho ṅwalwa u pfi: ‘Muthu ha tshili nga tshinkwa fhedzi, fhedzi u tshila na nga maipfi oṱhe a bvaho mulomoni wa Yehova.’”  Diabolo a mu isa muḓini mukhethwa,* a mu imisa kha ṱhanga ya thembele  a amba nae a ri: “Arali u murwa wa Mudzimu, ḓipose fhasi; ngauri ho ṅwalwa u pfi: ‘U ḓo laedza vharuṅwa vhawe uri vha u takule nga zwanḓa zwavho, uri u si khukhulwe nga tombo.’”  Yesu a amba nae a ri: “Ho ṅwalwa u pfi: ‘U songo linga Yehova Mudzimu wau.’”  Diabolo a dovha a mu isa kha thavha ndapfu-ndapfu, a mu sumbedza mivhuso yoṱhe ya shango na vhugala hayo,  a amba nae a ri: “Hezwi zwoṱhe ndi ḓo u ṋea arali wa gwadama nahone wa nthabela.” 10  Yesu a amba nae a ri: “Ṱuwa Sathane! Ngauri ho ṅwalwa u pfi: ‘U tea u rabela Yehova Mudzimu wau, ndi ene e eṱhe ane wa tea u mu itela tshumelo khethwa.’” 11  Ndi hone Diabolo a tshi ṱutshela Yesu, nahone vharuṅwa vha ḓa vha mu shumela. 12  Musi Yesu a tshi pfa uri Yohane o farwa, a ya Galilea. 13  Zwiṅwe hafhu, musi o no ṱuwa Nazareta, a ya a dzula Kapernaume tsini na lwanzhe lu re zwiṱirikini zwa Sebuloni na Nafutali, 14  uri hu ḓadzee zwe zwa ambiwa nga muporofita Yesaya, a tshi ri: 15  “Shango ḽa Sebuloni na shango ḽa Nafutali, nḓilani i re tsini na lwanzhe, seli ha Mulambo wa Yorodane, Galilea ḽa dzitshaka! 16  Vhathu vho dzulaho swiswini vho vhona tshedza tshihulu, hone vho dzulaho dzinguni ḽi re na murunzi wa lufu, tshedza tsho vha ṱavhela.” 17  U bva nga tshenetsho tshifhinga, Yesu a thoma u huwelela a ri: “Rembuluwani, ngauri Muvhuso wa ṱaḓulu u tsini.” 18  Musi a tshi khou tshimbila tsini na Lwanzhe lwa Galilea, a vhona murathu na mukomana, Simoni a vhidzwaho Petro na Andrea murathu wawe, vha tshi khou posa mambule lwanzheni, ngauri vho vha vhe vharei vha khovhe. 19  A amba navho a ri: “Ntevheleni, ndi ḓo ni ita vharei vha vhathu.” 20  Vha mbo ḓi sia mambule avho nga u ṱavhanya, vha mu tevhela. 21  A tshi ṱuwa henefho a dovha a vhona vhaṅwe vhanna vhavhili vhe vha vha vhe murathu na mukomana, Yakobo murwa wa Sebedeo na murathu wawe Yohane, vhe tshikepeni na Sebedeo khotsi avho, vha tshi khou luka mambule avho, a vha vhidza. 22  Nga u ṱavhanya vha ṱutshela tshikepe na khotsi avho, vha mu tevhela. 23  A tshimbila u mona na ḽoṱhe ḽa Galilea, a tshi funza sinagogoni dzavho na u huwelela mafhungo maḓifha a Muvhuso na u fhodza vhathu malwadze oṱhe. 24  Bvumo ḽawe ḽa ṱanganya shango ḽoṱhe ḽa Siria; nahone vha ḓisa vhathu vhoṱhe vho tsikeledzwaho nga malwadze o fhamba-fhambanaho na maṱungu, vha re na madimoni na vha lwalaho tshifakhole na vho omaho lurumbu, a vha fhodza. 25  Nga nṱhani ha zwenezwo, gogo ḽa mu tevhela ḽi tshi bva Galilea na miḓini ya fumi* na Yerusalema na Yudea na seli ha Yorodane.

Ṱhaluso dzi re magumoni a siaṱari

Hune ha vha Yerusalema.
Dikapoli.