Pfukelani kha mafhungo

Ndi Mini Zwine Ṱhanzi dza Yehova vha Zwi Tenda?

Ndi Mini Zwine Ṱhanzi dza Yehova vha Zwi Tenda?

Samusi ri Ṱhanzi dza Yehova, ri lingedza u tevhela Vhukriste he Yesu a vhu funza na he vhaapostola vha vhu ita. Ino thero i nweledza zwine ra tenda zwone.

  1. Mudzimu. Ri gwadamela Mudzimu muthihi wa ngoho ane a vha Ramaanḓaoṱhe, Musiki, ane dzina ḽawe ḽa vha Yehova. (Psalme ya 83:18; Nzumbululo 4: 11) Ndi Mudzimu wa Abrahamu, Mushe, na Yesu.—Ekisodo 3:6; 32:11; Yohane 20:17.

  2. Bivhili. Ri dzhia Bivhili sa mulaedza we Mudzimu a u hevhedzela vhathu. (Yohane 17:17; 2 Timotheo 3: 16) Ri thea zwine ra zwi tenda kha bugu dzoṱhe dza 66, dzine dza katela “Thestamennde ya Kale” na “Testamennde Ntswa.” Muphurofesa  Jason D. BeDuhn o zwi ṱalusa nga nḓila yo teaho musi a tshi ṅwala uri Ṱhanzi dza Yehova vha thea “zwine vha zwi tenda na zwine vha zwi ita kha zwine vha zwi vhala Bivhilini vha songo thoma vha tou humbulela zwine zwa wanala henefho.” *

    Naho ri tshi tenda Bivhili yoṱhe, a ri fhisei nga nḓila yo kalulaho. Ri ṱhogomela uri zwipiḓa zwa Bivhili zwo ṅwalwa nga luambo lwa pfanyisedzo nahone a ro ngo fanela u zwi dzhia nga ho livhaho.—Nzumbululo 1:1.

  3. Yesu. Ri tevhela pfunzo na tsumbo zwa Yesu Kristo na u mu hulisa sa Mutshidzi washu na Murwa wa Mudzimu. (Mateo 20:28; Mishumo 5: 31) Nga zwenezwo, ri Vhakriste. (Mishumo 11:26) Naho zwo ralo, ro guda Bivhilini uri Yesu a si Mudzimu Ramaanḓaoṱhe nahone a hu na Maṅwalo ane a tikedza pfunzothendwa ya Vhuraruthihi .—Yohane 14:28.

  4. Muvhuso wa Mudzimu. Wonoyu ndi muvhuso wa vhukuma u re ṱaḓulu, a si vhuimo mbiluni dza Vhakriste. U ḓo fhelisa mivhuso ya vhathu nahone wa khunyeledza ndivho ya Mudzimu nga ḽifhasi. (Daniele 2:44; Mateo 6: 9, 10) U ḓo dzhia vhukando hu si kale samusi vhuporofita ha Bivhili vhu tshi sumbedza uri ri khou tshila “maḓuvhani a vhufhelo.”—2 Timotheo 3: 1-5; Mateo 24:3-14.

    Yesu ndi Khosi ya Muvhuso wa Mudzimu ṱaḓulu. O thoma u vhusa nga 1914.—Nzumbululo 11:15.

  5. U tshidzwa. U vhofhololwa kha tshivhi na lufu zwi konadzea nga tshiṱhavhelo tshi rengululaho tsha Yesu. (Mateo 20:28; Mishumo 4:12) U itela uri vhathu vha vhuyelwe nga tshenetsho tshiṱhavhelo, vha fanela u vha na lutendo kha Yesu nahone vha shandule matshilele avho nahone vha lovhedzwe. (Mateo 28:19, 20; Yohane 3:16; Mishumo 3:19, 20) Mishumo ya muthu i sumbedza uri lutendo lwawe lu a tshila. (Yakobo 2:24, 26) Naho zwo ralo, u tshidzwa a hu rengisiwi—hu wanwa nga “vhuthu vhuhulu ha Mudzimu.”—Vhagalata 2:16, 21.

