Pho kpẹ obo revun rọyen

BAIBOL NA WENE OHWO

“Oma Rha Vo Vwẹ Ọfa-a”

“Oma Rha Vo Vwẹ Ọfa-a”
  • Ukpe re Vwiẹrẹ: 1963

  • Ẹkuotọ ro Nurhe: Mexico

  • Akpọ Ro Yerin Jovwo: Ọmọ ro vwo asan rọ dia-a; o nẹ oma rọyen kueku

AKPỌ MI YERIN JOVWO

Orere ri Ciudad Obregón rọhẹ obọrhen ọnre na vwẹ Mexico yen e de vwiẹ vwẹ; mẹvwẹ yen ọ riyorin usun rẹ emọ irhirin. Ughere rẹ orere na yen avwanre diare. Ọsẹ mẹ vwo umudju ọvo vwẹ etiyin. Asan na je avwanre mamọ, orua avwanre je nabọ yerin kugbe vẹ aghọghọ. Ẹkẹvuọvo, ọ da ohwo mamọ nẹ ọke me vwọ hẹ ẹgbukpe iyorin, ogiribo ọgangan ọvo da guọghọ ekankọn rehẹ udju na, avwanre da kua kpo orere ọfa.

Obọ de yovwon ọsẹ mẹ vwẹ oboyin. Vwọba, ko rhi hirhephiyọ ọgbaudi. Ọnana da so ọyanghan vwẹ uvwre rọyen vẹ oni mẹ kugbe avwanre emọ na. Mẹ vẹ iniọvo mẹ ivẹ re dia emeshare ri vien vwe ke bẹbẹ cho isigati rẹ ọsẹ mẹ, avwanre mi phopho ayen. Ẹgbukpe esan yen me hepha ọke mi vwo tu da udi vroma. O rhe kri-i, ọsẹ vẹ oni mẹ da fan orọnvwe rayen, ke me ghwa nabọ muomaphiyọ orharhe akpọ ri mi yerẹn na.

Oni mẹ mu avwanre nene oma ọke rọ vwọ kua bru ọshare ọfa ra. Ọshare na kẹ oni mẹ igho-o, jẹ igho rẹ oni mẹ mrẹ, te vwọ ghẹrẹ avwanre-e. Mẹ vẹ iniọvo mẹ ki ru kiruo kiruo rẹ avwanre mrẹre, dedena obọ te vwọ chovwiẹ ugbuko-o. Me pọlishi rẹ isabato, je shẹ iniuzpepa, ibrẹdi, ishigọmu, kugbe erọnvwọn efa. Me je yan osoghoro vwẹ orere na, re me vwọ guọnọ obo me cha re vwẹ asan rẹ edafe ghwẹ erhurhu phiyọ.

Ọke me vwọ hẹ ẹgbukpe ihwe, ọshare ọvo da tanẹ mi rhi nene ọyen wian vwẹ asan rẹ ihwo rẹ orere na ghwẹ erhurhu phiyọ. Ke me rhọnvwe kẹ, mi de ji isikuru vwo, je kua nẹ uwevwin. Imigho tutuno yen ọshare na hwa kẹ vwẹ, ọ je vwẹ emu rọ mrẹ vwẹ erhurhu na vwọ ghẹrẹ ovwẹ. Umutughẹ ọvo re me vwẹ erọnvwọn me mrẹ vwẹ erhurhu vwọ bọn yen me dia. Ihwo re riariẹ ovwẹ phiyọ ta ogbegbeta, ayen jẹ evwọfanrhiẹn. Buebun rayen egbaudi, ayen je reyọ ihuvwun egangan. Vwọrẹ uyota, ọyena yen ọke rọ ma bra kparobọ vwẹ akpeyeren mẹ, kason kason yen me vwọ viẹ je phariẹ vẹ oshọ. Kidie nẹ mẹvwẹ ovwiogbere, mi ji kpo isikuru sheri-i, oma kọ vo vwẹ mamọ. Omarẹ ẹgbukpe erha yen me dia erhurhu na, tavwen me ke kua kpo ubrotọ ọfa vwẹ Mexico. Mi ruiruo rẹ aghwa vwẹ ubrotọ me kua ra na; me kọnrọ idodo vẹ oruru, koko uhwerhe, ji vun kpekpeduke.

Ẹgbukpe erha yen me dia erhurhu rọ họhọ ọnana

Ẹgbukpe ẹne vwọ wan nu, me da kua rhivwin kpo Ciudad Obregón. Oniọvo ọsẹ mẹ ọvo ro hworo ẹbo da kẹ vwẹ uvun ọvo vwẹ uwevwin rọyen nẹ me dia. Erharhe evwerhẹn kọyen me vwerhẹn, ẹwẹn mẹ da hra totọ te ẹdia ri mi vwo vwo iroro mi vwo hwe oma mẹ. Ason rẹ ẹdẹ ọvo, me da nẹrhovwo rhe Ọghẹnẹ: “Ọrovwori, wọ da ghene herọ, me guọnọ riẹn wẹ, me je guọnọ ga wẹ bẹdẹ. Ẹga rẹ uyota da herọ, me guọnọ riẹn.”

