Pho kpẹ obo revun rọyen

BAIBOL NA WENE OHWO

“Enọ mi Vwori Bun Vrẹ Ẹkpahenphiyọ ra Vwọ kẹ Vwẹ”

“Enọ mi Vwori Bun Vrẹ Ẹkpahenphiyọ ra Vwọ kẹ Vwẹ”
  • Ukpe re vwiẹrẹ: 1976

  • Ẹkuotọ ro Nurhe: Honduras

  • Akpọ ro Yerin Jovwo: Olori ẹga

AKPỌ MI YERIN JOVWO

La Ceiba vwẹ Honduras yen e de vwiẹ vwẹ, mẹvwẹ yen ọ rẹ ọtete kugbe ọmọshare vuọvo vwẹ usun rẹ emọ iyorin. Mẹvwẹ ọvo yen ji odin vwẹ orua avwanre. Orua avwanre dia ekogho ro muoshọ mamọ, avwanre jẹ ivwiogbere. Ekuakua da rhoma rhe ganphiyọ ọke rẹ ọsẹ mẹ vwo ghwu vwẹ asidẹnti vwẹ asan ro de ruiruo; me hẹ ẹgbukpe ẹne ọke yena.

Oni mẹ nabọ davwẹngba vwọ vwẹrote vwẹ vẹ iniọvo mẹ, ẹkẹvuọvo ọ fobọ mrẹ igho vwọ dẹ iwun kẹ vwẹ-ẹ. Osio da rhọ ekpahen ko mu vwe, kidie mi vwo iwun ra vwọ djẹ ekpahe-en.

Me vwọ ghwanra cha na, mi de yono Ephẹrẹ rẹ Idin ri Honduras (re ji se LESHO) ri mi vwo nene idin efa ta ota. Ẹkẹvuọvo, oni mẹ vẹ iniọvo mẹ se vwo ẹruọ rẹ ephẹrẹ rẹ idi-in, jẹ ayen sa vwẹ abọ vwo ru udje kẹ vwẹ. Dedena, oni mẹ vwo ẹguọnọ mẹ mamọ, ọ je sẹro mẹ vwo nẹ abọ rẹ okpetu. Ọ vwẹ abọ vwo ru udje kẹ vwẹ vwo si vwe orhọ kpahen isigati ephopho vẹ udi ẹda vroma. Oma vwerhen ovwẹ nẹ orhọn-esio rọyen na chọn vwẹ uko vwọ kẹnoma kẹ isigati ephopho vẹ udi ẹda vroma.

Me vwọ hẹ ọmọtete, oni mẹ vwo ẹkuruemu ro vwo mu vwe nene oma kpo ishọshi ri fada, ẹkẹvuọvo me vwo ẹruọ rẹ obo ra ta vwẹ oboyi-in, kidie o vwo ohwo vuọvo rọ fan eta na kẹ vwẹ vwẹ ephẹrẹ rẹ idi-in. Me vwọ hẹ ẹgbukpe ihwe, ofu rẹ ẹga na de dje vwe te asan me vwọ dobọ rọyen ji. Dedena, me je guọnọ riẹn kpahen Ọghẹnẹ.

Vwẹ ukpe ri 1999, me vwọ hẹ ẹgbukpe 23, me da mrẹ aye ọvo ro nẹ United States rhe, ro kpo ishọshi ọvo re se Inter-community Church of God. O de yono uvwe ikuegbe ri Baibol kugbe Ephẹrẹ rẹ Idin ọfa rẹ America (re ji se ASL). Oborẹ mi yonori nẹ Baibol na je vwe te asan mi vwo brorhiẹn nẹ me cha dia olori ẹga. Ọtiọyena, mi de kpo isikuru ọvo vwẹ Puerto Rico re de yono idin re guọnọ dia ilori ẹga. Mi vwo rhivwin rhe La Ceiba vwẹ 2002, igbeyan mẹ evo da chọn vwẹ uko vwo rhie ishọshi rẹ idin ọvo. Ọvo usun rayen re se Patricia kọyen rhe dia aye mẹ ukuko na.

