Ibtido 3:1-24
3 Xudovand Yahova yaratgan barcha yovvoyi jonivorlar ichida eng ehtiyotkori* ilon+ edi. U ayoldan: «Xudo bog‘dagi hech bir daraxtning mevasidan yemanglar, deb aytgani rostmi?»+ — deya so‘radi.
2 Bunga javoban ayol ilonga dedi: «Bog‘dagi daraxtlarning mevasidan yeyishimiz mumkin+.
3 Lekin Xudo bog‘ning+ o‘rtasidagi daraxtning mevasi haqida: “Undan yemanglar, unga tegmanglar. Aks holda, o‘lasizlar”,— deb aytgan».
4 Ilon ayolga: «Aslo o‘lmaysizlar+.
5 Xudo biladiki, undan yegan kuniyoq ko‘zlaringiz ochiladi va sizlar Xudo kabi nima yaxshi va nima yomon ekanini biladigan bo‘lasizlar»+,— dedi.
6 Ayol qarasa, daraxtning mevasi yemoqga yaxshi, ko‘zga yoqimli, e’tiborni o‘ziga jalb qiladigan ekan. Shunday qilib, ayol mevani oldi-da, yedi+. Keyin eri uning yoniga kelganida, unga ham berdi va eri ham yedi+.
7 So‘ng ikkovining ko‘zlari ochilib, yalang‘och ekanlarini tushunib qolishdi. Shuning uchun, ular anjir barglarini bir-biriga biriktirib, uyatli joylarini* yopib olishdi+.
8 Keyinroq odam bilan uning xotini kechki shabada* esayotgan mahal, bog‘da yurgan Alloh Yahovaning ovozini eshitib qolishdi va Tangri Yahovaning nazaridan qochib, bog‘dagi daraxtlarning orasiga yashirinishdi.
9 Xudovand Yahova odamni: «Qayerdasan?» — deya qayta-qayta chaqirdi.
10 Nihoyat odam: «Men bog‘da Sening ovozingni eshitdim, biroq yalang‘och ekanligimdan qo‘rqib, yashirinib oldim»,— deb aytdi.
11 Xudo undan: «Yalang‘och ekaningni senga kim aytdi?+ Yoki Men yema deb aytgan daraxtning mevasidan yedingmi?»+ — deb so‘radi.
12 Odam: «Sen menga bergan xotin, menga daraxtning mevasidan berdi va men yedim»,— deb javob berdi.
13 Shunda Tangri Yahova ayolga: «Bu nima qilganing?» — dedi. Ayol bunga javoban: «Ilon meni aldadi va men yedim»+,— deb aytdi.
14 Alloh Yahova ilonga+ shunday dedi: «Bu qilmishing uchun barcha uy hayvonlari hamda barcha yovvoyi hayvonlar ichida la’natisan. Butun hayoting mobaynida qorning bilan sudralib yurasan va tuproq yeysan.
15 Men sen+ bilan ayol+ orasiga va sening zurriyoting*+ bilan uning zurriyoti+ orasiga adovat+ solaman. U sening boshingni ezib tashlaydi*+, sen esa uning tovonini chaqasan*+».
16 Ayolga esa U shunday dedi: «Homiladorlik paytingda dardingni bag‘oyat kuchaytiraman, bolalaringni qiynalib tug‘asan. Eringga bo‘lgan ishtiyoqing kuchli bo‘ladi va u ustingdan xo‘jayinlik qiladi».
17 Odamga* bo‘lsa quyidagilarni aytdi: «Xotiningning gapiga quloq solganing va Men: “Undan yema”,— deb buyurgan+ daraxtning mevasidan yeganing uchun, yer sen tufayli qarg‘ishga qoldi+. Umring bo‘yi azob ichida yer o‘stirgan hosilni yeysan+.
18 Yer senga tikan-u yantoq o‘stiradi va sen dasht o‘simliklarini yeb yurasan.
19 Sen tuproqdan yaralgansan+ va tuproqga qaytguningga qadar, peshona teri bilan non topib yeysan. Chunki sen tuproqdirsan va tuproqga qaytasan»+.
20 Shundan keyin Odam xotiniga Havo* deb ism berdi, chunki u insoniyatning* onasi bo‘lishi kerak edi+.
21 Tangri Yahova, Odam va uning xotiniga teridan uzun kiyim tayyorlab, ularni kiyintirib qo‘ydi+.
22 So‘ng Xudovand Yahova shunday dedi: «Mana, odam ham biz kabi nima yaxshi va nima yomon ekanini biladigan bo‘ldi+. Endi u qo‘l uzatib, hayot daraxtining+ mevasidan olib yemasligi va abadiy yashamasligi uchun...»
23 Shunday qilib, odam o‘zi olingan yerga+ ishlov bersin deb, Tangri Yahova uni Adan+ bog‘idan chiqarib yubordi.
24 Odamni quvib chiqargach, U hayot daraxtiga olib boradigan yo‘lni qo‘riqlash uchun, Adan bog‘ining sharqida karublarni*+ hamda doim aylanib turadigan olovli qilichni qo‘ydi.
