2 Petro 2:1-22

2  Naho zwo ralo, ho vha na vhaporofita vha u zwifha vhukati ha vhathu, samusi hu tshi ḓo vha na vhagudisi vha u zwifha vhukati haṋu. Vhenevho vha ḓo ṋengeledza vha dzhenisa zwigwada zwi tshinyaho nahone vha ḓo landula na muṋe wavho we a vha renga, vha ḓo ita uri ndozwo i vha ḓele nga u ṱavhanya.  Zwiṅwe hafhu, vhanzhi vha ḓo tevhedza vhuḓifari havho vhu shonisaho, huno nga nṱhani ha zwenezwo nḓila ya ngoho i ḓo ambiwa luvhi.  Zwiṅwe hafhu, vha ḓo ni fhura nga maipfi avho vha tshi itiswa nga vhupangwa. Fhedzi khaṱulo yavho ye vha dzula vho ṋewa yone, a i nga lengi u ḓa, vha ḓo lozwiwa zwa vhukuma.  Vhukuma, Mudzimu ho ngo litsha u pfisa vhuṱungu vharuṅwa vhe vha tshinya, fhedzi o vha kudzela Thatharasi, o vha kudza migodini ya swiswi ḽihulu uri vha vhulungelwe uri vha haṱulwe.  Ho ngo litsha u pfisa vhuṱungu shango ḽa kale, fhedzi a tsireledza Noaxe we a vha a tshi huwelela nga ha u luga, khathihi na vhaṅwe vha sumbe musi a tshi ḓisa maḓi mahulu kha shango ḽa vhathu vha sa ofhi Mudzimu.  O vhona mulandu muḓi wa Sodoma na wa Gomora nga u i fhisa ya vha milora, zwa vha tsumbo ya zwine zwa ḓo ḓela vhathu vha sa ofhi Mudzimu.  O ponyokisa Loto o lugaho, we a vha o tsikeledzea zwihulu nga vhuḓifari vhu shonisaho ha vhathu vha si na mulayo—  ngauri onoyo munna o lugaho o vha a tshi khou tambudzwa ḓuvha ḽiṅwe na ḽiṅwe nga zwe a vha a tshi zwi vhona na u zwi pfa musi o dzula vhukati havho na nga u sa vha havho na mulayo.  Huno Yehova u a ḓivha u ponyokisa milingoni vhathu vhane vha ḓikumedza khae, na u vhetshela thungo vhathu vha songo lugaho uri vha lozwiwe nga ḓuvha ḽa khaṱulo, 10  zwihuluhulu vhane vha ṱoḓa u tshikafhadza mivhili ya vhaṅwe na vhane vha nyadza vhavhusi. Vha na tshikhuna nahone vha ita zwine vha funa, a vha ofhi u amba luvhi vha re na vhugala, 11  ngeno vharuṅwa naho vhe na nungo na maanḓa mahulu, vha songo vha pomoka nga u vha amba luvhi, nga nṱhani ha u ṱhonifha Yehova. 12  Fhedzi vhenevha vhathu, vha nga zwipuka zwi sa humbuli zwine zwa ita zwithu nga lwa nzulele, zwo bebelwaho uri zwi fashwe na u vhulahwa, vha amba luvhi nga ha zwithu zwine vha si zwi ḓivhe. Vha ḓo lozwiwa nga ndozwo i ḓiswaho nga nḓila yavho i tshinyaho, 13  malamba avho ndi u tambula nga nṱhani ha nḓila yavho i re na khombo. Vha ḓiphina nga u fusha nyemulo dzavho dza ṋama masiari tshivhangalala. Vha tou vha madondo, vha takalela pfunzo dzavho dza vhufhura ngeno vha tshi khou ḽa na inwi. 14  Maṱo avho o ḓala vhuṱonḓolo nahone a vha koni u litsha u ita zwivhi, vha ungeledza vha shayaho nungo. Mbilu dzavho dzo gudiswa u vha na vhupangwa. Ndi vhana vho semiwaho. 15  Vho litsha nḓila yo lugaho, vho xedzwa. Vho tevhela nḓila ya Bileamu murwa wa Beoro, we a funa malamba a u ita vhuvhi, 16  huno a kaidzwa nga nṱhani ha u pfuka hawe mulayo. Mbongola i sa koni u amba yo mbo ḓi amba nga ipfi ḽa muthu, ya dzivhisa vhutsilu ha muporofita. 17  Vhenevho vha nga zwisima zwi si na maḓi, khuli dzi vhudzulwaho nga ḓumbu ḽi re na maanḓa, vho lindelwa nga swiswi ḽihulu. 18  Ngauri vha amba maipfi a u ḓikukumusa a sa ri tshithu. Vha shumisa nyemulo dza ṋama na vhuḓifari vhu shonisaho uri vha kunge vhathu vhane vha kha ḓi tou bva u ponyoka vhukati ha vhane vha tshila nga nḓila yo khakheaho. 19  Vha vha fulufhedzisa mbofholowo, ngeno vhone vhaṋe vhe phuli dza vhuḓifari ho tshinyalaho. Ngauri arali muthu a tshi kundwa nga muṅwe, u vha phuli ya onoyo muthu. 20  Vhukuma, arali vho ponyoka u tshikafhadzwa nga shango nga u vha na nḓivho yo teaho ya Murena na Mutshidzi Yesu Kristo, vha dovha vha ṱanganela kha zwenezwo zwithu, zwa dovha zwa vha kunda, vhuimo havho ha u fhedza vhu ḓo ṋaṋa u fhira ha u thomani. 21  Ngauri zwo vha zwi tshi ḓo vha khwine arali vha songo ḓivha nga ho teaho nḓila yo lugaho nṱhani ha uri musi vho no i ḓivha vha ṱutshele ndaela khethwa ye vha i ṱanganedza. 22  Zwine murero wa ngoho wa zwi amba zwo itea khavho: “Mmbwa yo humela maṱanzani ayo, nguluvhe ye ya vha yo ṱanzwiwa yo dovha ya vhumbuluwa thopheni.”

Ṱhaluso dzi re magumoni a siaṱari