Pho kpẹ obo revun rọyen

Die Yen Baibol na Ta kpahen Yutaneshia?

Die Yen Baibol na Ta kpahen Yutaneshia?

Ẹkpahọnphiyọ rẹ Baibol na

Baibol na ghwa ta ota kpahen yutaneshia-a. * Jẹ, obo rọ ta kpahen arhọ vẹ ughwu chọn avwanre uko vwọ vwẹ ẹro abavo vwo ni uruemu na. Baibol na tare nẹ a vwọ so ughwu rẹ ohwo chọre, jẹ o vwo urhi vuọvo rọ tare nẹ a davwẹngba ọgangan vwo sivwin ohwo ro si ọghrọrọ rẹ ughwu-u.

Baibol na djerephia nẹ Ọghẹnẹ yen Ọmemama rẹ avwanre, obọ rọyen yen “ogbugbu rẹ arhọ” hepha. (Une Rẹ Ejiro 36:9; Iruo Rẹ Iyinkọn Na 17:28) Arhọ pha ghanghanre vwẹ ẹro rẹ Ọghẹnẹ. Kọyensorọ Ọghẹnẹ vwo brorhiẹn hwe uruemu ra vwọ reyọ arhọ romobọ yẹrẹ ọ rẹ ohwo ọfa. (Eyanno 20:13; 1 Jọn 3:15) Vwọba, Baibol na tare nẹ ofori avwanre vwọ jomaotọ sẹro rẹ arhọ avwanre vẹ ọ rẹ ihwo efa. (Urhi Rivẹ 22:8) Ophẹnri nẹ Ọghẹnẹ guọnọre nẹ avwanre vwẹ ẹro ọghanghanre vwo ni arhọ.

Ọ da rha dianẹ ohwo muọga re che sivwi-in vwo?

Baibol na rhọnvwephiyọ uruemu ra vwọ reyọ arhọ rẹ ohwo-o, ọ da tobọ dianẹ ohwo na hirharoku ughwu rọ cha sa vrabọ rọye-en. Udje rẹ Ovie Sọl rẹ Izrẹl rhọnvwephiyọ ota nana. Ọke rọ vwọ wan oma brabra vwẹ ofovwin, ọ da ta kẹ odibo rọyen nẹ ọ reyọ arhọ rọyen. (1 Samuẹl 31:3,4) Odibo rẹ Sọl na senre. Ẹkẹvuọvo, ọshare ọfa de gun efian nẹ ọyen ri hwe Sọl kirobo rẹ Sọl guọnọre. Devid rọ dia ohwo rọ vwẹ ẹro rẹ Ọghẹnẹ vwo ni ota vwo no, de brorhiẹn rẹ ughwu hwe ọshare na kidie ọ riabe rẹ ọbara.—2 Samuẹl 1:6-16.

Ofori nẹ e ru kemu kemu vwo si arhọ rẹ ohwo gron?

O de ghini muẹro nẹ ohwo che ghwu, Baibol na tare nẹ e si ọke rẹ ughwu na gro-on. Ukperẹ ọtiọyen, o dje ẹro abavo re vwo ni ota na. Ughwu ọyen ọvweghrẹn rẹ avwanre, ọyen osa rẹ umwemwu. (Rom 5:12; 1 Kọrẹnt 15:26) Dede nẹ ọ dianẹ a guọnọ-ọ, jẹ o vwo oboresorọ a vwọ djoshọ rẹ ughwu-u, kidie Ọghẹnẹ veri nẹ ọ cha rhọvwọn ihwo ri ghwuru. (Jọn 6:39, 40) Ohwo ro muọghọ kẹ arhọ cha nabọ guọnọ ona omaesivwon ro me yovwin. Jẹ ọ dia o mudiaphiyọ nẹ ọ cha guọnọ ona rẹ emaesivwon ro che si arhọ rẹ ohwo ro che ghwu nonẹ gbodẹ gro-on.

Kẹ e vwo hwe eranvwe rọ muọga re che se sivwin yẹrẹ rọ wan oma brabra vwo?

Ẹjo, Baibol na kere e vwo hwe omobọ ba imwemwu re che je vwo ghovwo-o. Dede nẹ ọyen umwemwu re vwo hwe oma rẹ ohwo, * Ọghẹnẹ nabọ vwo ẹruọ rẹ erọnvwọn re sa nẹrhẹ ohwo reyọ arhọ rọyen kerẹ ọga rẹ afọren, ofudjevwe ọgangan yẹrẹ obo ra riuku rọyen. (Une Rẹ Ejiro 103:13, 14) Ọghẹnẹ vwẹ uchebro kẹ ihwo ri hirharoku ofudjevwe vwevunrẹ Baibol na. Vwọba, Baibol na tare nẹ “evrẹnushi herọ kẹ ihwo te ihwo ọsoso te i ri jẹ ọsoso ẹdia.” (Iruo Rẹ Iyinkọn Na 24:15) Ọnana djerephia nẹ iphiẹrophiyọ herọ kẹ ihwo ri vwo echobọ re ganre mamọ, kerẹ ihwo ri hwe oma rayen.

^ e?ko. 3 A fan yutaneshia phiyọ “e vwo hwe ohwo rọ muọga yẹrẹ rọ wan oma re che se sivwi-in rere e vwo bru ojaẹriọ rọyen krẹ.” (Merriam-Webster Learner’s Dictionary) Vwẹ ẹdia evo, idọktọ yen chọn ohwo ọtiọyena uko vwọ reyọ arhọ rọyen.

^ e?ko. 10 Imihwo krẹn re djunute vwẹ Baibol na nẹ ayen hwe oma rayen dia ihwo ri ru ọhọre rẹ Ọghẹnẹ-ẹ.—2 Samuẹl 17:23; 1 Ivie 16:18; Matiu 27:3-5.