Pho kpẹ obo revun rọyen

Diesorọ Jesu Vwo Ghwu?

Diesorọ Jesu Vwo Ghwu?

Ẹkpahọnphiyọ rẹ Baibol na

Jesu ghwuru rere a sa vwọ vwẹ imwemwu rẹ ihworakpọ vwo ghovwo ayen, re ayen vwo vwo arhọ rẹ bẹdẹ. (Rom 6:23; Ẹfesọs 1:7) Ughwu rẹ Jesu ji djephia nẹ ohworakpọ sa fuevun kẹ Ọghẹnẹ tobọ vwẹ ọke ro de hirharoku ọdavwini ọgangan. Hibru 4:15.

Roro kpahen oborẹ ughwu rẹ ohwo ọvo se vwo ru erọnvwọn buebun wiẹn.

  1. Jesu ghwuru rere avwanre vwo “vwo evwoghovwo rẹ imwemwu.”—Kọlose 1:14.

    A ma ohwo rẹsosuọ Adam gbagba, umwemwu rhere oma-a. Ẹkẹvuọvo, ọ da jẹ ojẹ ro vwo ru obo re fẹnẹ iji rẹ Ọghẹnẹ. Jẹ ẹmienyo yẹrẹ umwemwu rẹ Adam djobọte emọ rọyen. Baibol na tare nẹ “ijọghọevwo rẹ ohwo ọvo ru ihwo buebu phihọ iruimwemwu.”—Rom 5:19.

    Jesu gbare, ẹkẹvuọvo, o ru umwemwu-u. Ọtiọyena, kọ sa rhe dia “ofuophu rẹ imwemwu rẹ avwanre.” (1 Jọn 2:2) Kirobo rẹ jẹ ẹmienyo rẹ Adam nẹrhẹ ihworakpọ ejobi dia irumwemwu na, eriyin ughwu rẹ Jesu si umwemwu no kẹ ihworakpọ ejobi ri vwo esegbuyota kpahọn.

    Adam shẹ ihworakpọ eje kẹ umwemwu. Jesu rọ vwẹ owenvwe romobọ vwo ghwu kẹ avwanre da rha dẹ ihworakpọ reyọ kẹ oma rọyen. Ọtiọyena, “ohwo de ru umwemwu, avwanre vwo obruche ọvo vwẹ obọ rẹ Ọsẹ, Jesu Kristi rẹ ọvwata na.”—1 Jọn 2:1.

  2. Jesu ghwuru “rere ohwo kohwo ro sere gbuyota vwo jẹ ghwọrọ ẹkẹvuọvo ko vwo arhọ ri bẹdẹ.”—Jọn 3:16.

    Dede nẹ a ma Adam re ọ vwọ dia bẹdẹ, umwemwu rọyen da ghwa ughwu rhe. Womarẹ Adam yẹn “umwemwu wan . . . rhe akpọ, rẹ ughwu da wan oma rẹ umwemwu rhe na, ọtiọye na ughwu da hrabọ ro ihwo ejobi fikiridie ihwo ejobi ru umwemwu.”—Rom 5:12.

    Vwọ fẹnẹ ọyena, ọ dia ekan rẹ umwemwu ọvo yen ughwu rẹ Jesu si no-o, o ji si ughwu no kẹ ihwo ejobi ri vwo esegbuyota kpahọn. Baibol na djẹ ota na koko enẹ: “Kirobo rẹ umwemwu ria vwẹ evun rẹ ughwu na, ọtiọye rhe ẹserọphẹ je wan oma rẹ ọvwata re re te arhọ ri bẹdẹ vwẹ oma ri Jesu Kristi Ọrovwavwanre.”—Rom 5:21.

    Vwọrẹ uyota, akpeyeren rẹ ohworakpọ nonẹna grori-in. Ẹkẹvuọvo, Ọghẹnẹ veri nẹ ọ cha kẹ ihworakpọ re fuevun arhọ rẹ bẹdẹ, je rhọvwọn ihwo ri ghwuru nushi rere ayen je mrẹ erere vwo nẹ ughwu rẹ Jesu.—Une Rẹ Ejiro 37:29; 1 Kọrẹnt 15:22.

  3. Jesu “mu ọghọ phihọ oma rhiri re te ughwu,” ọtiọyena, o de djephia nẹ ohworakpọ sa fuevun kẹ Ọghẹnẹ tobọ vwẹ ọke ro de hirharoku ọdavwini ọgangan.—Filipae 2:8.

    Dede nẹ iroro vẹ ugboma rọyen gbare, Adam kerhọ rẹ Ọghẹnẹ-ẹ, kidie ọ guọnọ orọnvwọn rọ dia ọrọye-en. (Jẹnẹsis 2:16, 17; 3:6) Ọyena vwọ wan nu, Eshu rọ dia ọvweghrẹn rẹ Ọghẹnẹ da tanẹ o vwo ohworakpọ vuọvo rọ cha vwẹ owenvwe rọyen ga Ọghẹnẹ-ẹ, marho ọ da dianẹ arhọ rọyen hẹ ẹdia imuoshọ. (Job 2:4) Dedena, Jesu rọ dia ohwo rọ gbare kerhọ rẹ Ọghẹnẹ, je fuevun kẹ tobọ te ẹdia ro de ghwu ughwu rẹ odjadja vẹ ophọphọvwe. (Hibru 7:26) Ọnana da ghwa rhuẹrẹ ota na phiyọ: Ohworakpọ sa fuevun kẹ Ọghẹnẹ, o toro ọdavwini ro hirharoku-u.

