Mateo 23:1-39

23  Ndi hone Yesu a tshi amba na gogo na vhafunziwa vhawe, a ri:  “Vhamaṅwalo na Vhafarisei vho ḓivhea vhuimoni ha Mushe.  Nga zwenezwo, zwoṱhe zwine vha ni vhudza, ni zwi tevhedze, fhedzi ni songo vha edzisa, ngauri vha sokou amba, fhedzi vha si zwi ite.  Milayo yavho i nga mihwalo i lemelaho ine vha i hwesa vhathu kha mahaḓa, ngeno vhone vha sa funi u i takula na nga munwe zwawo.  Mishumo yavho yoṱhe ine vha i ita, vha i itela u vhonwa nga vhathu, vha ṱanḓavhudza zwibogisi zwi re na maṅwalo zwine vha zwi vhofhelela kha phanḓa dzavho u itela u ḓitsireledza nahone vha engedza mashaphu a re kha phendelo dza zwiambaro zwavho.  Vha funa u dzula zwiduloni zwa phanḓa zwimimani na dzisinagogoni  na u lumeliswa mimakete na u vhidzwa u pfi Rabi* nga vhathu.  Fhedzi inwi, ni songo tenda u vhidzwa Rabi, ngauri Mufunzi waṋu ndi muthihi, inwi noṱhe ni vharathu na vhakomana.  Zwiṅwe hafhu, ni songo vhidza naho e nnyi kha ḽifhasi na ri ndi khotsi, Khotsi aṋu ndi muthihi fhedzi, ndi Wa ṱaḓulu. 10  Ni songo tenda u vhidzwa vharangaphanḓa ngauri Murangaphanḓa waṋu ndi muthihi, ndi Kristo. 11  Fhedzi ane a vha muhulwanesa kha inwi u fanela u vha mushumeli waṋu. 12  Naho e nnyi ane a ḓihudza u ḓo ṱukufhadzwa, naho e nnyi ane a ḓiṱukufhadza u ḓo hudzwa. 13  “Khombo inwi vhamaṅwalo na Vhafarisei, vhadzia-muhoyo ndi inwi! ngauri ni thivhela vhathu uri vha si dzhene Muvhusoni wa ṱaḓulu, ngauri inwi a ni dzheni, na vha ṱoḓaho u dzhena ni a vha dzivhisa. 14 * —— 15  “Khombo inwi vhamaṅwalo na Vhafarisei, vhadzia-muhoyo ndi inwi! ngauri ni buḓekanya lwanzhe na mashango ni tshi ṱoḓa ṱhunḓu* nthihi uri ni i rembulusele kha lutendo lwaṋu, nahone musi yo no rembuluwa, na i ita uri i fanelee u ya Gehena* luvhili u ni fhira. 16  “Khombo inwi vhasumbedzi vha nḓila vho pofulaho, vhane na ri, ‘Arali muthu a ana nga thembele, a hu na mulandu, fhedzi arali muthu a ana nga musuku wa thembeleni, u a kombetshedzea u ita zwe a ana.’ 17  Matsilu o pofulaho ndi inwi! Ndi tshifhio tshine tsha vha tsha ndeme, ndi musuku kana ndi thembele ye ya ita uri musuku u vhe mukhethwa? 18  Ni dovha na ri, ‘Arali muthu a ana nga aletare, a hu na mulandu, fhedzi arali a ana nga tshifhiwa tshi re khayo, u a kombetshedzea u ita zwe a ana.’ 19  Mabofu ndi inwi! Ndi tshifhio tshine tsha vha tsha ndeme, naa ndi tshifhiwa kana ndi aletare ine ya ita uri tshifhiwa tshi vhe tshikhethwa? 20  Ngauralo, ane a ana nga aletare u ana ngayo na nga zwoṱhe zwi re khayo, 21  na ane a ana nga thembele u ana ngayo na nga ane a dzula khayo, 22  na ane a ana nga ḽiṱaḓulu u ana nga khuluṋoni ya Mudzimu na nga ane a dzula khayo. 