2 Petro 3:1-18

3  Vhafunwa, hovhu ndi vhurifhi ha vhuvhili vhune nda khou ni ṅwalela hone, vhune ha fana na ha u thoma, ndi khou dzivhulusa maanḓa aṋu a u humbula nga u ni humbudza,  uri ni fanela u humbula zwe zwa ambiwa kale nga vhaporofita vhakhethwa na ndaela ya Murena na Mutshidzi a tshi shumisa vhaapostola vhaṋu.  Tsha u thoma, ḓivhani uri maḓuvhani a vhufhelo hu ḓo vha na vhagoḓi vhane vha ḓo ni goḓa, vha tshi langwa nga nyemulo dzavho  nahone vha ri: “Zwe zwa fulufhedziswa nga ha u vha hone hawe zwi ngafhi? U bva nga ḓuvha ḽe vhomakhulukuku washu vha fa, zwithu zwoṱhe zwi kha ḓi bvela phanḓa nga nḓila i fanaho na musi zwithu zwi tshi thoma u sikwa.”  Ngauri vha nyadza nga khole uri kale-kale ho vha hu na maṱaḓulu na ḽifhasi ḽo bvaho maḓini nga ipfi ḽa Mudzimu;  nahone shango ḽa tshenetsho tshifhinga ḽo lozwiwa musi ḽi tshi kumbiwa nga maḓi.  Nga ḽeneḽo ipfi maṱaḓulu na ḽifhasi zwine zwa vha hone zwino zwo vhulungelwa mulilo nahone zwo vhetshelwa ḓuvha ḽa khaṱulo na u lozwiwa ha vhathu vha sa ofhi Mudzimu.  Naho zwo ralo, vhafunwa, zwine na fanela u zwi ṱhogomela ndi hezwi, uri ḓuvha ḽithihi kha Yehova ḽi nga miṅwaha ya tshigidi na miṅwaha ya tshigidi i nga ḓuvha ḽithihi.  Yehova ha ongolowi u ita zwe a fulufhedzisa, samusi vhaṅwe vhathu vha tshi mu dzhia sa ane a ongolowa, fhedzi ha ni fheleli mbilu ngauri ha ṱoḓi muthu naho e ufhio a tshi lozwiwa, fhedzi u tama vhoṱhe vha tshi rembuluwa. 10  Naho zwo ralo, ḓuvha ḽa Yehova ḽi ḓo ḓa sa mbava, hune maṱaḓulu a ḓo fhira nga mubvumo u songo lavhelelwaho, hone thikho dzi ḓo swa dza ṋoka, ḽifhasi na mishumo i re khaḽo zwi ḓo bviselwa khagala. 11  Samusi zwenezwi zwithu zwoṱhe zwi tshi ḓo ṋokiswa nga yeneyi nḓila, ni humbule uri ni ṱoḓa u vha vhathu vha mufuda-ḓe kha mishumo mikhethwa ya vhuḓifari na kha mishumo ya u ḓikumedza kha Mudzimu, 12  vhunga no lindela na u dzula ni tshi humbula u vha hone ha ḓuvha ḽa Yehova, nga tshifhinga tshine maṱaḓulu a ḓo fhiswa nga mulilo, na thikho dza ṋokiswa nga mulilo u fhisaho zwihulu! 13  Fhedzi hu na maṱaḓulu maswa na ḽifhasi ḽiswa zwe ra zwi lindela u ya nga zwe a zwi fulufhedzisa, nahone u luga hu ḓo dzula khazwo. 14  Ngauralo vhafunwa, samusi no lindela zwenezwi zwithu, itani zwine na nga kona uri mafheleloni ni wanwe ni si na madondo ni sa solei nahone ni na mulalo. 15  Zwiṅwe hafhu, ni dzhie u sa fhela mbilu ha Murena washu sa u tshidzwa, vhunga wahashu a funwaho Paulo na ene o ni ṅwalela u ya nga vhuṱali he a ṋewa hone, 16  musi a tshi amba nga ha zwenezwi zwithu samusi a tshi ita nga u ralo kha marifhi awe oṱhe. Naho zwo ralo, zwiṅwe khao zwi a konḓa u zwi pfesesa, huno vhathu vha sa ḓivhi na vha sa imi fhethu huthihi vha khou shanda zwenezwi zwithu, samusi vha tshi ita nga u ralo kha Maṅwalo oṱhe, ha vha u ḓilozwa vhone vhaṋe. 17  Ngauralo vhafunwa, samusi no dzula ni na yeneyi nḓivho, ni ṱhogomele uri ni si xedzwe navho nga vhutshinyi ha vhathu vha si na mulayo nahone zwa ita uri ni si ime no khwaṱha. 18  Aiwa, bvelani phanḓa ni tshi aluwa kha vhuthu vhuhulu na nḓivho ya Murena na Mutshidzi washu Yesu Kristo. Vhugala nga vhu vhe hawe zwino na nga hu sa fheli.

Ṱhaluso dzi re magumoni a siaṱari