Mateo 21:1-46

21  Musi vha tshi vho sendela tsini na Yerusalema nahone vho swika Betfage Thavhani ya Miṱwari, Yesu a ruma vhafunziwa vhavhili,  a vha vhudza a ri: “Iyani muḓanani u re afho phanḓa haṋu, musi ni tshi swika ni ḓo wana mbongola yo vhofhiwa na mbongolana yayo; ni dzi vhofholole ni dzi ḓise ha nṋe.  Arali muṅwe muthu a amba na inwi, ni mu vhudze uri, ‘Murena u khou dzi ṱoḓa.’ Onoyo muthu u ḓo ni tendela ni tshi dzi dzhia nga u ṱavhanya.”  Zwenezwo zwo itea uri hu ḓadzee zwe zwa ambiwa nga muporofita, a tshi ri:  “Vhudzani ṅwananyana wa Tsioni ni ri: ‘Vhona! Khosi yau i khou ḓa ha iwe, nga muya wa u vuḓa yo ṋamela mbongolana, ṅwana wa tshifuwo tshine tsha hwala mihwalo.’”  Vhafunziwa vha ṱuwa vha ita zwe Yesu a vha laedza.  Vha ḓisa mbongola na mbongolana yayo, vha kapea zwiambaro zwavho zwa nga nnḓa khadzo, ene a kona u ṋamela.  Nahone vhathu vhanzhi vha adza zwiambaro zwavho zwa nga nnḓa nḓilani, ngeno vhaṅwe vha tshi khou rema matavhi vha tshi a adza nḓilani.  Gogo ḽe ḽa vha ḽo mu ranga phanḓa na u mu sala murahu ḽa bvela phanḓa ḽi tshi vhidzelela ḽa ri: “Ri rabela uri u tshidze Murwa wa Davida! Nga hu rendwe a ḓaho nga dzina ḽa Yehova! Ri rabela uri u mu tshidze, u ngei ṱaḓulu-ṱaḓulu!” 10  Musi a tshi dzhena Yerusalema, ha vuwa vilili muḓini woṱhe, vhathu vha ri: “Ndi nnyi uyu?” 11  Gogo ḽo vha ḽi tshi dzulela uri: “Hoyu ndi Yesu wa muporofita a bvaho Galilea muḓini wa Nazareta!” 12  Yesu a dzhena thembeleni a pandela vhoṱhe vhe vha vha vha tshi khou renga na u rengisa henefho, nahone a thudzekanya maṱafula a vhatshintshi vha tshelede na bannga dza vhe vha vha vha tshi khou rengisa maivha. 13  A amba navho a ri: “Ho ṅwalwa u pfi, ‘Nnḓu yanga i ḓo pfi nnḓu ya thabelo,’ fhedzi inwi ni i ita bako ḽa mavemu.” 14  Vho pofulaho na vho holefhalaho vha ḓa khae thembeleni nahone a vha fhodza. 15  Vhotshifhe vhahulu na vhamaṅwalo vha tshi vhona zwithu zwi mangadzaho zwe a zwi ita na u vhona vhatukana vha tshi khou vhidzelela thembeleni vha tshi ri: “Ri a u rabela uri u tshidze Murwa wa Davida!” vha sinyuwa 16  vha amba nae vha ri: “Naa u khou zwi pfa zwine avha vha amba zwone?” Yesu a vha fhindula a ri: “Ee. Naa a ni athu vhuya na vhala izwi: ‘Ndi ḓo ita uri milomo ya vhana na ya vhushie i nthende’?” 17  Ndi hone a tshi vha sia henefho a ya muḓini wa Bethania nahone a fhedza vhusiku e henefho. 18  Nga matsheloni-tsheloni musi a tshi khou vhuyelela muḓini, a mbo ḓi farwa nga nḓala. 19  A vhona muhuyu henefho tsini na nḓila a ya khawo, a wana u songo aṋwa u na maṱari fhedzi, a amba nawo a ri: “U songo tsha dovha wa aṋwa mitshelo na lini na lini.” Wonoyo muhuyu wa mbo ḓi oma nga u ṱavhanya. 20  Musi vhafunziwa vha tshi vhona zwenezwo, vha mangala vha ri: “Zwo ḓa hani uri muhuyu u ome nga u ṱavhanya?” 21  Yesu a vha fhindula a ri: “Ngoho ndi a ni vhudza ndi ri: Arali ni na lutendo nahone ni sa timatimi, a ni nga ḓo ita zwe nda zwi ita kha wonoyu muhuyu fhedzi, fhedzi ni ḓo dovha na vhudza thavha iyi na ri, ‘Takuwa u ḓipose lwanzheni,’ zwa itea nga u ralo. 22  Zwoṱhe zwine na zwi humbela nga thabelo, ni na lutendo, ni ḓo zwi wana.” 23  Musi o no dzhena thembeleni, vhotshifhe vhahulu na vhahulwane vha vhathu vha ḓa khae musi a tshi khou funza vha ri: “U ita izwi zwithu nga maanḓa a nnyi? Nahone ndi nnyi o u ṋeaho eneo maanḓa?” 