Mateo 12:1-50

12  Nga tshenetsho tshifhinga, Yesu o mbo ḓi fhira nga masimuni a goroi nga Sabatha. Vhafunziwa vhawe vho vha vho farwa nga nḓala nahone vha thoma u ṱhukhula ṱhotshe dza goroi vha ḽa.  Musi Vhafarisei vha tshi zwi vhona, vha amba nae vha ri: “Vhona! Vhafunziwa vhau vha khou ita zwithu zwi songo tendelwaho nga Sabatha.”  A amba navho a ri: “Naa a ni athu vhala zwe Davida na vhanna vhe a vha e navho vha zwi ita musi vho farwa nga nḓala?  Musi a tshi dzhena nḓuni ya Mudzimu a ḽa zwinkwa zwo ṋekedzwaho Mudzimu, zwe ene na vhanna vhe a vha e navho vha vha vha songo tendelwa u zwi ḽa, fhedzi zwo tea u ḽiwa nga vhotshifhe vhe vhoṱhe?  Naa a ni athu vhala Mulayoni uri nga Sabatha vhotshifhe thembeleni vha dzhia Sabatha sa ine ya sa vhe khethwa nahone vha ḓi dzula vha si na mulandu?  Fhedzi ndi a ni vhudza uri ane a vha wa ndeme u fhira thembele u fhano.  Naho zwo ralo, arali ni vhe no pfesesa zwine zwenezwi zwa amba zwone musi hu tshi pfi, ‘Ndi ṱoḓa khathutshelo hu si tshiṱhavhelo,’ ndi musi ni songo haṱula vha si na mulandu.  Ngauri Murwa-muthu ndi ene Murena wa Sabatha.”  Musi o no ṱuwa henefho fhethu, a ya a dzhena sinagogoni dzavho, 10  ha ḓa munna o omaho tshanḓa! Nga zwenezwo, vha mu vhudzisa vha ri, “Naa u fhodza nga Sabatha zwo tendelwa?” vha tshi vhudzisa nga u ralo vha tshi itela u mu vhona mulandu. 11  A vha vhudzisa a ri: “Ndi nnyi kha inwi ane a vha na nngu nthihi nahone yeneyo nngu ya wela dindini nga Sabatha a si dzhene a i bvisa? 12  Naa muthu a si wa ndeme u fhira nngu? Ngauralo, u ita zwithu zwavhuḓi nga Sabatha zwo tendelwa.” 13  A amba na onoyo munna a ri: “Onyolosa tshanḓa tshau.” A tshi onyolosa, nahone tsha fhola tsha fana na tshiṅwe tshanḓa. 14  Fhedzi Vhafarisei vha bva nahone vha langana uri vha mu vhulahe. 15  Musi Yesu a tshi pfa zwenezwo, a ṱuwa henefho. Vhathu vhanzhi vha mbo ḓi mu tevhela, nahone a vha fhodza vhoṱhe, 16  fhedzi a vha laya nga ho khwaṱhaho uri vha songo vhuya vha vhudza muthu, 17  uri hu ḓadzee zwe zwa ambiwa nga muporofita Yesaya, we a ri: 18  “Vhonani! Muḓinḓa wanga we nda mu nanga, ane nda mu funa, ane mbilu yanga ya mu takalela! Ndi ḓo vhea muya wanga kha ene, uri a ḓivhadze dzitshaka zwine khaṱulokwayo ya vha zwone. 19  Ha nga ṱaṱi khani, ha nga zhambi; nahone a hu na ane a ḓo pfa ipfi ḽawe dzinḓilani. 20  Luṱanga lwo piḓeaho ha nga lu vunḓi, luvhone lu nyengaho ha nga lu dzimi u swikela a tshi ḓisa khaṱulokwayo nga hu bvelelaho. 21  Vhukuma tshaka dzi ḓo fulufhela dzina ḽawe.” 22  Nga tshenetsho tshifhinga vha ḓisa munna a re na dimoni, o pofulaho a sa koni u amba, a mu fhodza, nahone onoyo munna a sa koni u amba a dovha a amba na u vhona. 23  Gogo ḽa kanuka ḽa ri: “Naa uyu a si Murwa wa Davida?” 24  Vhafarisei vha tshi pfa zwenezwo vha ri: “Muthu uyu u pandela madimoni nga Beelsebulu, muvhusi wa madimoni.” 25  Nge a vha a tshi ḓivha zwine vha khou zwi elekanya, a amba navho a ri: “Muvhuso muṅwe na muṅwe une wa fhandekana u a wa, na muḓi muṅwe na muṅwe kana nnḓu iṅwe na iṅwe yo fhandekanaho a i nga imi. 26  Nga hu fanaho, arali Sathane a tshi pandela Sathane, hu nga vha u ḓifhandekanya; muvhuso wawe u nga ima hani? 27  Arali ndi tshi pandela madimoni nga Beelsebulu, vhathu vhaṋu vha a pandela nga nnyi? Ndi ngazwo vhathu vhaṋu vha tshi ḓo ni haṱula. 