Pfukelani kha mafhungo

Naa Ṱhanzi dza Yehova vho Shandula Bivhili u Itela uri i Tendelane na Pfunzo Dzavho?

Naa Ṱhanzi dza Yehova vho Shandula Bivhili u Itela uri i Tendelane na Pfunzo Dzavho?

Hai, a ro ngo i shandula. Nṱhani hazwo, ro shandula pfunzo dzashu musi ri tshi ṱhogomela uri zwine ra zwi funza a zwi tendelani tshoṱhe na Bivhili.

Kale ri sa athu bveledza New World Translation of the Holy Scriptures nga 1950, ro ṱolisisa Bivhili. Ro shumisa ṱhalutshedzelo dze dza vha dzi hone nahone ra ita uri zwine ra zwi funza zwi tendelane nadzo. Ṱhogomelani tsumbo dzi si gathi dza pfunzo dze Ṱhanzi dza Yehova vha dzi tenda lwa tshifhinga tshilapfu nahone ni ḓiitele phetho arali zwa vhukuma dzi tshi tendelana na zwine zwa funzwa nga Bivhili.

  1. Zwine ra zwi tenda: Mudzimu a si Vhuraruthihi. Khandiso ya July 1882 ya Zion’s Watch Tower yo ri: “Vhavhali vhashu vha ṱhogomela uri naho ri tshi tenda kha Yehova na Yesu, na Muya mukhethwa, ri hanedza tshoṱhe pfunzo i si ya maṅwalo ya uri hu na Midzimu miraru kha muthu muthihi kana sa zwine vhaṅwe vha zwi vheisa zwone, Mudzimu muthihi kha vhathu vhararu.”

    Zwine zwa ambiwa nga Bivhili: “Yehova Mudzimu wau ndi Yehova é eṱhe.” (Doiteronomio 6:4) “Kha riṋe hu na Mudzimu muthihi fhedzi, ane a vha Khotsi ashu wa ṱaḓulu, ndi ene o sikaho zwithu zwoṱhe, na riṋe ro sikwa ngae; hu na Murena muthihi, Yesu Kristo, zwoṱhe zwo vha hone ngae, na riṋe ro vha hone nga nṱhani hawe.” (1 Vhakorinta 8:6) Yesu nga dzawe o ri: “Khotsi ndi muhulwane kha nṋe.”—Yohane 14:28.

  2. Zwine ra zwi tenda: Vhathu a vha tambudzwi nga hu sa fheli muliloni wa hele. Musi magazini wa Zion’s Watch Tower u tshi redza Vharoma 6:23 u ya nga King James Version kha tshiṱoho tshawo tsha June 1882 tshine tsha ri “Malamba a Tshivhi Ndi Lufu,” wo ri: “Enea mafhungo a a pfala nahone a a leluwa vhukuma. Zwi mangadzaho vhukuma ndi uri vhathu vhanzhi vhane vha dzhia Bivhili i Ipfi ḽa Mudzimu vha lwisana tshoṱhe na eneo mafhungo, nahone vha khwaṱhisedza uri vha tenda uri malamba a tshivhi ndi vhutshilo vhu sa fheli tshengeloni na uri zwenezwo zwi funzwa nga Bivhili.”

    Zwine Bivhili ya zwi amba: “Hu ḓo fa onoyo we a ita zwivhi.” (Hesekiele 18:4, 20) Tshiṱarafo tsha u fhedza tsha vhane vha pikisa Mudzimu a si tshengelo i sa fheli, fhedzi ndi “ndozwo ya lini na lini.”2 Vhathesalonika 1:9.

  3. Zwine ra zwi tenda: Muvhuso wa Mudzimu ndi hulumeni wa vhukuma, a u mbiluni dza vhathu. Musi magazini wa Zion’s Watch Tower wa December 1881 u tshi amba nga ha Muvhuso wa Mudzimu wo ri: “Musi wonoyo muvhuso u tshi tikwa, hu ḓo fheliswa mivhuso yoṱhe kha ḽifhasi.”

    Zwine Bivhili ya zwi amba: “Hone, misi ya eneo mahosi, ndi hone Mudzimu wa ṱaḓulu a tshi ḓo vusa muvhuso une wa sa ḓo tshinyala lini na Iini, une vhuhosi hawo ha sa ḓo wetshela kha luṅwe lushaka. Wonoyo u ḓo pwashakanya mivhuso yoṱhe wa i lozwa; wone uṋe wa ima lini na lini.”—Daniele 2:44.

Naa Ṱhanzi dza Yehova vha ḓitika nga New World Translation u itela u tikedza pfunzo dzavho?

Hai, ri bvela phanḓa ri tshi shumisa ṱhalutshedzelo nnzhi dza Bivhili mushumoni washu wa u ṱanziela. Zwi re zwone ndi uri ri ṋea kopi dzashu dza New World Translation mahala kha mbekanyo yashu ya pfunzo ya Bivhili, ri dovha ra takalela u guda na vhane vha takalela u shumisa dziṅwe ṱhalutshedzelo.