Pfukelani kha mafhungo

Naa Ṱhanzi dza Yehova vha na Bivhili Yavho?

Naa Ṱhanzi dza Yehova vha na Bivhili Yavho?

Ṱhanzi dza Yehova vho shumisa ṱhalutshedzelo nnzhi musi vha tshi guda Bivhili. Naho zwo ralo, ri takalela nga maanḓa u shumisa New World Translation of the Holy Scriptures nga nyambo dzine ya wanala ngadzo, nga ṅwambo wa uri i shumisa dzina ḽa Mudzimu, i amba zwithu nga ho teaho nahone i a pfala.

  • I shumisa dzina ḽa Mudzimu. Vhaṅwe vhagandisi vha Bivhili vho kundwa u hulisa Muṅwali wayo. Sa tsumbo, iṅwe ṱhalutshedzelo ya Bivhili i na mutevhe wa vhathu vha fhiraho 70 vhe vha tikedza nga nḓila dzo fhamba-fhambanaho uri i gandiswe. Fhedzi yeneyo Bivhili yo bvisa tshoṱhe dzina ḽa Muṅwali—Yehova Mudzimu!

    New World Translation yo ita zwo fhambanaho na zwenezwo, yo vhuyedzedza dzina ḽa Mudzimu fhethu hunzhi he ḽa vha ḽi hone kha ndimana dza u thoma. A yo ngo phaḓaladza madzina a komiti ye ya ita yeneyo ṱhalutshedzelo.

  • I amba zwithu nga ho teaho. A si ṱhalutshedzelo dzoṱhe dzine dza ṱalusa mulaedza wa u thoma wa Bivhili nga ho teaho. Sa tsumbo, iṅwe ṱhalutshedzelo i ṱalusa Mateo 7:13 nga heyi nḓila: “Dzhenani nga khoro tsekene, ngauri khoro i yaho heleni yo aṱama nahone nḓila i livhisaho khayo i a leluwa.” Naho zwo ralo, maṅwalo a u thoma a shumisa ipfi “ndozwo,” hu si “hele.” Khamusi vhaṱalutshedzeli vho dzhenisa ipfi “hele” nga ṅwambo wa u tenda uri vhavhi vha ḓo shengedzwa lwa tshoṱhe muliloni wa hele. Fhedzi Bivhili a i tikedzi wonoyo muhumbulo. Nga zwenezwo, New World Translation i vhalea nga u rali: “Dzhenani nga khoro tsekene, ngauri nḓila i isaho ndozwoni yo aṱama nahone ndi khulwane.”

  • I a pfala. Ṱhalutshedzelo yavhuḓi i fanela u tea, i pfesesee nga hu leluwaho. Ṱhogomelani tsumbo. Kha Vharoma 12:11, muapostola Paulo wa Mukriste o shumisa ipfi ḽine nga lwa thevhedzaipfi ḽa amba “u vhila muyani.” Samusi ḽeneḽi ipfi ḽi sa pfali zwavhuḓi, New World Translation i ṱalutshedzela yeneyo ndimana nga nḓila ine zwa leluwa u i pfesesa. I amba uri Vhakriste vha tea ‘u fhisea.’

Nga nnḓa ha uri New World Translation i shumisa dzina ḽa Mudzimu, yo tea nahone i a pfala, i na tshiṅwe tshithu tshi swayeaho: I phaḓaladzwa nga fhedzi. Nga nṱhani ha zwenezwo, vhathu vha dzimilioni vha kona u vhala Bivhili nga luambo lwavho lwa ḓamuni—na vhe khamusi vha vha vha nga si kone u vha na kopi yavho ya Bivhili.