Ẹkpahọnphiyọ rẹ Baibol na

E yono ihwo buebun nẹ a cha sa riẹn ihwo ri si Baibol na-a. Ẹkẹvuọvo, Baibol na djunute edẹ rẹ ihwo ri siro. Ẹbe evo rehẹ Baibol na tonphiyọ vẹ eta tiọna, “eta ri Nehemaya,” “aroẹmrẹ rẹ Aizaya,” kugbe “Ota rẹ Ọrovwohwo na ro bru Joẹl rhe.”—Nehemaya 1:1; Aizaya 1:1; Joẹl 1:1.

Ihwo buebun ri si Baibol na tarọ phephẹn nẹ, Jihova rọ dia Ọghẹnẹ rẹ uyota na ọyen kẹ ayen oborẹ ayen siri, ọ vwẹ ẹwẹn ọfuanfon rọyen vwọ kpọ iroro rayen. Emraro ri si ẹbẹre rẹ Baibol na ra vwẹ Hibru si, vwariẹn eta nana vrẹ abọ 300: “Enẹ Ọrovwohwo na tare.” (Emọs 1:3; Maika 2:3; Nahum 1:12) Jihova ji vwẹ evuẹ kẹ efa womarẹ emekashe.—Zekaraya 1:7, 9.

Omarẹ ihwo 40 yen si Baibol na uvwre rẹ ikpe re vrẹ 1,600. Evo usun rayen si vrẹ ọbe ọvo. Vwọrẹ uyota, Baibol na ghwa hẹ ilaibri otete ro vwo ẹbe 66. Ẹbe 39 yehẹ ẹbẹre ra vwẹ Hibru si na, rẹ ihwo buebun se nẹ, Ọphọ Awanre; ẹbẹre ra vwẹ Grik si, de rhe vwo ẹbe 27, ihwo buebun se nẹ, Ọphọ Ọkpokpọ na.