Mateo 2:1-23

2  Musi Yesu o no bebwa ngei Betlehema shangoni ḽa Yudea, misini ya khosi Herode, vhaḓivhi vha ṋaledzi vha bvaho Vhubvaḓuvha vha ḓa Yerusalema,  vha ri: “Khosi yo bebwaho ya Vhayuda i ngafhi? Ngauri ro vhona ṋaledzi yawe musi ri Vhubvaḓuvha, zwino ro ḓa u mu losha.”  Musi Khosi Herode a tshi pfa zwenezwo, a mbo sinyuwa na vhoṱhe vha re Yerusalema.  A kuvhanganya vhotshifhe vhahulu vhoṱhe na vhamaṅwalo, a thoma u vha vhudzisa he Kristo a pfi u ḓo bebwa hone.  Vha mu vhudza vha ri: “Ngei Betlehema kha ḽa Yudea, ngauri yeneyo ndi nḓila ye muporofita a ṅwala ngayo a ri:  ‘Na iwe Betlehema shango ḽa Yuda, na kathihi a si iwe muḓi muṱuku kha vhavhusi vha Yuda; ngauri kha iwe hu ḓo bebwa muvhusi ane a ḓo lisa vhathu vhanga vha Isiraele.’”  Herode a vhidzela tshiphirini vhaḓivhi vha ṋaledzi nahone a vha vhudzisesa nga ha tshifhinga tshee ṋaledzi ya thoma u vhonala ngatsho.  Musi a tshi vha ruma Betlehema o ri: “Tshimbilani ni ṱoḓisise hune ṅwana a vha hone, musi ni tshi mu wana ni mmbudze-vho, uri na nṋe ndi ye ndi mu loshe.”  Musi vho no pfa zwe khosi ya amba vha ṱuwa, hone ṋaledzi ye vha i vhona musi vhe Vhubvaḓuvha ya vha ranga phanḓa u swika i tshi ima nga nṱha ha he ṅwana a vha e hone. 10  Vha tshi vhona ṋaledzi, vha takala zwihulu. 11  Musi vha tshi dzhena nḓuni vha vhona ṅwana e na Maria mme awe, vha wa nga magona, vha mu losha. Vha dovha vha bvisa madzanga avho nahone vha mu ṋea zwifhiwa zwa musuku na miri ya zwioro na ṋonzhe dza mishonga. 12  Nga nṱhani ha uri vho vha vho ṋewa tsevho nga Mudzimu muloroni uri vha si humele ha Herode, vha mbo ḓi ṱuwa vha vhuyelela shangoni ḽa havho nga iṅwe nḓila. 13  Musi vho no ṱuwa, Yosefa a vhona muruṅwa wa Yehova miloroni, a tshi ri: “Takuwa u dzhie ṅwana na mme awe u shavhele Egipita, nahone u dzule henefho u swika ndi tshi ḓo u vhudza tshifhinga tsha u vhuya; ngauri hu si kale Herode u ḓo ṱoḓa ṅwana uri a mu vhulahe.” 14  A vuwa vhusiku a dzhia ṅwana na mme awe, a ya Egipita, 15  a dzula henefho u swika Herode a tshi fa, uri hu ḓadzee zwe zwa ambiwa nga Yehova a tshi shumisa muporofita wawe, a ri: “Ndo vhidza murwa wanga e ngei Egipita.” 16  Musi Herode a tshi ṱhogomela uri vhaḓivhi vha ṋaledzi vho mu fhura, a sinyuwa zwihulu, a ruma vhaḓinḓa uri vha vhulahe vhatukana vhoṱhe vha miṅwaha mivhili na vha re nga fhasi ha miṅwaha yeneyo vha ngei Betlehema na kha zwoṱhe zwiṱiriki zwa nga tsini, u tendelana na tshifhinga tshee a tshi vhudzisesa kha vhaḓivhi vha ṋaledzi. 17  Nga zwenezwo, ha ḓadzea zwo ambiwaho nga muporofita Yeremia, a tshi ri: 18  “Ho pfala tshililo ngei Rama, mukosi wa tshililo tshihulu, Rahele a tshi lilela vhana vhawe, o vha a sa ṱoḓi u fhumudzwa, ngauri vho fa.” 19  Musi Herode o no fa, Yosefa a vhona muruṅwa wa Yehova miloroni musi e ngei Egipita 20  a tshi ri: “Vuwa u dzhie ṅwana na mme awe u ye shangoni ḽa Isiraele, ngauri vhane vha ṱoḓa u vhulaha ṅwana vho fa.” 21  A vuwa a dzhia ṅwana na mme a ṅwana, a ya shangoni ḽa Isiraele. 22  A tshi pfa uri Arikelao u khou vhusa Yudea vhudzuloni ha khotsi awe Herode, a ofha u ya henengei. Musi o no ṋewa tsevho nga Mudzimu muloroni, a ya shangoni ḽa Galilea, 23  a dzula muḓini une wa pfi Nazareta uri hu ḓadzee zwo ambiwaho nga vhaporofita vha tshi ri: “U ḓo pfi Munazareta.”

Ṱhaluso dzi re magumoni a siaṱari