Kerẹ olori ẹga rẹ ishọshi na, me vwẹ Ephẹrẹ rẹ Idin ri Honduras vwọ ta ota rotu, dje ifoto rẹ ikuegbe ri Baibol, ji ruẹ udje rọyen, rere idin na se vwo vwo ẹruọ rẹ obo me ta. Me je kọn bru idin re dia irere re kẹrẹ ovwẹ, rere me sa vwọ bọn ayen gan je chọn ayen uko vwọ rhuẹrẹ ebẹnbẹn rayen phiyọ. Me tobọ kpo ẹkuotọ rẹ United States vẹ Zambia re ghwoghwo. Jẹ, a vwọ ta uyota me ghwa nabọ riẹn Baibol na-a. Obo re yono uvwe vẹ oborẹ mi vwo ẹruọ rẹ ifoto na wan yen mi ji vwo yono ihwo. Vwọrẹ uyota, mi vwo enọ buebun ra sa kpahenphiyọ-ọ.

Ẹdẹ ọvo, mi de nyo nẹ eya erha vwẹ ishọshi mẹ gun efian nyẹ vwẹ nẹ mẹvwẹ ọgbaudi ro gbe igberadja rhurhu aye mẹ. Ivun de miovwo uvwe mamọ, ofu de ji dje vwe. O rhe kri-i, mẹ vẹ aye mẹ Patricia de vrẹn nẹ ishọshi na.

OBORẸ BAIBOL NA WENE UVWE WAN

Iseri ri Jihova kọn bru avwanre cha kọke kọke jovwo, ẹkẹvuọvo avwanre davwerhọ raye-en. Avwanre vwo vrẹn nẹ ishọshi na nu, aye mẹ da rhọnvwe kẹ aye gbe ọshare ọvo re dia Iseri ri Jihova re se Thomas vẹ Liccy nẹ ayen vwẹ Baibol vwo yono ọyen. Oma vwerhen ovwẹ mamọ nẹ ayen riẹn ephẹrẹ rẹ idin dede nẹ ayen dia idi-in. O kriri-i, me da vwomaba ayen.

Ayen vwẹ ividio rẹ Ephẹrẹ rẹ Idin rẹ America (ASL) vwo yono avwanre vwẹ emeranvwe evo. Jẹ, ọke rẹ igbeyan rẹ avwanre evo vwọ tanẹ Iseri ri Jihova idibo rẹ ihworakpọ, avwanre da dobọ rẹ uyono na ji. Dede nẹ Thomas nabọ dje fiotọ kẹ vwẹ nẹ Iseri ri Jihova vwo isun vwẹ akpọ na-a, mi se eta rọyen na gbuyota-a.

Emeranvwe evo vwọ wan nu, aye mẹ vwọ hẹ ẹdia rẹ omaemuophiyọ ọgangan, ọ da nẹrhovwo rhe Ọghẹnẹ nẹ, o ji Iseri ri Jihova bru ọyen rhe. O rhe kri-i, oniọvo aye ọvo de bru Patricia ra, ọ da vuẹ nẹ ọ cha vuẹ Liccy nẹ o bro rhe. Liccy ghene djephia nẹ ọyen uvi rẹ ugbeyan. Kudughwrẹn kudughwrẹn yen ọ vwọ kọn brẹ Patricia ra, rere ọ sa vwọ bọn gan je reyọ Baibol na vwo yono. Dede na, me je vwẹroso aye-en.

Vwẹ ukpe rẹ 2012, Iseri ri Jihova de vwobọ vwẹ egbadaẹdjẹ, rẹ ayen vwọ kẹ ihwo ividio rẹ LESHO re se Would You Like to Know the Truth? Liccy vwẹ ividio na vwọ kẹ avwanre. Mi vwo no, o gbe vwẹ unu mamọ nẹ erọnvwọn buebun mi yono ihwo kerẹ erhi ro ghwẹ-ẹ vẹ ẹtẹrhe erhanre hẹ evunrẹ Baibol na-a.

