Ro ṱhogomela uri vhunzhi ha vhathu vhane vha dzhena kereke vha a funa u haseledza nga ha thero dza Bivhili. Ndi ngoho uri ri a ṱhonifha ndugelo ine muthu a vha nayo ya u tenda pfunzo i sa fani na yashu nahone a ri kombetshedzi vhathu uri vha thetshelese mulaedza washu.

 Musi ri tshi haseledza nga ha vhurereli, ri lingedza u shumisa nyeletshedzo ya Bivhili ya u ita nga u ralo nga “muya wa u vuḓa” na “ṱhonifho yo dzikaho.” (1 Petro 3:15, NW) Ri a zwi ḓivha uri vhaṅwe vha nga si ṱanganedze mulaedza washu. (Mateo 10:14) Naho zwo ralo, ri nga si ḓivhe nḓila ine vhathu vha ḓo aravha ngayo arali ri sa athu amba navho. Zwiṅwe hafhu, ri a zwi ṱhogomela uri zwiimo zwa vhathu zwi a shanduka.

 Sa tsumbo, hu nga vha na ḓuvha ḽine muthu a nga vha o farakanea lune a sa kone u amba na riṋe, fhedzi a tshi nga takalela u amba na riṋe tshifhingani tshi ḓaho. Vhathu vha nga sedzana na thaidzo ntswa kana vhuimo vhuswa vhune vha nga kombetshedzea u vhu piringulula, zwa vha ita uri vha vhe na dzangalelo kha mulaedza wa Bivhili. Nga zwenezwo, ri lwela u amba nga maanḓa na vhathu nga zwenezwo zwifhinga.