Mateo 25:1-46

25  “Muvhuso wa ṱaḓulu u ḓo fana na vhasidzana* vha fumi vhe vha bva na mbone dzavho vha ya u ṱanganedza mukwasha.  Vhaṱanu vhavho vho vha vhe matsilu nahone vhaṱanu vho ṱalifha.  Ngauri vha matsilu vho dzhia mbone dzavho, fhedzi vha si dzhie na midzio ya mapfura,  vho ṱalifhaho vho dzhia mbone dzavho khathihi na midzio ya mapfura.  Musi mukwasha a tshi lenga u swika, vhoṱhe vha thoma u kumedza vha eḓela.  Vhukati ha vhusiku, ha ṱavhiwa mukosi ha pfi: ‘Mukwasha o swika! Ibvani ni mu ṱanganedze.’  Vhasidzana avho vhoṱhe vha vuwa vha funga mbone dzavho.  Vha matsilu vha amba na vho ṱalifhaho vha ri, ‘Ri khou humbela u shelelwa mapfura ngauri mbone dzashu dzi tsini na u dzima.’  Vho ṱalifhaho vha fhindula vha ri: ‘A nga si ri eḓane roṱhe. Ndi khwine ni tshi ya na ḓirengela ha vharengisi.’ 10  Musi vho ya u renga, mukwasha a swika nahone vhasidzana vhe vha vha vho ḓilugisa vha dzhena nae munyanyani wa mbingano, vothi ḽa valiwa. 11  Nga murahu ha zwenezwo, vhasidzana vha matsilu vha vhuya vha ri, ‘Mukwasha, mukwasha, ri vulele!’ 12  A vha fhindula a ri, ‘Ngoho ndi a ni vhudza, a thi ni ḓivhi.’ 13  “Ngauralo, dzulani no fhaṱuwa ngauri a ni ḓivhi ḓuvha na tshifhinga. 14  “Zwi fana na muthu ane a ṱoḓa u fara lwendo lwa u ya shangoni ḽa kule nahone a vhidza vhalanda vhawe a vha kumedza thundu yawe. 15  Muṅwe a mu ṋea talente ṱhanu, muṅwe mbili, muṅwe nthihi, vhoṱhe a vha ṋea zwi tshi ya nga vhukoni havho, a mbo ḓi ya shangoni ḽa kule. 16  Nga u ṱavhanya we a ṋewa talente ṱhanu a ya a bindulisa dziṅwe ṱhanu. 17  Na uḽa we a ṋewa talente mbili a bindulisa dziṅwe mbili. 18  Fhedzi we a ṋewa talente nthihi a ṱuwa henefho nahone a i bwela fhasi a dzumba iḽa tshelede ya muṋe wawe. 19  “Nga murahu ha tshifhinga tshilapfu, muṋe wa vhenevho vhalanda a vhuya u itela u dzudzanya mafhungo a dzitshelede navho. 20  Ngauralo, we a ṋewa talente ṱhanu a sendela tsini a ḓisa dziṅwe talente ṱhanu, a ri, ‘Muṋe wanga, wo nṋea talente ṱhanu; zwino vhona ndo bindulisa dziṅwe ṱhanu.’ 21  Muṋe wawe a amba nae a ri: ‘Wo shuma zwavhuḓi, mulanda wavhuḓi na a fulufhedzeaho! Wo fulufhedzea kha zwiṱuku. Ndi ḓo u kumedza na zwiṅwe zwinzhi. Iḓa u takale na nṋe.’ 22  We a ṋewa talente mbili a sendela tsini a ri, ‘Muṋe wanga, wo nṋea talente mbili, zwino vhona ndo bindulisa dziṅwe mbili.’ 23  Muṋe wawe a amba nae a ri: ‘Wo shuma zwavhuḓi, mulanda wavhuḓi na a fulufhedzeaho! Wo fulufhedzea kha zwithu zwiṱuku. Ndi ḓo u kumedza na zwiṅwe zwinzhi. Iḓa u takale na nṋe.’ 24  “Mafheleloni mulanda we a vha o ṋewa talente nthihi a sendela tsini a ri: ‘Muṋe wanga, ndo vha ndi tshi zwi ḓivha uri iwe u munna wa tshiṱuhu, ane a kaṋa he a si zwale na ane a kuvhanganya zwe a si fhefhere. 25  Nga zwenezwo, ndo mbo ḓi ofha nahone nda ya nda bwela talente yau mavuni. Talente yau kheyi, dzhia zwi re zwau.’ 26  Muṋe wawe a mu fhindula a ri: ‘U mulanda muvhi wa mubva, a thi ri wo vha u tshi zwi ḓivha uri ndi kaṋa he ndi si zwale nahone ndi kuvhanganya zwe nda si fhefhere? 