Pho kpẹ obo revun rọyen

ENỌ RẸ IGHENE NỌ

Me Da Hẹ Ẹdia rẹ Ọruvwohwo Vwo?

Me Da Hẹ Ẹdia rẹ Ọruvwohwo Vwo?

Vwọ kẹ ihwo evo, o vwo emu vuọvo rọ bra nọ ayen vwọ dia uwevwin vwẹ oghẹruvo fikirẹ osio rọ rhọ-ọ, ayen che se ru emu yẹrẹ kpo asan vuọvo-o. “Vwẹ ọke ọtiọyena, mi mi di mu chidia, me riẹn oborẹ mi che ru-u.” Ọtiọyen eghene ọvo re se Robert tare.

Wọ mrẹ oma wẹn vwẹ ẹdia tiọyen jovwo re? Ọ da dia ọtiọyen, kọyen uyovwinrota nana cha vwẹ ukẹcha kẹ wẹ!

 Oborẹ ofori nẹ wọ riẹn

  • Ọkiọvo, a vwọ vwẹ ekuakua ri sherhe ruiruo cha sa vwẹ ukẹcha phia-a.

    Wọ sa ghwọrọ ọke vwẹ intanẹti, ẹkẹvuọvo, ọ sa djẹ wẹ erọnvwọn efa eruo, ọ me tobọ toroba ẹdia rẹ ọruvwohwo na. Jeremy rọhẹ ẹgbukpe 21 tare: “Wọ cha mrẹ nẹ wọ de tẹnrovi ikọmputa yẹrẹ ifonu na, jẹ ẹwẹn wẹn herọ-ọ.”

    Eghene aye re se Elena je ta: “O vwo asan rẹ erọnvwọn ri sherhe sa vwẹ ukẹcha kẹ wẹ te, o mu ẹwẹn wẹn vwo nẹ obo re ghene phia, ọke wo de phi ifonu wẹn phiyotọ, ofu rẹ akpọ kọ cha rhoma dje we phiyọ!”

  • Uruemu wẹn sa nẹrhẹ ẹdia na yovwin.

    Wo se phi ẹdia rẹ ọruvwohwo kparobọ kidie nẹ erọnvwọn buebun herọ wo che ru? Ọdavwẹ wo vwo kpahen obo wo ruẹ yen che djephia. Kerẹ udje, eghene ọmọtẹ re se Karen Karophiyọ: “Ofu rẹ isikuru dje vwe, dede nẹ mi vwo erọnvwọn buebun rẹ mi che ru. Ofori nẹ wo mu ẹwẹn phiyọ oborẹ wo ruẹ rere ofu vwo jẹ owẹ edje.”

Wọ riẹnre? “Emu vuọvo herọ re che ru-u” nẹrhẹ ohwo dia ẹdia rẹ ọruvwohwo-o, ukperẹ ọtiọyen, o rhie uphẹn phiyọ e se vwo ru erọnvwọn efa.

Ọke rẹ wo vwori, ọyen otọ ro yovwẹn emu, ro se rhie uphẹn phiyọ wo vwo ru erọnvwọn efa

 Obo wo se ru

Vwo oruru kpahen erọnvwọn efa. Mu igbeyan kpokpọ. Ru orọnvwọn kpokpọ. Yono kpahen erọnvwọn kpokpọ. Ọ cha bẹn ihwo ri vwo ọdavwẹ kpahen erọnvwọn sansan vwọ dia ẹdia rẹ ọruvwohwo siẹrẹ ayen ọvo da herọ yẹrẹ ayen vẹ ihwo efa da herọ!

Uyono rẹ Baibol: “Kemu kemu rẹ obọ wẹn se ru, vwẹ ogangan wẹn ruo.”—Aghwoghwo 9:10.

“O ji rhi kri nọ re mi ton eyono rẹ Mandarin Chinese phiyọ-ọ, eyono rẹ kẹdẹ kẹdẹ tiọyena nẹrhẹ mi rhi riẹn nẹ oka rẹ uyono yena ghini yovwin mamọ. Ọ vwerhe ovwẹ oma kidie mi vwo orọnvwọn mi che ru. Ọ nẹrhẹ mi vwo oborẹ mi mu ẹwẹn kpahan, ọ je nẹrhẹ me reyọ ọke mẹ vwo ruiruo vwẹ idjerhe ro fierere kẹ vwẹ.”—Melinda.

Mu ẹwẹn kpahen obo wọ guọnọ ru. Wọ da mrẹ nẹ erhuvwu nẹ obo wo ruẹ cha, ọdavwẹ wẹn kọ cha ganphiyọ. Owenẹ ọ dia ovwian rẹ isikuru wẹn, ofu rhe che dje we siẹrẹ wọ da riẹn ọdavwẹ wẹ-ẹn.

Uyono rẹ Baibol: “Emu ọfa rha herọ ro yovwi ko ohwo-o jokpa nẹ ọ gba re . . . avwerhe rẹ owian rọye.”—Aghwoghwo 2:24.

Vwẹ oba rẹ isikuru mẹ, ke me ghwọrọ inọke ẹrenren vwo se ẹbe kẹdẹ kẹdẹ, kidie mi se ẹbe vwẹ obuko jovwo-o. Ofu dje vwe? Ẹjo, kidie ọyen obo mi brorhiẹn nẹ mi che ru. Mi mu ẹwẹn kpahen erere ro che norhe, kọyen ọke mi che vwo wontọ, ọnana kọ kẹ vwẹ oruru.”—Hannah.

Rhiabọreyọ obo wo che se wene-e. Tobọ vwẹ orọnvwọn ro me je ohwo re ruẹ, a je mrẹ ọmọke rẹ ohwo vwọ dia ẹdia rẹ ọruvwohwo. Vwọba, igbeyan re ma kẹre owẹ ji se ku we phiyotọ ọkiọvo, jẹ o vwo obo wo che se ru-u. Ukpe wọ vwọ nẹrhẹ ẹdia na sun we, ji muomaphiyọ, gba davwẹngba wọ vwẹ ẹro abavo vwo ni erọnvwọn.

Uyono rẹ Baibol: “Udu sasasa ria orẹ kọke kọke.”—Isẹ 15:15.

“Ugbeyan mẹ vuẹ vwẹ nẹ me riavwerhe rẹ ọke rẹ mẹvwẹ ọvo da herọ. Ọ tare nẹ me vwọ riẹn obo ra vwẹ ẹro abavo vwo ni ọke rẹ mẹvwẹ vẹ ohwo da herọ vẹ ọke rẹ mẹvwẹ ọvo da herọ, ọyen uvi rẹ uyono vwẹ akpeyeren ro fori nẹ kohwo kohwo yono.”—Ivy.