Pfukelani kha mafhungo

Naa Ṱhanzi dza Yehova ndi Vhakriste?

Naa Ṱhanzi dza Yehova ndi Vhakriste?

Ee. Ri Vhakriste nga nṱhani ha zwiitisi zwi tevhelaho:

  • Ri lingedza u tevhela nga vhuronwane pfunzo dza Yesu Kristo na nḓila ye a tshila ngayo.—1 Petro 2:21.

  • Ri tenda uri Yesu ndi khoṋololo ya u tshidzwa, uri “a huna u tshidzwa kha muṅwe, na hone tsini ha ḽiṱaḓulu a huna ḽiṅwe dzina ḽe ḽa ṋekedzwa vhathu, ḽiné ḽa pfi ri tshidzwe khaḽo’.”—Mishumo 4:12.

  • Musi vhathu vha tshi vha Ṱhanzi dza Yehova, vha a lovhedzwa dzinani ḽa Yesu.—Mateo 28:18, 19.

  • Ri rabela dzinani ḽa Yesu.—Yohane 15:16.

  • Ri tenda uri Yesu ndi Ṱhoho, kana we a vhewa uri a vhe na maanḓa kha vhathu vhoṱhe.—1 Vha-Korinta 11:3.

Naho zwo ralo, ro fhambana nga nḓila nnzhi na zwiṅwe zwigwada zwa vhurereli zwine zwa ḓivhidza Vhakriste. Sa tsumbo, ri tenda uri Bivhili i funza uri Yesu ndi Murwa wa Mudzimu, hu si tshipiḓa tsha Vhuraruthihi. (Marko 12:29) A ri tendi uri muthu u na muya u sa fi, uri hu na mutheo naho u ufhio Maṅwaloni wa u amba uri Mudzimu u tambudza vhathu heleni ya lini na lini kana uri vhane vha ranga phanḓa kha mishumo ya zwa vhurereli vha tea u ṋewa madzina ane a vha vhea vhuimoni ha nṱha u fhira vhaṅwe.—Muhuweleli 9:5; Hesekiele 18:4; Mateo 23:8-10.