Pho kpẹ obo revun rọyen

ENỌ RẸ IGHENE NỌ

Mavọ me sa Vwọ ta Ota kẹ Ọsẹ vẹ Oni mẹ Kpahen Irhi rẹ Ayen Vwo Mu?

Mavọ me sa Vwọ ta Ota kẹ Ọsẹ vẹ Oni mẹ Kpahen Irhi rẹ Ayen Vwo Mu?

“Irhi rẹ ọsẹ vẹ oni mẹ shephiyọ ovwẹ oma ọke me vwọ hẹ ẹgbukpe 15, ẹkẹvuọvo mi vwo te ẹgbukpe 19 ki mi no nẹ ofori nẹ mi brorhiẹn komobọ.”—Sylvia.

Oka rẹ iroro ro rhe Sylvia na yen ji rhe we? Ọ da dia ọtiọyen, uyovwinrota nana cha nẹrhẹ wo se nene ọsẹ vẹ oni wẹn rhuẹrẹ ẹdia na phiyọ.

 Obo ro fori nẹ wọ riẹn

Tavwen wo ki nene ọsẹ vẹ oni wẹn ta ota kpahen irhi rẹ ayen vwo mu, roro kpahen ẹkpo nana:

  • Akpeyeren rẹ urhi kanre che se yovwi-in. Roro kpahen idjerhe rẹ imoto wan mamọ. Die yen cha phia siẹrẹ e rhe mu oka phiyọ asan vuọvo-o, irhukpẹ vẹ irhi ri suẹn oya rẹ imoto je herọ-ọ? Kerẹ irhi ri suẹn oyan rẹ imoto, irhi ra vwọphia vwẹ uwevwin cha nẹrhẹ oma se fun ihwo eje.

  • Irhi rẹ ọsẹ vẹ oni wẹn vwo mu djephia nẹ ayen vwo ẹguọnọ wẹn. Ayen rha vwẹ irhi vwo mu-u, kọyen ayen davwerhọ rẹ oborẹ wo yeren akpọ wa-an. Ẹro vọ yen wo che vwo ni ayen?

WỌ RIẸNRE? Emiọvwọn ji vwo irhi rẹ ayen nene! O rhe muwẹro-o, gbe se Jẹnẹsis 2:24; Urhi Rivẹ 6:6, 7; Ẹfesọs 6:4; kugbe 1 Timoti 5:8.

Die yen wo che ru siẹrẹ wo de ji no nẹ ọse vẹ oni wẹn reyọ irhi rayen vwo shenyẹ wẹ?

 Obo wo se ru

Roro kpahen ẹkpo nana tavwen wo ki nene ọsẹ vẹ oni wẹn ta ota. Wo vwo ẹkuruemu wo vwo nene irhi rẹ ọsẹ vẹ oni wẹn vwo mu? Wo rhe vwo ẹkuruemu tiọye-en, kọyen ọnana dia ọke ro fori nẹ wọ vwọ vuẹ ayen nẹ ayen si obọ rẹ irhi rayen kpotọ-ọ. Ukperẹ ọtiọyen, ni uyovwinrota na, “Mavọ Yen Ọsẹ vẹ Oni Mẹ Sa Vwọ Vwẹroso Ovwẹ?

Ọ da dianẹ wo nene irhi rayen ọkieje, gbe muegbe rẹ oborẹ wọ cha vuẹ ọsẹ vẹ oni wẹn. Wo de si oborẹ wọ guọnọ vuẹ ayen phiyọtọ, ọ cha nẹrhẹ wọ riẹn sẹ obo vwọ guọnọ ta na shephiyọ. Wo de ru ọyena nu, gba vuẹ ọsẹ vẹ oni wẹn nẹ ayen jẹ ọke vẹ asan ro shephiyọ, ru wọ da sa ta ota kẹ ayen. Karophiyọ ẹkpo nana ọke wo de nene ayen ta ota:

Ta ota vẹ ọghọ. Baibol na da ta: “Ota gbaegbae kpara ophu.” (Isẹ 15:1) Wọ me karophiyọ ọnana: Wọ cha mrẹ erere vuọvo nẹ otaẹtakuẹgbe na rhe siẹrẹ wo de nene ọsẹ vẹ oni wẹn kunu yẹrẹ vuẹ ayen nẹ ayen shenyẹ wẹ-ẹ.