27  Nga zwenezwo, wo vha wo fanela u vhea tshelede yanga banngani, uri musi ndi tshi vhuya ndi kone u wana tshelede yanga i na nzwalelo. 28  “‘Nga nṱhani ha zwenezwo, mu dzhieleni talente yawe ni ṋee uḽa a re na talente dza fumi. 29  Ngauri muṅwe na muṅwe ane a vha nazwo, u ḓo ṋewa zwo engedzeaho, nahone u ḓo vha na zwinzhi, fhedzi a si na u ḓo dzhielwa na zwiṱuku-ṱuku zwine a vha nazwo. 30  Mulanda onoyo a si na mushumo ni mu kudze nnḓa swiswini. Henefho ndi hune a ḓo lila na u shenganya maṋo.’ 31  “Musi Murwa-muthu a tshi ḓa e kha vhugala hawe e na vharuṅwa vhoṱhe, ndi hone a tshi ḓo dzula kha khuluṋoni yawe ya vhugala. 32  Tshaka dzoṱhe dzi ḓo kuvhanganywa phanḓa hawe, nahone u ḓo khethekanya vhathu, vhunga mulisa a tshi khetha nngu kha mbudzi. 33  Nngu u ḓo dzi vhea thungo ya tshanḓa tsha u ḽa nahone mbudzi a dzi vhea thungo ya tsha monde. 34  “Ndi hone Khosi i tshi ḓo amba na vha re thungo ya tshanḓa tsha u ḽa ya ri: ‘Iḓani inwi no fhaṱutshedzwaho nga Khotsi anga, iḽani ifa ḽa Muvhuso wo lugiselwaho inwi u bva tshee shango ḽa sikwa. 35  Ngauri ndo farwa nga nḓala na nṋea zwiḽiwa; ndo farwa nga ḓora na nṋea maḓi. Ndo vha ndi mutsinda inwi na nṱanganedza nga mafunda; 36  ndi fhedzi na nyambadza. Ndo lwala na nṱhogomela. Ndo vha ndi dzhele na ḓa na nṱola.’ 37  Nga zwenezwo, vhavhuya vha ḓo mu fhindula vha ri: ‘Murena, ndi lini he ra u vhona u na nḓala ra u ṋea zwiḽiwa kana u na ḓora ra u ṋea maḓi? 38  Ndi lini he ra u vhona u mutsinda ra u ṱanganedza; kana u na tsiku ra u ambadza? 39  Ndi lini he ra u vhona u tshi khou lwala kana u dzhele ra ḓa ra u ṱola?’ 40  Khosi i ḓo vha fhindula ya ri, ‘Ngoho ndi a ni vhudza ndi ri: Zwe na ita muthihi wa vhenevha vhahashu vhaṱuku-ṱuku, no zwi ita kha nṋe.’ 41  “Nga murahu ha zwenezwo, u ḓo amba na vha re thungo ya tshanḓa tshawe tsha monde a ri: ‘Nṱutsheleni inwi no semiwaho, ni ye muliloni u sa dzimiho na lini na lini wo lugiselelwaho Diabolo na vharuṅwa vhawe. 42  Ngauri ndo farwa nga nḓala, fhedzi ni si nṋee zwiḽiwa, ndo farwa nga ḓora, fhedzi ni si nṋee maḓi. 43  Ndo vha ndi mutsinda, fhedzi ni si nṱanganedze; ndi na tsiku, fhedzi ni si nnyambadze; ndi tshi khou lwala na musi ndi dzhele ni si nṱhogomele.’ 44  Ndi hone vha tshi ḓo fhindula vha ri: ‘Murena, ndi lini he ra u vhona u na nḓala kana u na ḓora kana u mutsinda kana u na tsiku kana u tshi khou lwala kana u dzhele nahone ri si u itele tshithu?’ 45  Ndi hone a tshi ḓo vha fhindula a ri, ‘Ngoho ndi a ni vhudza ndi ri: Zwe na si ite muthihi wa vhenevha vhaṱuku-ṱuku, a no ngo zwi ita kha nṋe.’ 46  Nahone vhenevho vha ḓo fheliswa tshoṱhe, fhedzi vho lugaho vha ḓo wana vhutshilo vhu sa fheli.”

Ṱhaluso dzi re magumoni a siaṱari

Ipfi ḽa Lugerika ḽi ambela kha muthu wa tshisadzini a sa athu ita zwa vhudzekani.