Udughwrẹn rọ vwọ kpahọn, mi de kpo Ọguan Ruviẹ rẹ Iseri ri Jihova ra mrẹ Thomas. Me da vuẹ nẹ mẹ guọnọ yono idin na uyota rọhẹ Baibol na, ẹkẹvuọvo me guọnọ dia Oseri ri Jihova-a. Oborẹ me guọnọ ruẹ, ọyen me vwọ reyọ Ishọshi romobọ mẹ vwọ mu. Thomas da nabọ kpẹvwẹ ovwẹ vwọ kẹ oruru ro rhe vwe, o de dje obo rọhẹ Ẹfesọs 4:5 kẹ vwẹ, ro dje obo rọ ghanre te re vwo kuomakugbe ukoko rẹ inenikristi uyota.

Thomas je kẹ vwẹ ividio re se Jehovah’s Witnesses—Faith in Action, Part 1: Out of Darkness vwẹ ejajẹ rẹ ASL. Ividio na dje oborẹ ẹko eshare evo nabọ fuẹrẹn Baibol na rere ayen se vwo vwẹ ẹruọ rẹ uyota ri Baibol na. Mi vwo ni ividio na, ki mi mrẹ oma mẹ vwẹ ẹdia rẹ eshare yena. Kerẹ eshare nana, me je guọnọ riẹn uyota na. Ividio yena nẹrhẹ mi vwo imuẹro nẹ Iseri na yono uyota na, kidie ayen mu uyono rayen eje vwọ kpahen obo ri Baibol na tare. Ọtiọyena me da rhoma ton uyono ri Baibol mẹ phiyọ, vwẹ ukpe rẹ 2014, mẹvwẹ vẹ Patricia de bromaphiyame kerẹ Iseri ri Jihova.

ERERE RE ME MRẸRE

Ukoko rẹ Iseri ri Jihova je vwe mamọ kidie ayen pha fuanfon kirobo rẹ Ọghẹnẹ pha fuanfon. Ayen pha fuanfon vwẹ ota vẹ obo rẹ ayen nene ihwo efa yerẹn wan. Ayen ihwo ufuoma ji phiuduphiyọ ohwohwo awọ. Otoro ẹkuotọ rẹ ayen nurhe yẹrẹ ejajẹ rẹ ayen jẹ-ẹ ayen ruẹ kuẹgbe ji yono uyota vuọvo rọhẹ Baibol na.

Me riavwerhen rẹ obo ri mi yono vwẹ Baibol na. Kerẹ udje, mi yonori nẹ Jihova yen Ọghẹnẹ rọ ma rho kparobọ, ọyen jẹ osun ro me vwo ẹgba vwẹ otọrakpọ na. O vwo ẹguọnọ rẹ idin vẹ ihwo re dia idi-in. Ẹguọnọ ri Jihova pha ghanghanre kẹ vwẹ. Mi ji yono nẹ otọrakpọ na cha dia paradaisi, avwanre ji che vwo uphẹn ra vwọ dia bẹdẹ ji vwọ oma kpokpọ vwe obaro na. Mi rhẹro rẹ ọke ive nana che vwo rugba!

Oma vwerhen ovwẹ vẹ Patricia mamọ siẹrẹ avwanre da vwẹ Baibol na vwo yono idin. Enẹna, avwanre vwẹ Baibol vwo yono evo usun rẹ ihwo ri kpo ishọshi avwanre vwori jovwo. Asaọkiephana, me rha nọ enọ kpahen obo ri mi vwo yono ihwo efa kirobo mi ruẹ ọke me vwọ dia olori ẹga-a. Ukuko na, me da rhe mrẹ ẹkpahọnphiyọ vwọ kẹ enọ mẹ eje, kidie Iseri ri Jihova vwẹ Baibol na vwo yono uvwe.