OBORẸ BAIBOL NA WENE UVWE WAN

Notọ votọ rhe yen mi vwo vwo ọdavwẹ rẹ Ota rẹ Ọghẹnẹ. Mi kpo ishọshi buebun ọke me vwọ hẹ omotete, ẹkẹvuọvo ofu rẹ ayen eje dje vwe. O vwo ọvuọvo usun rayen rọ sa ta ota kodo kpahen Baibol na yẹrẹ yono uvwe kpahen Ọghẹnẹ-ẹ. Igho yen evo usun rayen ta ota kpahan ọkieje, efa ke rha vọn vẹ evwọfanrhiẹn.

Ọke me vwọ hẹ ẹgbukpe 19, ọshare rẹ oniọvo mẹ ọvo da vuẹ vwẹ nẹ Iseri ri Jihova dje oborẹ Baibol na ta kpahen uruemu ra vwọ vwẹ ema vwọba ga ẹga kẹ ọyen. O de se Eyanno 20:4, 5 kẹ vwẹ, rọ tare nẹ a kare oma vuọvo-o. Owọ 5 de se: “Wo shiguẹ kẹ aye-en yẹrẹ wọ ga aye-en; kidie mẹvwẹ Ọrovwohwo Ọghẹnẹ wẹn mẹvwẹ Ọghẹnẹ rọ rioma.” Ọshare oniọvo mẹ na da nọ vwẹ, “ọ da dianẹ Ọghẹnẹ reyọ ema vwo ru igbevwunu yẹrẹ ọ guọnọre nẹ a reyọ ayen vwọba ga ọyen, kẹ diesorọ ọ vwọ gha ayen?” Onọ yena da nẹrhẹ mi brevun kpo iroro. Ọke vwọ yanran na, avwanre da ta ota kpahen erọnvwọn sansan vwẹ Baibol na. Otaẹtakuẹgbe rẹ avwanre na vwerhen ovwẹ te asan rẹ, me riẹn sẹ ọke she-e.

O vwo te ọke ọvo, ọ da reyọ ovwẹ kpo omẹvwa rẹ Iseri ri Jihova. Obo me mrẹre vẹ oborẹ mi nyori vwẹ omẹvwa na te vwe ẹwẹn mamọ. Imighene dede vwobọ vwẹ omẹvwa na, unu rayen nabọ muota ọke rẹ ayen de kpo enu rẹ umukpe! Me da ta kẹ oma mẹ, ‘Ọnana uvi rẹ uyono yen e yono ihwo vwẹ etinẹ na!’ Iseri na dede uvwe sasasa dede nẹ ẹton mẹ pha grongron, me je pha gbegbe. Orua ọvo tobọ durhie uvwe nẹ me rhe nene ayen riemu rẹ ovwọnvwọn!

Uyono ri Baibol rẹ Iseri na vwo mu kẹ vwẹ chọn vwẹ uko vwọ mrẹvughe nẹ Jihova Ọghẹnẹ ọyen Ọsẹ rẹ ẹguọnọ rọ davwerhọ rẹ avwanre, o toro ohọroma rẹ avwanre-e; o vwori nẹ avwanre edafe, ihwo rehẹ ẹdia ride, yẹrẹ ihwo ri kpo isikuru sheri-i. Ọghẹnẹ ghene ghwẹ oma phiyọ ẹbẹrẹ ọvo jẹ ọvo vwo-o. (Iruo Rẹ Iyinkọn Na 10:34, 35) Asaọkiephana, oma vwerhen ovwẹ mamọ nẹ me rhe riẹn Ọghẹnẹ re. Ofudjevwe vẹ omaemuophiyọ mẹ ri jovwo na rha herọ-ọ.

ERERE RE ME MRẸRE

Enẹna akpeyeren mẹ weneri mamọ re! Mi rhe phopho isigati, da udi vroma, yẹrẹ ta ogbeta-a. Ivun emiovwon ro rhe vwe nẹ ọkiemọ rhe ko nu vwe oma ememerha, eriyin ji te erharhe rẹ evwerhẹn mẹ na. Ọke ri jovwo mi nẹ oma mẹ kueku kidie nẹ mi hirharoku ebẹnbẹn sansan vwẹ ọkiemọ, mi ji kpo isikuru sheri-i. Jẹ enẹna mi rhe nẹ oma kueku ọfa-a.

Mi vwo uvi rẹ aye ro vwo ẹguọnọ ri Jihova, rọ je chọn vwẹ uko mamọ. Asaọkiephana, me ga kerẹ oniruo okinriariẹ, mi kiẹn ikoko sansan, bọn iniọvo na gan ji yono ayen. Me kpẹvwẹ Ọghẹnẹ rọ vwọ vwẹ Baibol na vwo wene akpeyeren mẹ, je kẹ avwanre uvi rẹ uyono, enẹna oma rha vo vwẹ ọfa-a.

Oma vwerhen ovwẹ vẹ aye mẹ rẹ avwanre vwọ vwẹ ukẹcha kẹ ihwo efa kirobo re ji ru kẹ vwẹ