Mateo 27:1-66

27  Nga matsheloni, vhotshifhe vhahulu vhoṱhe na vhahulwane vha vhathu vha langana uri vha vhulahe Yesu.  Musi vho no mu vhofha, vha ṱuwa nae vha mu kumedza ha muvhusi Pilato.  Nga zwenezwo, Yudasi we a mu fheṱa, a tshi vhona uri Yesu o haṱulelwa lufu, a ḓisola a humisela maseṱha a furaru kha vhotshifhe vhahulu na kha vhahulwane,  a ri: “Ndo tshinya musi ndi tshi fheṱa malofha a si na mulandu.” Vhone vha ri: “A ri zwi dzheni. Iwe muṋe u ḓo vhona uri u ḓo zwi bva hani!”  A mbo ḓi posa aḽa maseṱha thembeleni a ṱuwa, a ya a ḓihunga.  Fhedzi vhotshifhe vhahulu vha dzhia eneo maseṱha a furaru nahone vha ri: “Mulayo a u ri tendeli ri tshi a longela mbulungeloni khethwa, ngauri o renga malofha.”  Musi vho no langana, vha renga ngao tsimu ya muvhumbi wa dzikhali u itela u vhulunga vhatsinda.  Nga zwenezwo, yeneyo tsimu na ṋamusi i kha ḓi vhidzwa u pfi ndi Tsimu ya Malofha.  Ngauralo, ho mbo ḓi ḓadzea zwe zwa ambiwa nga muporofita Yeremia, musi a tshi ri: “Vho dzhia maseṱha a furaru, mutengo we muthu a vha a tshi rengwa ngawo, we vhaṅwe vharwa vha Isiraele vha vha vho langana u Mu renga ngawo, 10  nahone vha renga ngao tsimu ya muvhumbi wa dzikhali u tendelana na zwe Yehova a nndaedza zwone.” 11  Yesu a ima phanḓa ha muvhusi, nahone muvhusi a mu vhudzisa a ri: “Naa u Khosi ya Vhayuda?” Yesu a fhindula a ri: “Ndi iwe ane a khou amba zwenezwo.” 12  Musi a tshi khou pomokwa nga vhotshifhe vhahulu na vhahulwane, a si fhindule tshithu. 13  Pilato a amba nae a ri: “Naa a u zwi pfi uri ndi zwithu zwinzhi lungafhani zwine vha u pomoka zwone?” 14  Yesu a si mu fhindule na luthihi, muvhusi a vhuya a kanuka zwihulu. 15  Nga vhuṱambo vhuṅwe na vhuṅwe, zwo vha zwo ḓowelea uri muvhusi a vha vhofhololele tshivhotshwa tshe vha vha vha tshi tshi funa. 16  Nga tshenetsho tshifhinga ho vha ho farwa na tshiṅwe tshivhotshwa tshe tsha vha tshi na bvumo ḽivhi tshine tsha pfi Baraba. 17  Musi vho kuvhangana Pilato a amba navho a ri: “Ni funa ndi tshi vhofholola nnyi kha Baraba na Yesu ane ha pfi ndi Kristo?” 18  Ngauri Pilato o vha a tshi zwi ḓivha uri vho kumedza Yesu vha tshi khou itiswa nga vivho. 19  Musi o dzula tshiduloni tsha khaṱulo, mufumakadzi wawe a ḓa a amba nae, a ri: “Hoyu muthu o lugaho u songo mu ita tshithu, ngauri ndo tambula zwihulu muloroni ṋamusi nga nṱhani hawe.” 20  Fhedzi vhotshifhe vhahulu na vhahulwane vha ṱuṱuwedza gogo uri ḽi humbele Baraba uri a vhofhololwe, Yesu a vhulahwe. 21  Muvhusi a dovha a vha vhudzisa a ri: “Kha avha vhavhili ni funa ndi tshi ni vhofhololela nnyi?” Vha fhindula vha ri: “Baraba.” 22  Pilato a amba navho a ri: “Ndi ite mini nga Yesu ane a pfi ndi Kristo?” Vhoṱhe vha ri: “Kha ombelwe kha danda!” 23  Pilato a ri: “Ndi ngani? O tshinya’ni?” Vha tou ṋaṋa u zhamba vha ri: “Kha ombelwe kha danda!” 