Mateo 22:1-46

22  Yesu a dovha a vha fhindula nga zwifanyiso, a ri:  “Muvhuso wa ṱaḓulu u fana na khosi yo itelaho murwa wayo munyanya wa mbingano.  Ya ruma vhalanda vhayo uri vha vhidze vhoṱhe vho rambiwaho munyanyani wa mbingano, fhedzi vha hana u ḓa.  Ya dovha ya ruma vhaṅwe vhalanda, ya ri, ‘Vhudzani vho rambiwaho ni ri: “Ndo lugiselela zwiḽiwa zwanga, phulu dzanga na zwifuwo zwo nonaho ndo zwi ṱhavha, zwithu zwoṱhe zwo luga. Iḓani munyanyani wa mbingano.”’  Fhedzi vha si zwi londe, muṅwe a ya tsimuni yawe, muṅwe a ya binduni ḽawe;  vhaṅwe vha fara vhalanda vhawe vha vha tambudza nahone vha vha vhulaha.  “Fhedzi Khosi ya sinyuwa, ya ruma mmbi yayo uri i ye i vhulahe vhaḽa vhavhulahi na u fhisa muḓi wavho.  Ya amba na vhalanda vhayo ya ri, ‘Ndi ngoho uri ndo dzudzanya munyanya wa mbingano, fhedzi vho rambiwaho vho vha vha sa fanelei.  Nga zwenezwo, iyani nḓilani dzine dza bvela nnḓa ha muḓi, ni rambe muṅwe na muṅwe ane na mu wana uri a ḓe munyanyani wa mbingano.’ 10  Vhalanda vhenevho vha ya dzinḓilani vha ramba vhoṱhe vhe vha vha wana, vhavhi na vhavhuya; nnḓu ya munyanya wa mbingano ya ḓala nga vho dzulaho zwiḽiwani. 11  “Musi khosi i tshi ḓa u sedza vhaeni ya vhona munna we a vha a songo ambara zwiambaro zwa munyanya. 12  Ya amba nae ya ri, ‘Wahashu, wo dzhena hani fhano u songo ambara zwiambaro zwa munyanya?’ Ene a kundwa u fhindula. 13  Ndi hone khosi i tshi vhudza vhalanda vhayo ya ri, ‘Mu vhofheni zwanḓa na milenzhe ni mu kudze nnḓa swiswini. Henefho ndi hune a ḓo lila na u shenganya maṋo.’ 14  “Ngauri ndi vhanzhi vho rambiwaho, fhedzi vho nangiwaho a si vhanzhi.” 15  Vhafarisei vha ḓiṱutshela vha ya u mu langana uri vha mu fashe nga zwine a zwi amba. 16  Ngauralo, vha ruma vhafunziwa vhavho, khathihi na vhatevheli vha Herode, vha ri: “Mufunzi, ri a zwi ḓivha zwa uri a u zwifhi nahone u funza nḓila ya ngoho ya Mudzimu, a u ṱoḓi u takadza muthu, ngauri a u sedzi mbonalo ya muthu. 17  Ri vhudze, u zwi vhona hani? Naa zwo tendelwa u bvisela Kesare* muthelo kana a zwo ngo tendelwa?” 18  Nge Yesu a vha a tshi ḓivha vhuvhi havho, a amba navho a ri: “Vhadzia-muhoyo ndi inwi, ndi ngani ni tshi nndinga? 19  Ntsumbedzeni tshelede ine na thela ngayo.” Vha mu ḓisela dinari. 20  A vha vhudzisa a ri: “Tshifanyiso itshi na dzina iḽi ndi zwa nnyi?” 21  Vhone vha ri: “Ndi zwa Kesare.” A amba navho a ri: “Kesare mu ṋeeni zwi re zwa Kesare, Mudzimu ni mu ṋee zwi re zwa Mudzimu.” 22  Musi vha tshi pfa zwenezwo vha mangala, vha ṱuwa vha mu sia. 23  Nga ḽeneḽo ḓuvha, ha ḓa Vhasadukei vhane vha amba uri a hu na mvuwo vha mu vhudzisa vha ri: 24  “Mufunzi, Mushe o ri: ‘Arali munna a fa a si na ṅwana, murathu wawe u fanela u vhinga onoyo mufumakadzi uri a bebele mukomana wawe vhana.’ 25  Huno ho vha hu na vhanna vha sumbe, vhana vha muthu; wa u thoma a vhinga, nahone a lovha a si na ṅwana, a siela wa vhuvhili mufumakadzi wawe. 26  Ha itea zwi fanaho na kha wa vhuvhili na wa vhuraru vha fa vha si na vhana, u vhuya u swika na kha wa vhusumbe a tshi fa a si na ṅwana. 27  Mafheleloni na mufumakadzi a fa. 28  Zwino musi vhafu vha tshi vuswa, mufumakadzi uyo u ḓo vha wa ufhio kha avho vha sumbe? Ngauri vhoṱhe vho vha vho mu vhinga.” 29  Yesu a vha fhindula a ri: “No khakha, ngauri a ni ḓivhi Maṅwalo na maanḓa a Mudzimu, 30  musi vhafu vha tshi vuswa, vhanna a vha nga vhingi na vhafumakadzi a vha nga vhingwi, fhedzi vha ḓo nga vharuṅwa vha ngei ṱaḓulu. 31  Naa a no ngo vhala zwe Mudzimu a ni vhudza zwone malugana na u vuswa ha vhafu, musi a tshi ri: 32  ‘Ndi nṋe Mudzimu wa Abrahamu, Mudzimu wa Isaka, Mudzimu wa Yakobo’? A si Mudzimu wa vho faho, fhedzi ndi wa vha tshilaho.” 33  Musi vhathu vha tshi zwi pfa, vha mangala pfunzo yawe. 34  Musi Vhafarisei vha tshi pfa uri Yesu o kunda Vhasadukei, vha vhumba tshigwada. 35  Muṅwe wavho ane a vha muḓivhi wa Mulayo a mu linga nga u mu vhudzisa uri: 36  “Mufunzi, Mulayo muhulwanesa kha yoṱhe ndi ufhio?” 37  A fhindula a ri: “‘U tea u funa Yehova Mudzimu wau nga mbilu yau yoṱhe na nga zwoṱhe zwine wa vha zwone na nga muhumbulo wau yoṱhe.’ 38  Ndi yone ndaela ya ndeme vhukuma. 39  Ya vhuvhili ine ya fana na yeneyo ndi heyi: ‘U tea u funa wahau vhunga u tshi ḓifuna.’ 40  Mulayo woṱhe na Vhaporofita zwo katelwa kha dzenedzi ndaela mbili.” 41  Musi Vhafarisei vho kuvhangana, Yesu a vha vhudzisa a ri: 42  “Ni humbula mini nga ha Kristo? Ndi murwa wa nnyi?” Vha mu fhindula vha ri: “Ndi murwa wa Davida.” 43  A amba navho a ri: “Zwo ḓa hani uri musi Davida o hevhedzwa a mu vhidze Murena musi a tshi ri, 44  ‘Yehova o amba na Murena wanga a ri: “Dzula thungo ya tshanḓa tshanga tsha u ḽa, ndi vhuye ndi ite maswina au vhukando ha milenzhe yau”’? 45  Arali Davida o mu vhidza Murena, zwi ḓa hani uri a vhe murwa wawe?” 46  A ho ngo vha na muthu we a kona u mu fhindula, kana muthu we a mu vhudzisa mbudziso naho i ifhio u bva nga ḽeneḽo ḓuvha.

Ṱhaluso dzi re magumoni a siaṱari

Khosi.