Pho kpẹ obo revun rọyen

Die Yen Baibol na ta Kpahen Udi Ọgangan? Udi Ẹda Ọyen Umwemwu?

Die Yen Baibol na ta Kpahen Udi Ọgangan? Udi Ẹda Ọyen Umwemwu?

Ẹkpahọnphiyọ rẹ Baibol na

Ọ dia umwemwu siẹrẹ ohwo da da emerha rẹ udi ọganga-an. Baibol na djisẹ rẹ udi kerẹ okẹ ro nẹ obọ rẹ Ọghẹnẹ rhe, ro se toroba omavwerhovwẹn rẹ ohwo. (Une Rẹ Ejiro 104:14, 15; Aghwoghwo 3:13; 9:7) Ọ je rhọnvwe nẹ a sa vwẹ wain vwọba sivwin oma.—1 Timoti 5:23.

Jesu da wain ọke rọ vwọ hẹ otọrakpọ na. (Matiu 26:29; Luk 7:34) Ọvo usun rẹ igbuvwunu ro ruru ra nabọ riẹn, yen ame ro wene kpo wain vwẹ orọnvwe ọvo rọ rare.—Jọn 2:1-10.

Imuoshọ re herọ siẹrẹ a da da udi bun nọ

Baibol na djunute asan rẹ udi de yovwin, ọ da rha vwọso udi ẹda vroma kugbe uruemu ra vwọ da udi buẹn nọ. Ọtiọyena, Onenikristi rọ guọnọ da udi mi noso nẹ umuche ọvo yen ọyen sa da. (1 Timoti 3:8; Taitọs 2:2, 3) Baibol na djunute erọnvwọn sansan re cha nẹrhẹ a kẹnoma kẹ uruemu ra vwọ da udi buẹn nọ.

  • Udi djobọte ẹgba iroro vẹ orhiẹn rẹ ohwo brẹ. (Isẹ 23:29-35) Ohwo rọ da udi vroma che se nene iji rẹ Baibol nana-a: “Ovwan . . . vwẹ oma rẹ ovwan ze izobo ọkpokpọ, rọ fonro ro fo ẹreyọ kẹ Ọghẹnẹ, kọye hẹ ẹga rẹ [ovwan vwẹ ẹgba iroro rẹ] ovwan ga.”—Rom 12:1.

  • Udi obuebun sa nẹrhẹ e mu ru, ji “mie [ohwo] iroro.”—Hosia 4:11; Ẹfesọs 5:18.

  • O se mu ohwo phiyọ okpọga, je nẹrhẹ a dia ovwiogbere.—Isẹ 23:21, 31, 32.

  • Udi ẹda vroma kugbe uruemu ra vwọ da udi obuebun tu Ọghẹnẹ oma.—Isẹ 23:20; Galesha 5:19-21.

Mavọ yen a cha da te a ke tanẹ o bun nọ?

A sa tanẹ ohwo da udi bun nọ re, siẹrẹ udi na da nẹrhẹ o mu oma rọyen yẹrẹ ihwo efa phiyọ ẹdia rẹ imuoshọ. Kirobo rẹ Baibol na tare, ọ dia ohwo che shero tavwen a ke sa tanẹ ọ da udi bun nọ re-e. Ẹkẹvuọvo, ọkiọvo ọ rha cha riẹn oma rọye-en, yẹrẹ ọ sa dianẹ o gele, mu eta ta, ji mu ihwo muẹ harhan. (Job 12:25; Une Rẹ Ejiro 107:27; Isẹ 23:29, 30, 33) Ohwo rha tobọ da vroma-a, iroro rọyen je sa “vọn vẹ . . . idiẹda,” o mi rhi rhiẹromrẹ odjadja ro no cha.—Luk 21:34, 35.

Omaẹkẹnẹ re karekare

Baibol na djunute ọke ro vwo fo nẹ Inenikristi kẹnoma kẹ idi egangan karekare:

  • Ọ da dianẹ ọ cha so ekprowọ kẹ ihwo efa.—Rom 14:21.

  • Urhi rẹ ẹkuotọ na da vwọsuọ.—Rom 13:1.

  • Siẹrẹ ohwo rhe se suẹn urhurusivwe rọyen kpahen udi-i. E jẹ ihwo ri vwo ẹkuruemu rẹ ayen vwọ da udi obuebun kugbe e re da vroma jowọ ro fori.—Matiu 5:29, 30.