23  “Khombo inwi vhamaṅwalo na Vhafarisei, vhadzia-muhoyo ndi inwi! ngauri ni bvisa tshafumi kha minthi na dili na khumini,* fhedzi no nyadza mafhungo a ndeme a Mulayo, a ngaho khaṱulokwayo, khathutshelo na u fulufhedzea. Zwenezwi zwithu zwo vha zwo fanela u itwa, fhedzi hu si uri hu nyadziwe zwiṅwe. 24  Vhasumbedzi vha nḓila vho pofulaho, vhane vha miṋa lunyunyu vha mila gamela! 25  “Khombo inwi vhamaṅwalo na Vhafarisei, vhadzia-muhoyo ndi inwi! ngauri ni ṱanzwa tshinwelo na ndilo nga nnḓa, fhedzi nga ngomu ho ḓala vhupangwa na u ḓitakadza nga nḓila yo kalulaho. 26  Vhafarisei vho pofulaho, thomani u ṱanzwa tshinwelo na ndilo nga ngomu, u itela uri na nga nnḓa hu kune. 27  “Khombo inwi vhamaṅwalo na Vhafarisei, vhadzia-muhoyo ndi inwi! ngauri ni fana na mavhiḓa o nakiswaho, ane a naka nga nnḓa ngeno nga ngomu ho ḓala marambo a vho faho na tshika dzoṱhe. 28  Nga hu fanaho, ni vhonala no luga phanḓa ha vhathu, fhedzi nga ngomu no ḓala muhoyo na vhuvhi. 29  “Khombo inwi vhamaṅwalo na Vhafarisei, vhadzia-muhoyo ndi inwi! ngauri ni fhaṱa mavhiḓa a vhaporofita na nakisa mavhiḓa a vhavhuya, 30  nahone ni ri, ‘Arali ho vha hu riṋe misini ya vhomakhulukuku washu, ndi musi ri songo ṱanganela navho kha u shulula malofha a vhaporofita.’ 31  Ngauralo, ni khou ḓiṱanzielela uri ni vharwa vha vho vhulayaho vhaporofita. 32  Ndi zwone, ṱhaphudzani zwe vhomakhulukuku waṋu vha zwi siedza. 33  “Dziṋowa ndi inwi, ni vhana vha mavuluvulu, ni ḓo ponyoka hani khaṱulo ya Gehena? 34  Ndi zwine nda ri ndo ni rumela vhaporofita na vhanna vha vhuṱali na vhagudisi. Vhaṅwe vhavho ni ḓo vha vhulaha na u vha ombela kha danda, nahone vhaṅwe vhavho na vha rwa sinagogoni dzaṋu na vha tovhola u bva kha muṅwe muḓi u ya kha muṅwe muḓi, 35  uri malofha oṱhe a vhavhuya o shululwaho kha ḽifhasi a vhilwe kha inwi, u bva kha malofha a Abele u swika kha malofha a Sakaria murwa wa Berekia, we na mu vhulaha vhukati ha thembele na aletare. 36  Ngoho ndi a ni vhudza ndi ri: Zwoṱhe zwenezwi zwi ḓo ḓela wonoyu murafho. 37  “Hee Yerusalema, Yerusalema, iwe muvhulahi wa vhaporofita na mukanḓi nga matombo wa vho rumiwaho ha iwe—ndi lungana ndi tshi ri ndi kuvhanganye vhana vhau sa khuhu i tshi kuvhanganya zwikukwana zwayo fhasi ha phapha dzayo! Fhedzi inwi na hana. 38  Mudzimu o ṱutshela nnḓu yaṋu. 39  Ngauri ndi a ni vhudza ndi ri: A ni tsha ḓo dovha na mmbona u bva zwino u vhuya u swika ni tshi ri, ‘Nga hu rendwe a ḓaho nga dzina ḽa Yehova!’”

Ṱhaluso dzi re magumoni a siaṱari

Ndi dzina ḽa u hulisa mufunzi wa Muyuda.
Sedzani ṱhaluso i re magumoni a siaṱari i re kha Mat 17:21.
Kana “vho ṱanganedzaho Tshiyuda.”
Ndi fhethu he ha vha hu tshi fhiswa mathukhwi nnḓa ha Yerusalema.
Ndi zwimela zwiṱuku zwine zwa ṱavhiwa zwine vhathu vha zwi shumisa uri zwiḽiwa zwi vhe na muthetshelo.