  6. Ḽiṱaḓulu. Yehova Mudzimu, Yesu Kristo, na vharuṅwa vha fulufhedzeaho ndi vhathu vha muya. * (Psalme ya 103:19-21; Mishumo 7:55) Tshigwada tshiṱuku tsha vhathu—vha 144 000—tshi ḓo vuselwa ṱaḓulu u itela u vhusa na Yesu Muvhusoni.—Daniele 7:27; 2 Timotheo 2:12; Nzumbululo 5:9, 10; 14:1, 3.

  7. Ḽifhasi. Mudzimu o sika ḽifhasi uri ḽi vhe haya ha vhathu ha tshoṱhe. (Psalme ya 104:5; 115:16; Muhuweleli 1:4) Mudzimu u ḓo ita uri vhathu vha thetshelesaho vha vhe na mutakalo wo fhelelaho na vhutshilo vhu sa fheli paradisoni kha ḽifhasi.—Psalme ya 37:11, 34.

  8. Vhuvhi na tshengelo. Zwenezwo zwo thoma musi muṅwe wa vharuṅwa vha Mudzimu a tshi vha ḽishandukwa. (Yohane 8:44) Onoyo muruṅwa we nga murahu ha vhushandukwa hawe a vhidzwa “Sathane” na “Diabolo,” o fhura vhavhingani vha u thoma uri vha mu tevhele, nahone zwenezwo zwa ita uri hu vhe na masiandoitwa a si avhuḓi kha vhaḓuhulu vhavho. (Genesi 3:1-6; Vharoma 5:12) U itela u dzudzanya nga nḓila yo teaho mafhungo a matshilele e a bveledzwa nga Sathane, Yehova o tendela vhuvhi na tshengelo, fhedzi a nga si zwi tendele zwi tshi bvela phanḓa lwa tshoṱhe.

  9. Lufu. Vhathu vho faho a vha tsheeho. (Psalme ya 146:4; Muhuweleli 9:5, 10) A vha shengedzwi muliloni wa hele.

    Mudzimu u ḓo vusa vhathu vha dzibilioni vho faho. (Mishumo 24:15) Naho zwo ralo, vhane vha hana u guda nḓila dza Mudzimu musi vho no vuswa uri vha tshile vha ḓo fheliswa hu si tsha vha na fulufhelo ḽa uri vha vuswe.—Nzumbululo 20:5.

  10. Muṱa. Ri tevhela maitele a Mudzimu malugana na mbingano samusi muṱa u mbofho ya munna muthihi na mufumakadzi muthihi, u ḓifara luvhi nga zwa vhudzekani ndi tshone tshiitisi tshi tshoṱhe tsha u ṱalana. (Mateo 19:4-9) Ri na vhungoho ha uri vhuṱali vhune ra vhu wana Bivhilini vhu thusa miṱa uri i bvelele.— Vhaefesa 5:22–6:1.

  11. Vhurabeli hashu. A ri gwadameli tshifhambano kana zwiṅwe zwifanyiso. (Doiteronomio 4:15-19; 1 Yohane 5:21) Masia a ndeme a vhurabeli hashu a katela zwi tevhelaho:

    • ● U rabela Mudzimu.—Vhafilipi 4:6.

    • ● U vhala na u guda Bivhili.—Psalme ya 1:1-3.

    • ● U elekanya nga ha zwine ra zwi guda Bivhilini.— Psalme ya 77:12.

    • ● U kuvhangana u itela u rabela, u guda Bivhili, u imba, u amba nga ha zwine ra zwi tenda na u ṱuṱuwedza Dziṱhanzi nga riṋe na vhaṅwe.— Vhakolosa 3:16; Vhaheberu 10:23-25.

    • ● U huwelela “mafhungo maḓifha a Muvhuso.”—Mateo 24:14.

    • ● U thusa vha shayaho.—Yakobo 2:14-17.

    • ● U fhaṱa na u ṱhogomela Holo dza Muvhuso na zwiṅwe zwifhaṱo zwine zwa shumiswa u itela u isa phanḓa mushumo wa shango ḽoṱhe wa u funza Bivhili.—Psalme ya 127:1.