28  Fhedzi arali ndi tshi pandela madimoni nga muya wa Mudzimu, vhukuma muvhuso wa Mudzimu wo swika kha inwi ni songo zwi lavhelela. 29  Kana ndi nnyi ane a nga dzhena nḓuni ya munna a re na maanḓa a dzhia thundu dzawe, arali a songo thoma a mu vhofha? Ndi hone a tshi ḓo kona u tswa thundu dzawe. 30  A sa imiho na nṋe u lwa na nṋe, nahone a sa kuvhanganyiho na nṋe u a balanganya. 31  “Ndi a ni vhudza ndi ri: Vhathu vha ḓo hangwelwa zwivhi zwoṱhe na tsemano, fhedzi vha semaho muya mukhethwa a vha nga hangwelwi. 32  Sa tsumbo, naho e nnyi ane a sema Murwa-muthu, u ḓo hangwelwa, fhedzi naho e nnyi ane a sema muya mukhethwa ha nga hangwelwi, kha ano maitele a zwino kana kha a ḓaho. 33  “Arali ni muri wavhuḓi, ni ḓo aṋwa mitshelo yavhuḓi; arali ni muri u si wavhuḓi, nga u ralo ni ḓo aṋwa mitshelo i si yavhuḓi, muri u ḓihwa nga mitshelo yawo. 34  Inwi vhana vha mavuluvulu, ni nga amba hani zwithu zwavhuḓi ngeno ni vhavhi? Zwo ḓalaho mbiluni ndi zwine mulomo wa amba zwone. 35  Muthu muvhuya u bvisa zwithu zwavhuḓi kha lupfumo lwawe lwavhuḓi, ngeno muthu muvhi a tshi bvisa zwithu zwivhi kha lupfumo lwawe luvhi. 36  Ndi a ni vhudza uri nga Ḓuvha ḽa Khaṱulo vhathu vha ḓo sengiselwa zwoṱhe zwe vha zwi amba zwi si na mushumo, 37  ngauri zwine na zwi amba ndi zwone zwine zwa ḓo ita uri hu pfi no luga, nahone ni ḓo vhonwa mulandu nga zwine na zwi amba.” 38  Vhaṅwe Vhafarisei na vhamaṅwalo vha mu fhindula vha ri: “Mufunzi ri ṱoḓa uri u ri sumbedze vhuṱolo.” 39  A tshi vha fhindula a ri: “Murafho muvhi na u sa fulufhedzei u dzulela u ṱoḓa u sumbedzwa vhuṱolo, a hu na vhuṱolo vhune na ḓo sumbedzwa nga nnḓa ha vhuṱolo ha muporofita Yona. 40  Samusi Yona o fhedza maḓuvha mararu na vhusiku hao e thumbuni ya khovhe khulu, na Murwa-muthu u ḓo fhedza maḓuvha mararu na vhusiku hao e vhiḓani. 41  Nga ḓuvha ḽa khaṱulo vhathu vha Ninive khathihi na wonoyu murafho vha ḓo vuwa nahone vha ḓo u vhona mulandu ngauri vho rembuluwa musi Yona a tshi huwelela. Huno vhonani! a fhiraho Yona u fhano. 42  Nga ḓuvha ḽa khaṱulo khosi ya mufumakadzi i bvaho tshipembe i ḓo vuswa khathihi na wonoyu murafho nahone i ḓo u vhona mulandu ngauri yo tshimbila i tshi bva vhusendekamisi i tshi ḓa u thetshelesa vhuṱali ha Salomo, huno vhonani! a fhiraho Salomo u fhano. 43  “Musi muya muvhi u tshi bva kha muthu, u fhira nga sogani u tshi ṱoḓa fhethu ha u awela, nahone u si hu wane. 44  Nga zwenezwo wa ri, ‘Ndi ḓo humela nḓuni yanga ye nda bva khayo’; musi u tshi swika wa wana i si na muthu fhedzi yo kunakiswa nahone yo khavhiswa. 45  Nga zwenezwo, wa mbo ḓi ṱuwa wa ya wa kunga miṅwe ya sumbe ine ya u fhira nga vhuvhi, musi wo no vhuyelela nayo henefho, ya dzula henefho nḓuni, zwiimo zwa onoyo muthu zwa tou ṋaṋa u fhira zwa u thoma. Zwi ḓo tou ralo na nga wonoyu murafho muvhi.” 46  Yesu a tshi kha ḓi amba na gogo, ha swika mme awe na vharathu vhawe, vha ima nnḓa vha tshi ṱoḓa u amba nae. 47  Muṅwe muthu a amba nae a ri: “Mme au na vharathu vhau vho ima nnḓa, vha khou ṱoḓa u amba na iwe.” 48  A fhindula we a amba nae a ri: “Mme anga ndi nnyi, nahone vharathu vhanga ndi vhonnyi?” 49  A imisa tshanḓa tshawe a sumba vhafunziwa vhawe, a ri: “Vhonani! Mme anga na vharathu vhanga khevha! 50  Ngauri ane a ita zwine Khotsi anga a zwi funa, ndi ene murathu wanga na khaladzi anga na mme anga.”

Ṱhaluso dzi re magumoni a siaṱari