24  Yesu a vha fhindula a ri: “Na nṋe ndi ḓo ni vhudzisa tshithu tshithihi. Arali na mphindula, ndi ḓo ni vhudza uri zwenezwi zwithu ndi zwi ita nga maanḓa a nnyi. 25  Naa maanḓa a Yohane a u lovhedza o vha a tshi bva ngafhi? Naa o vha a tshi bva ṱaḓulu kana kha vhathu?” Vha thoma u amba nga tshavho vha ri: “Arali ra amba uri, ‘A bva ṱaḓulu,’ u ḓo ri vhudzisa a ri, ‘Ndi ngani ni songo mu tenda?’ 26  Arali ra amba uri, ‘A bva kha vhathu,’ ri ofha vhathu, ngauri vhoṱhe vha dzhia Yohane e muporofita.” 27  Vha fhindula Yesu vha ri: “A ri ḓivhi.” Na ene a vha fhindula a ri: “Na nṋe a thi nga ni vhudzi uri ndi ita zwenezwi zwithu nga maanḓa a nnyi. 28  “Ni zwi vhona hani? Muṅwe munna o vha e na vhana vhavhili. A ya kha mukomana a ri, ‘Ṅwananga, iya u shume tsimuni ya minḓirivhe ṋamusi.’ 29  A tshi fhindula a ri, ‘Ndi ḓo ita nga u ralo khotsi anga,’ fhedzi a si ye. 30  A ya kha murathu, a mu vhudza zwi fanaho. A fhindula a ri, ‘A thi nga yi.’ Nga murahu a ḓisola nahone a ya. 31  Ndi ufhio kha vhenevho vhavhili we a ita zwi funwaho nga khotsi awe?” Vha fhindula vha ri: “Ndi wa vhuvhili.” Yesu a amba navho a ri: “Ngoho ndi a ni vhudza uri vhathelisi na dziphombwe vha ḓo dzhena u thoma Muvhusoni wa Mudzimu. 32  Ngauri Yohane o ḓa ha inwi a ni funza nḓila ya u luga, fhedzi inwi ni si mu tende. Naho zwo ralo, vhathelisi na dziphombwe vho mu tenda, inwi naho no vhona zwe a ita, a no ngo ḓisola na mu tenda. 33  “Ipfani tshiṅwe tshifanyiso: Ho vha hu na muṅwe munna, we a vha e muṋe wa tsimu, o ṱavha minḓirivhe, a ita luhura u mona nayo, a bwa hune a ḓo fhonḓela hone nḓirivhe nahone a fhaṱa tshiingamo, a i kumedza vhalimi, a ya shangoni ḽa kule. 34  Musi tshifhinga tsha u fula nḓirivhe tshi tshi swika, a rumela vhalanda vhawe kha vhalimi uri a wane nḓirivhe dzawe. 35  Hone vhalimi vha fara vhalanda vhawe, muṅwe vha mu rwa, muṅwe vha mu vhulaha, muṅwe vha mu kanḓa nga matombo. 36  A dovha a ruma vhaṅwe vhalanda, vha fhiraho vha u thoma, fhedzi vha vha ita zwi fanaho na zwa vhenevho. 37  A fhedzisela nga u ruma murwa wawe, a ri, ‘Vha ḓo ṱhonifha murwa wanga.’ 38  Musi vhalimi vha tshi vhona murwa, vha amba nga tshavho vha ri, ‘Uyu ndi ene muḽaifa; kha ri mu vhulahe uri ri wane ifa ḽawe.’ 39  Vha mu fara vha mu khurumedzela nnḓa ha tsimu ya minḓirivhe vha mu vhulaha. 40  Ngauralo, musi muṋe wa tsimu ya minḓirivhe a tshi ḓa, u ḓo ita mini nga vhenevho vhalimi?” 41  Vha mu fhindula vha ri: “U ḓo vha vhulaha lwa tshiṱuhu ngauri ndi vhavhi, nahone a kumedza tsimu yawe ya minḓirivhe vhaṅwe vhalimi, vhane vha ḓo mu ṋea mitshelo nga tshifhinga tshayo.” 42  Yesu a amba navho a ri: “Naa a ni athu vhuya na vhala Maṅwaloni uri: ‘Tombo ḽe ḽa laṱwa nga vhafhaṱi ndi ḽone ḽe ḽa vha thikho ya tshifhaṱo, na uri ḽi bva ha Yehova nahone ḽi a mangadza maṱoni ashu’? 43  Ndi ngazwo ndi tshi ri: Ni ḓo dzhielwa Muvhuso wa Mudzimu nahone wa ṋewa lushaka lune lwa ḓo aṋwa mitshelo yawo. 44  Muthu a welaho nṱha ha ḽeneḽo tombo u ḓo vunḓekana. Ane ḽa mu wela, ḽi ḓo mu pwaṱula.” 45  Musi vhotshifhe vhahulu na Vhafarisei vha tshi pfa zwifanyiso zwawe, vha zwi ṱhogomela uri o vha a tshi khou amba nga havho. 46  Naho vho vha vha tshi ṱoḓa u mu fara, vho vha vha tshi ofha vhathu ngauri vho vha vha tshi mu dzhia e muporofita.

Ṱhaluso dzi re magumoni a siaṱari