    • ● U shela mulenzhe kha u thusa vho welwaho nga khombo.—Mishumo 11:27-30.

  12. Ndangulo yashu. Ro dzudzanywa u ya nga zwivhidzo, tshivhidzo tshiṅwe na tshiṅwe tshi lavheleswa nga mudzudzanyi wa tshigwada tsha vhahulwane. Naho zwo ralo, vhahulwane a si tshigwada tsha vhafunzi, nahone a vha holelwi. (Mateo 10:8; 23:8) A ri bvisi tshafumi, nahone a ri bvisi kose-kose miṱanganoni yashu. (2 Vhakorinta 9:7) Mishumo yashu yoṱhe i tikedzwa nga miṋeelo ya vhathu vhane ha si phaḓalazwe madzina avho.

    Vhanna vhane vha vhumba Tshigwada tshi Langaho, vhane vha vha tshigwada tshiṱuku tsha Vhakriste vho vhibvaho vhane vha shuma ofisini dzashu khulwane, vha ṋea vhulivhisi Ṱhanzi dza Yehova shangoni ḽoṱhe.—Mateo 24:45.

  13. Vhuthihi hashu. Ri na vhuthihi u mona na shango ḽoṱhe nahone ri tenda zwithu zwithihi. (1 Vhakorinta 1:10) Ri dovha ra ḓiimisela u sa vha na tshiṱalula musi zwi tshi ḓa kha u shumisana na vhaṅwe, mvelele, lukanda, kana vhuimo. (Mishumo 10:34, 35; Yakobo 2:4) Naho zwo ralo, vhuthihi hashu vhu a ri tendela uri ri ḓikhethele. Ṱhanzi iṅwe na iṅwe i ḓidzhiela phetho u tendelana na luvalo lwayo lwo gudiswaho nga Bivhili.—Vharoma 14:1-4; Vhaheberu 5:14.

  14. Vhuḓifari hashu. Ri lwela u sumbedza lufuno lu si lwa tseḓa kha zwoṱhe zwine ra zwi ita. (Yohane 13:34, 35) Ri iledza u ita zwithu zwi sa takadzi Mudzimu, u katela na u sa shumisa luvhi malofha nga u hana musi hu tshi ambiwa uri ri shelwe malofha. (Mishumo 15:28, 29; Vhagalata 5:19-21) Ri na mulalo nahone a ri ḓidzhenisi kha dzinndwa. (Mateo 5:9; Yesaya 2:4) Ri ṱhonifha muvhuso wa hune ra dzula hone nahone ri thetshelesa milayo yawo, tenda i sa iti uri ri si thetshelese milayo ya Mudzimu.—Mateo 22:21; Mishumo 5:29.

  15. Vhushaka hashu na vhaṅwe. Yesu o laedza a ri: “U tea u funa wahau vhunga u tshi ḓifuna.” A dovha a ri Vhakriste “a vha tshipiḓa tsha shango.” (Mateo 22:39; Yohane 17:16) Nga zwenezwo, ri lingedza u “itel[a] vhathu vhoṱhe zwivhuya,” fhedzi a ri dzhii sia kha zwa politiki nahone ri iledza u ḓiṱanganya na vhuṅwe vhurereli. (Vhagalata 6:10; 2 Vhakorinta 6:14) Naho zwo ralo, ri ṱhonifha phetho dzine vhaṅwe vha dzi dzhia malugana na zwenezwo zwithu.—Vharoma 14:12.

Arali ni na dziṅwe mbudziso nga ha zwine Ṱhanzi dza Yehova dza zwi tenda, ni nga vhala zwo engedzeaho nga ha riṋe kha website yashu, kwamani iṅwe ya ofisi dzashu, ni ye Holoni ya Muvhuso ya hune na dzula hone, kana ni ambe na muṅwe wa Ṱhanzi wa hune na dzula hone.

^ phar. 4 Sedzani Truth in Translation, siaṱari 165.

^ phar. 10 Vharuṅwa vhavhi vho pandelwa ṱaḓulu, naho vho bvela phanḓa vha tshi tshila fhethu ha muya.—Nzumbululo 12:7-9.