24  Musi Pilato a tshi vhona uri zwine a khou zwi ita a zwi thusi tshithu, fhedzi zwi khou vusa bonyongo, a dzhia maḓi a ṱamba zwanḓa phanḓa ha gogo, a ri: “A thi na mulandu wa malofha a uyu munna. Ndi vhuḓifhinduleli haṋu.” 25  Vhathu vhoṱhe vha fhindula vha ri: “Malofha awe nga a vhilwe kha riṋe na kha vhana vhashu.” 26  Ndi hone a tshi vha vhofhololela Baraba, a laedza uri Yesu a rwiwe nga tshimebi nahone a mu kumedza uri a ombelwe kha danda. 27  Maswole a muvhusi a dzhia Yesu a mu isa nḓuni ya muvhusi nahone tshigwada tshoṱhe tsha maswole tsha mu kuvhanganela. 28  Vha mu bvula zwiambaro, nahone vha mu ambadza nguvho tswuku ya vhuhosi, 29  vha luka khare ya mipfa vha i vhea kha ṱhoho yawe nahone vha mu farisa luṱanga kha tshanḓa tsha u ḽa. Vha gwadama phanḓa hawe vha tshi mu goḓa vha tshi ri: “Ri a vusa, iwe Khosi ya Vhayuda!” 30  Vha mu pfela mare nahone vha dzhia luḽa luṱanga vha mu rwa ngalwo kha ṱhoho. 31  Musi vho no fhedza u mu goḓa, vha mu bvula iḽa nguvho ya vhuhosi vha mu ambadza zwiambaro zwawe zwa nga nnḓa vha kona u bva nae uri vha mu ombele kha danda. 32  Musi vha tshi tou bva vha wana munna ane a pfi Simoni wa Kirene. Vha mu kombetshedza uri a hwale danda ḽa Yesu ḽa tshengedzo. 33  Musi vha tshi swika fhethu hune ha pfi Golgotha, zwine zwa amba uri, Fhethu ha Madethele, 34  vha mu ṋea waini yo ṱanganyiswaho na zwithu zwi vhavhaho uri a nwe, musi o no thetshela a mbo ḓi hana u nwa. 35  Musi vho no mu ombela kha danda vha kovhekana zwiambaro zwawe zwa nga nnḓa nga u ita mamvaṱe, 36  nahone vha dzula henefho vha mu linda. 37  Nga nṱha ha ṱhoho yawe vho vha vho ombela nḓivhadzo ya mulandu une vha khou mu pomoka wone ine ya ri: “Hoyu ndi Yesu Khosi ya Vhayuda.” 38  O vha o ombelwa vhukati ha mavemu mavhili, ḽiṅwe ḽi nga thungo ya tshanḓa tsha u ḽa ḽiṅwe ḽi nga thungo ya tsha monde. 39  Vhafhiri vha gondo vha thoma u mu sema, vha dzungudza ṱhoho 40  nahone vha ri: “Iwe ane wa ri u ḓo thutha thembele nahone wa i fhaṱa nga maḓuvha mararu, ḓitshidze! Arali u murwa wa Mudzimu, itsa kha iḽo danda ḽa tshengedzo!” 41  Na vhotshifhe vhahulu vhe na vhamaṅwalo na vhahulwane na vhone vha thoma u mu goḓa vha tshi ri: 42  “O tshidza vhaṅwe, fhedzi ha koni u ḓitshidza! Fhedzi arali e Khosi ya Vhaisiraele, nga a tse kha iḽo danda ḽa tshengedzo ndi hone ri tshi ḓo mu tenda. 43  O vha a tshi fulufhela Mudzimu; zwino nga a mu tshidze arali A tshi mu funa, ngauri o ri, ‘Ndi Murwa wa Mudzimu.’” 44  Na aḽa mavemu e a vha o ombelwa nao a thoma u mu sema. 45  U bva nga tshifhinga tsha vhurathi* ha mbo ḓi vha na swiswi ḽihulu shangoni ḽoṱhe, u swika nga tshifhinga tsha vhuṱahe.