Enọ kpahen ughwu rẹ Jesu

  • Diesorọ o vwo fo nẹ Jesu rioja, ji ghwu re o vwo sivwin ihworakpọ? Diesorọ rẹ Ọghẹnẹ ghwe si ekan rẹ ughwu na no-o?

    Urhi rẹ Ọghẹnẹ tare nẹ “osa rẹ umwemwu hẹ ughwu.” (Rom 6:23) Ukpe ro vwo si urhi na nu kẹ Adam, Ọghẹnẹ da vuẹ nẹ osa rẹ jẹ ẹmienyo ọyen ughwu. (Jẹnẹsis 3:3) Ọke rẹ Adam vwo ru umwemwu, “Ọghẹnẹ rẹ uyota na” de ru obo rọ tare. (Taitọs 1:2) Ọ dia umwemwu ọvo yen emọ rẹ Adam riuku rọyen mie-e, ayen ji riuku rẹ ughwu.

    Vwọrẹ uyota, ughwu yen osa ro fo kẹ ihworakpọ re dia irumwemwu, ẹkẹvuọvo, Ọghẹnẹ de dje arodọnvwẹ kẹ ayen “kirobo rẹ ẹserọphẹ rọye bute.” (Ẹfesọs 1:7) Ọghẹnẹ ji Jesu rhe, rhi ze izobo rọ gbare vwọ kẹ ihworakpọ, ọnana arodọnvwẹ ra mrẹ vwo dje-e.

  • Ọke vọ yen Jesu vwo ghwu?

    Jesu ghwuru vwẹ “unọke irhiri,” vwo nẹ ọke rẹ ọnre vwọ va cha, yẹrẹ omarẹ ugọjọ erha vwẹ oghẹruvo rẹ Ọwanvrẹn rẹ ihwo rẹ Ju. (Mak 15:33-37) Vwo nene ikekeri rẹ ọke avwanre na, ẹdẹ yena shephiyọ Friday, April 1, 33 C.E.

  • Tivọ yen Jesu de ghwu?

    E hwe Jesu vwẹ “asan re se nẹ asan rẹ ekpehre uyovwi, re se vwi Hibru Gọlgọta.” (Jọn 19:17, 18) Asan nana hẹ evunrẹ “obo ughere” rẹ Jerusalẹm vwẹ ọke rẹ Jesu. (Hibru 13:12) Baibol na vwọ tanẹ ihwo evo ni Jesu “vwẹ ugboko” ọke re vwo hwe na, kọyen ọ sa dianẹ ugbenu yen asan na hepha. (Mak 15:40) Ẹkẹvuọvo, a ghwa riẹn asan rẹ Gọlgọta hepha enẹna-a.

  • Mavọ yen Jesu ghwu wan?

    Dede nẹ ihwo buebun vwo imuẹro nẹ e hwe Jesu mu agbagba, jẹ Baibol na tare nẹ “urhe” yen e hwe Jesu mu. (Iruo Rẹ Iyinkọn Na 5:13) Ihwo ri si Baibol na vwẹ eta rẹ Grik ivẹ stau·rosʹ vẹ xyʹlon vwo dje orọnvwọn re vwo hwe Jesu. Buebun rẹ ihwo ri yono ẹbe kodo tare nẹ eta nana mudiaphiyọ urhe ro mudia goi yẹrẹ ubrurhe.

  • Mavọ yen ofori nẹ a karophiyọ ughwu rẹ Jesu wan?

    Vwẹ ason rẹ orẹ rẹ Ọwanvrẹn rẹ ihwo rẹ Ju re ruẹ kukpe kukpe, Jesu da ton irueru ọvo phiyọ vẹ idibo rọyen, o de ji iji kẹ ayen: “Ru ọnana vwọ karohọ ovwẹ.” (1 Kọrẹnt 11:24) Inọke evo vwọ wan nu, e de hwe Jesu.

    Ihwo ri si Baibol na vwẹ Jesu vwo dje omogodẹ re vwo ze izobo rẹ Ọwanvrẹn na. (1 Kọrẹnt 5:7) Kirobo rẹ orẹ rẹ Ọwanvrẹn na nẹrhẹ ihwo rẹ Izrẹl karophiyọ nẹ e sivwin ayen vwo nẹ eviẹn na, ọtiọyen yen Ẹkarophiyọ rẹ Ughwu rẹ Jesu Kristi na je nẹrhẹ Inenikristi karophiyọ nẹ e sivwin ayen vwo nẹ umwemwu vẹ ughwu. Orẹ rẹ Ọwanvrẹn na ọyen orẹ re ruẹ kukpe kupke vwẹ Nisan 14 kirobo rọ hepha vwẹ lunar kalẹnda, vwẹ idjerhe vuọvo na, obọvo ẹgbukpe yen Inenikristi rẹsosuọ ji ru Ẹkarophiyọ na.

    Kukpe kukpe, vwẹ ẹdẹ ro shephiyọ Nisan 14, ihwo oduduru buebun vwẹ akpọ na eje ji ruẹ ẹkarophiyọ rẹ ughwu rẹ Jesu.