Pho kpẹ obo revun rọyen

Die Yen o Mudiaphiyọ Wo Vwo ‘Muọghọ kẹ Ọsẹ vẹ Oni Wẹn’?

Die Yen o Mudiaphiyọ Wo Vwo ‘Muọghọ kẹ Ọsẹ vẹ Oni Wẹn’?

Ẹkpahọnphiyọ rẹ Baibol Na

Abọ buebun yen iji na “mu ọghọ kẹ ọsẹ wẹn vẹ oni wẹn” vwomaphia vwẹ Baibol na. (Eyan. 20:12; Urhi Rivẹ 5:16; Matiu 15:4; Ẹfesọs 6:2, 3) O churobọ si erọnvwọn ẹne kiriguo.

  1. Dje ọdavwaro phia kẹ ayen. Wo muọghọ kẹ ọsẹ vẹ oni wẹn siẹrẹ wo de dje ọdavwaro phia kpahen emu eje rẹ ayen ru kẹ wẹ. Wo se dje ọdavwaro phia womarẹ wọ vwọ yọnrọn irhi ji nene odjekẹ rayen. (Isẹ 7:1, 2; 23:26) Baibol na jiriro kẹ wẹ nẹ wo ni ọsẹ vẹ oni wẹn kerẹ “urinrin” wẹn, kọyen jẹ oma rayen vwerhen owẹ.—Isẹ 17:6.

  2. Muọghọ kẹ usuon rayen. Marho vwẹ ọke rẹ eghene wẹn, wo se djephia nẹ wo muọghọ kẹ ọsẹ vẹ oni wẹn siẹrẹ wo de muọghọ kẹ ẹdia rẹ Ọghẹnẹ vwẹ ayen mu. Kọlose 3:20 da ta kẹ ighene: “Ovwan emọ, we mu ọghọ kẹ esẹ vẹ ini rẹ ovwan, fikiridie ọtiọna ri je Ọrovwohwo.” Ọke rẹ Jesu vwọ hẹ eghene, o muọghọ kẹ ọsẹ vẹ oni rọyen.—Luk 2:51.

  3. Muọghọ kẹ ayen. (Livitikọs 19:3; Hibru 12:9) Ọke buebun, ọnana churobọ si obo wọ ta vẹ obo wọ ta wan. Vwọrẹ uyota, esẹ vẹ ini evo ruẹ erọnvwọn re nẹrhẹ ọ bẹn e vwo muọghọ kẹ ayen ọkievo. Tobọ vwẹ ẹdia ọtiọyena, emọ se muọghọ kẹ esẹ vẹ ini rayen womarẹ ayen vwọ kẹnoma kẹ eta vẹ iruemu ri dje ọghọ phia-a. (Isẹ 30:17) Baibol na yonori nẹ ọyen umwemwu rode a vwọ ta ota omiomiovwin kpahen ọsẹ yẹrẹ oni ohwo.—Matiu 15:4.

  4. Vwẹrote ayen. Ọke rẹ ọsẹ vẹ oni wẹn da ghwo re, ayen cha guọnọ ukẹcha. Wo se muọghọ kẹ ayen womarẹ wọ vwọ davwẹngba wọ vwọ kẹ ayen oborẹ ayen guọnọre. (1 Timoti 5:4, 8) Kerẹ udje, tavwen Jesu ki ghwu, o de vwo ọrhuẹrẹphiyotọ ra vwọ vwẹrote oni rọyen.—Jọn 19:25-27.

Ororochọ kpahen ọghọ re muẹ kẹ ọsẹ vẹ oni rẹ ohwo

Ororochọ: Idjerhe ọvo wo vwo djephia nẹ wo muọghọ kẹ ọsẹ vẹ oni wẹn, ọyen wọ vwọ nẹrhẹ ayen sun orọnvwe wẹn.

Uyota: Baibol na yonori nẹ oyerinkugbe rẹ orọnvwe karo kẹ oyerinkugbe rẹ orua. Jẹnẹsis 2:24 tare: “Ọshare . . . yan jẹn ọsẹ rọye vẹ oni rọye vwo kọ . . . gbanọ aye rọye.” (Matiu 19:4, 5) Vwọrẹ uyota, ihwo re rọvwọnre sa mrẹ erere vwo nẹ uchebro rẹ esẹ vẹ ini rayen, yẹrẹ ihwo rẹ orua. (Isẹ 23:22) Ẹkẹvuọvo, ihwo re rọvwọnre vwo uturhi rẹ ayen vwo gberughwru phiyọ asan rẹ ihwo rẹ orua cha yan ba vwẹ orọnvwe rayen.—Matiu 19:6.

Ororochọ: Uturhi rẹ ọsẹ vẹ oni wẹn yen ma rho.

Uyota: Dede nẹ Ọghẹnẹ vwẹ uturhi kẹ ọsẹ vẹ oni vwẹ orua na, uturhi rẹ ihworakpọ ejobi basan, uturhi rẹ ohworakpọ rhonọ uturhi rẹ Ọghẹnẹ-ẹ. Kerẹ udje, ọke rẹ aguare rode vwo jurhi kẹ idibo rẹ Jesu nẹ ayen ru obo re fẹnẹ iji rẹ Ọghẹnẹ, ayen da: “Avwanre [che] mu ọghọ kẹ Ọghẹnẹ nọ ihwo rẹ akpọ.” (Iruo Rẹ Iyinkọn Na 5:27-29) Vwẹ idjerhe vuọvo na, emọ muọghọ kẹ esẹ vẹ ini rayen vwẹ “evun rẹ Ọrovwohwo,” kọyen, vwẹ erọnvwọn ejobi re vwọso irhi rẹ Ọghẹnẹ-ẹ.—Ẹfesọs 6:1.

Ororochọ: Ọghọemuo kẹ ọsẹ vẹ oni mudiaphiyọ nẹ wo che kpo ẹga rayen.

Uyota: Baibol na vuẹ avwanre nẹ a davwen obo re yono avwanre rere a vwọ riẹn sẹ uyono na ghene uyota na. (Iruo Rẹ Iyinkọn Na 17:11; 1 Jọn 4:1) Kohwo kohwo ro ru ọtiọyen sa rhe sane ẹga rọ fẹnẹ ọ rẹ ọsẹ vẹ oni rọyen. Baibol na djunute idibo rẹ Ọghẹnẹ evo re fuevun ri nene ẹga rẹ esẹ vẹ ini raye-en, evo rayen yen Ebraham, Rutu, vẹ ọyinkọn Pọl.—Joshua 24:2, 14, 15; Rutu 1:15, 16; Galesha 1:14-16, 22-24.

Ororochọ: Wo vwo djephia nẹ wo muọghọ kẹ ọsẹ vẹ oni wẹn, wo che vwobọ vwẹ irueru rẹ egagọ rẹ esẹ ride ri ghwure.

Uyota: Baibol na tare: “Ọrovwohwo Ọghẹnẹ wẹn ọvo ọye wọ ga, ọye ọvo wo shiguẹ kẹ.” (Luk 4:8) Ohwo rọ ga esẹ ride ri ghwure ru obo ri miovwon Ọghẹnẹ ivun. Vwọba, Baibol na yonori nẹ “ihwo ri ghwuru riẹn emu ọvuọvo-o.” Ayen riẹn kpahen ọghọ re muẹ kẹ aye-en; ayen cha sa vwẹ ukẹcha kẹ ihwo ri yerẹn yẹrẹ kon ayen oma-a.—Aghwoghwo 9:5, 10; Aizaya 8:19.