* 46  Hu ṱoḓaho u vha nga tshifhinga tsha vhuṱahe Yesu a vhidzelela nga ipfi ḽihulu a ri: “Eli, Eli, lama sabaxthani?” zwine zwa amba uri, “Mudzimu wanga, Mudzimu wanga, wo nṱutshelela’ni?” 47  Vha tshi pfa zwenezwo, vhaṅwe vho imaho henefho vha thoma uri: “Hoyu munna u khou vhidza Elia.” 48  Nga u ṱavhanya muṅwe wavho a gidima a dzhia tshipontshi a tshi mbwandamedza kha waini i dungaho nahone a tshi ṱoma kha luṱanga uri Yesu a swiswine. 49  Fhedzi vhaṅwe vha ri: “Mu litsheni! Kha ri vhone arali Elia a tshi ḓo ḓa a mu tshidza.” [[Muṅwe munna a dzhia pfumo a mu ṱhavha kha lurumbu, nahone ha bva malofha na maḓi.]] 50  Yesu a dovha a vhidzelela nga ipfi ḽihulu, a mbo ḓi fa. 51  Labi ḽe ḽa vha ḽo tsira fhethu hukhethwa thembeleni ḽa kheruwa nga vhukati, u bva nṱha u ya fhasi, ḽifhasi ḽa dzinginyea, matombo a fhanduwa. 52  Mavhiḓa a vulea zwitumbu zwinzhi zwa vhakhethwa zwa bvela nnḓa, 53  (vhathu vhe vha vha vha tshi khou bva mavhiḓani nga murahu ha mvuwo yawe, vha dzhena muḓini mukhethwa), nahone zwa vhonwa nga vhathu vhanzhi. 54  Fhedzi mulangammbi na vhe a vha e navho vha tshi khou linda Yesu, musi vha tshi pfa mudzinginyo na u vhona zwithu zwe zwa itea, vha ofha zwihulu vha ri: “Vhukuma uyu o vha e Murwa wa Mudzimu.” 55  Zwiṅwe hafhu, ho vha hu na vhafumakadzi vhanzhi henefho vhe vha vha vho lavhelesa vhe kulenyana, vhe vha fhelekedza Yesu a tshi bva Galilea u itela u mu shumela; 56  vhaṅwe vhavho ho vha hu Maria Magdalena na Maria mme a Yakobo na Yose na mme a vharwa vha Sebedeo. 57  Nga tshikovhelelo, ha ḓa muṅwe munna wa mupfumi a bvaho Arimathia, ane a pfi Yosefa, we na ene a vha e mufunziwa wa Yesu. 58  Onoyo munna a ya ha Pilato a humbela tshitumbu tsha Yesu. Pilato a laedza uri a ṋewe tshone. 59  Nahone Yosefa a dzhia tshenetsho tshitumbu a tshi putela nga labi ḽavhuḓi ḽo kunaho, 60  a tshi vhulunga vhiḓani ḽawe, ḽe ḽa vha ḽi sa athu vhulunga muthu, ḽe ḽa vha ḽo koriwa kha tombo. Musi o no vala muṋango wa vhiḓa nga tombo ḽihulu, a mbo ḓi ṱuwa. 61  Fhedzi Maria Magdalena na muṅwe Maria vha sala vho dzula henefho, vho livhana na vhiḓa. 62  Zwenezwo zwithu zwo itea nga ḓuvha ḽa musi hu tshi khou lugiselelwa Sabatha. Nga ḓuvha ḽi tevhelaho, vhotshifhe vhahulu na Vhafarisei vha kuvhangana ha Pilato, 63  vha ri: “Muṋe washu, ri kha ḓi humbula zwe uḽa mufhuri a zwi amba a tshi kha ḓi tshila musi a tshi ri: ‘Ndi ḓo vuswa nga murahu ha maḓuvha mararu.’ 64  Ngauralo, ruma vhathu uri vha ye u linda vhiḓa u swika nga ḓuvha ḽa vhuraru, uri vhafunziwa vhawe vha si ye vha mu tswa nahone vha vhudza vhathu vha ri, ‘O vuswa vhafuni!’ uri honovhu vhufhura vhu sa fhire ha u thoma.” 65  Pilato a amba navho a ri: “Ni na vhalindi. Ṱuwani navho ni linde vhiḓa nga hune na nga kona ngaho.” 66  Ngauralo, vha mbo ḓi ya vha shatela ḽeneḽo vhiḓa uri ḽi si vulee nahone vha sia vhalindi henefho.

Ṱhaluso dzi re magumoni a siaṱari

Hu ṱoḓaho u vha nga awara ya vhufumi-mbili (12) nga masiari.
Hu ṱoḓaho u vha nga awara ya vhuraru nga masiari.