“Mi de muọghọ kẹ ọsẹ vẹ oni mẹ, kẹ ayen ji muọghọ kẹ vwẹ. Ọghọ da herọ, kọ nẹrhẹ a sa fobọ vwo ẹruọ rẹ ohwohwo.”—Bianca, 19.

Kerhọ. Baibol na vuẹ avwanre nẹ, e ja “fobọ nyo ẹme, [a] fobọ, kpahe ota-a.” (Jems 1:19) Karophiyọ nẹ wẹ vẹ ọsẹ vẹ oni wẹn yen gba ta ota, ọ dia ota rotu yen wọ ta-a.

“Avwanre vwọ ghwanra cha na, avwanre se roro nẹ avwanre riẹn vrẹ esẹ vẹ ini rẹ avwanre, ẹkẹvuọvo ọyena dia uyota-a. Ofori nẹ avwanre kerhọ rẹ uchebro rayen.”—Devan, 20.

Dje Erorokẹ phia. Davwen wo vwo ẹruọ rẹ ọsẹ vẹ oni wẹn. Nene uchebro ri Baibol rọ tare nẹ “ohwo guọnọ erhuvwu rẹ oma rọye ọvo-o, ẹkẹvuọvo [a] je guọnọ erhuvwu rẹ ihwo efa.”—vwẹ ẹdia nana, erhuvwu rẹ ọsẹ vẹ oni wẹn yen wọ cha guọnọ.—Filipae 2:4.

Ọvọ yen cha ma wian?

“Dẹvure mi niro nẹ ọsẹ vẹ oni vwọso vwẹ. Jẹ, me rhe mrẹvughe re nẹ ayen di yono oborẹ ayen sa vwọ dia omamọ rẹ emiọvwọn kirobo mi ji yono oborẹ me sa vwọ dia uvi rẹ omiragua. Ẹguọnọ yen mu ayen vwo ru erọnvwọn eje rẹ ayen ruru.”—Joshua, 21.

Vwẹ iroroẹjẹ phia. Reyọ phiyọ nẹ ọsẹ vẹ oni wẹn jurhi kẹ wẹ nẹ wọ djẹ imoto kpo ipati rẹ ugbo rọyen cha reyọ unọke ọvo-o. Gba guọnọ oboresorọ ayen vwọ sen—ọke rọ cha reyọ wo ki te etiyin yen sorọ, gbane ipati na je aye-en?

  • Ọ da dia fikirẹ oborẹ asan na sheri te, ayen cha rhọnvwe kẹ wẹ siẹrẹ ohwo ọfa rọ nabọ riẹn imoto djẹ de nene uwe?

  • Ọ da dianẹ ipati na yen sorọ, imuẹro vọ yen wọ sa vwọ kẹ ayen kpahen oka rẹ ihwo re cha ra vẹ ohwo ro che sun ọrhuẹrẹphiyotọ na?

Karophiyọ ta ota vẹ ọghọ, je nabọ jomaotọ kerhọ rẹ ọsẹ vẹ oni wẹn siẹrẹ ayen da ta ota. Jẹ eta vẹ uruemu wẹn djephia nẹ wo “mu ọghọ kẹ ọsẹ wẹn vẹ oni wẹn.” (Ẹfesọs 6:2, 3) Ayen che wene ẹwẹn? Ọkiọvo. Obo rọ wanre eje, ofori nẹ wo ru erọnvwọn nana . . .

Muọghọ kẹ orhiẹn rẹ ọse vẹ oni wẹn bruru. Ọnana owọẹjẹ ọghanghanre ọvo rẹ ihwo buebun nẹ kuẹrofia. Wo de nene ọsẹ vẹ oni wẹn kunu kidie nẹ oborẹ wọ guọnọ te we obọ-ọ, kọ cha bẹn ru wo vwo nene ayen ta ota kugbe ọke ọfa. Jẹ, wo de ru nene oborẹ ayen tare, kẹ ayen se si obọ rẹ irhi evo rẹ ayen vwo mu enẹna kpotọ.