Pho kpẹ obo revun rọyen

Bro Iseri rẹ Jihova Yen Evunrẹ Akpọneje?

Bro Iseri rẹ Jihova Yen Evunrẹ Akpọneje?

2019 Iyẹnrẹn * rẹ Ukpe Ẹga rẹ

Ukeri rẹ Iseri rẹ Jihova vwẹ akpọneje

8,683,117

Ikoko

119,712

Ekuotọ Iseri rẹ Jihova de ghwoghwo

240

Mavọ yen ovwan kere ihwo rẹ ukoko ovwan?

Ihwo ri ghwoghwo iyẹnrẹn esiri rẹ Uvie rẹ Ọghẹnẹ na kemeranvwe kemeranvwe yẹn avwanre kere kerẹ Iseri rẹ Jihova. (Matiu 24:14) Ihwo re kerẹ na yen i re bromaphiyame re kerẹ iseri rẹ Jihova kugbe i re ji bromaphiyame-e, jẹ i muwan ri vwo ghwoghwota na.

A jẹ igho phiyotọ tavwen a ke dia Oseri?

Ẹjo. Ọ dia igho yen nẹrhẹ e kere ohwo kerẹ Oseri-i, ọ je dia iruo yẹrẹ uphẹ rẹga ra vwọ kẹ ohwo vwẹ ukoko rẹ avwanre-e. (Iruo Rẹ Iyinkọn Na 8:18-20) Vwọrẹ uyota, a tobọ riẹn ihwo ri ruẹ itetoro-o. Oseri vuọvo reyọ ọke, ẹgba, vẹ obo ro vwori vwo ruiruo rẹ avwanre vwẹ akpọeje kirobọ ri jere yẹrẹ oborẹ ẹdia rọyen hepha.—2 Kọrẹnt 9:7.

Mavọ yen ovwan ru riẹn ihwo ri ghwoghwo ota kemeranvwe kemeranvwe?

Kemeranvwe kemeranvwe, Iseri rẹ Jihova niyẹnrẹn rẹ iruo rẹ aghwoghwo rayen vwẹ ukoko rẹ ayen hepha. A gba ohwo niyẹnrẹn.

Ukoko ọvuọvo si iyẹnrẹn rẹ ihwo rehẹ evun rayen phiyotọ, ayen mi kuo kugbe, ayen me reyọ vwo rhe oghọn rẹ ukoko rayen. Oghon rẹ ukoko na me rha reyọ odjẹkoko rẹ iyẹnrẹn rẹ ẹkuotọ na eje vwo rhe esiri rẹ ukoko.

Vwẹ oba rẹ ukpe rẹ ẹga na, * ke se vughe uchunu rẹ Iseri rehẹ ẹkuotọ sansan vwẹ ukpe yena. Ukeri nana kọyen e kuẹ kugbe vwo vughe uchunu Iseri rehẹ akpọneje. Iyẹnrẹn ri nẹ ekuotọ sansan rhe, kerẹ obo re rhiẹromrẹ vwẹ iruo rẹ aghwoghwo na kọyen a teyan phiyọ Yearbook of Jehovah’s Witnesses. Iyẹnrẹn nana phiuduphiyawọ rẹ avwanre kirobo rọ je hepha vwọ kẹ iniọvo rẹ ẹgbukpe ujorin ẹsosuọ.—Iruo Rẹ Iyinkọn Na 2:41; 4:4; 15:3.

Ovwan kere ihwo ri kpo ukoko rẹ ovwan jẹ ayen ghwoghwota-a?

Dede nẹ avwanre ghwe kere ihwo tiọyena ba uchunu rẹ Iseri-i, avwanre dede ayen vwẹ ukoko rẹ avwanre. Buebun rayen cha Ẹkarophiyọ rẹ Ughwu rẹ Jesu, ọtiọyena, ke se vughe uchunu rẹ ihwo nana siẹrẹ e de si Iseri rẹ Jihova rehẹ etiyin vwo nẹ ihwo eje ri rhe omẹvwa na. Vwẹ 2019, ihwo re rhe Ẹkarophiyọ na da dia 20,919,041.

Ihwo buebun ri kpo uyono rẹ avwanre dede-e, sa mrẹ erere nẹ ọrhuẹrẹphiyotọ rẹ uyono rẹ Baibol rẹ ọphẹ.. Vwẹ 2019, ihwo rẹ avwanre reyọ Baibol na yono bun tẹ 9,618,182 kemeranvwe kemeranvwe, ọkiọvo e se yono ihwo buebun vwẹ ọke vuọvo.

Diesọrọ uchunu rẹ Iseri rẹ igọmẹti vwọphia vwọ bun vrẹ ọ rẹ ovwan vwọphia?

Ihwo rẹ Igọmẹti reyọ ukeri rayen phia vwẹ ọke rẹ ayen da nọ ihwo kpahen oka rẹ ẹga rẹ ayen ra. Kerẹ udje, Akon rẹ Iruo rẹ Ikekeri rọhẹ U.S. tare nẹ, ayen de ruiruo rayen “kẹ ayen guọnọ riẹn se ihwo rẹ ayen nọ na rhọnvwe phiyọ uyono rẹ ẹga na,” ayen da je tanẹ “oborẹ ihwo na tare yen ayen reyọ.” Vwọ fẹnẹ ọyena, ihwo ri ghwoghwota kẹ ihwo efa je niyẹnrẹn rẹ iruo rayen yen avwanre kere kerẹ Iseri rẹ Jihova, ọ ghwa dia ihwo ri se oma rayen nẹ ayen Iseri-i.

^ e?ko. 2 September 1 fiẹ August 31 rẹ ukpe rọ vwọ kpahọn, yen ukpe rẹ ẹga ọvo rẹ avwanre. Kerẹ udje, ukpe rẹ ẹga rẹ 2015 tonphiyọ nẹ September 1, 2014, fiẹ August 31, 2015.

^ e?ko. 16 September 1 fiẹ August 31 rẹ ukpe rọ vwọ kpahọn, yen ukpe rẹ ẹga ọvo rẹ avwanre. Kerẹ udje, ukpe rẹ ẹga rẹ 2015 tonphiyọ nẹ September 1, 2014, fiẹ August 31, 2015.