Pho kpẹ obo revun rọyen

Pho kpẹ mẹnu rivẹ

Iseri ri Jihova

Urhobo

Diesorọ Iseri rẹ Jihova re orẹ rẹ Ikrismasi-i?

Diesorọ Iseri rẹ Jihova re orẹ rẹ Ikrismasi-i?

Ororo chọ rẹ ihwo

Efian: Iseri rẹ Jihova vwo esegbuyota kpahen Jesu-u, ọyensorọ ayen re orẹ rẹ Ikrismasi-i.

Uyota: Avwanre Inenikristi. Avwanre vwo esegbuyota nẹ womarẹ Jesu Kristi ọvo yen e se vwo vwo usivwin.—Iruo rẹ Iyinkọn Na 4:12.

Efian: Ovwan phiẹ ohra phiyọ erua siẹrẹ ovwan da vuẹ ayen nẹ ayen re orẹ rẹ Ikrismasi-i.

Uyota: Avwanre vwo ọdavwẹ rẹ erua, avwanre je vwẹ Baibol na vwọ bọn erua gan.

Efian: Ovwan riavwerhen rẹ “ẹwẹn rẹ Ikrismasi-i,” rọ dia a vwọ kẹ okẹ, ufuoma vwẹ akpọ, kugbe oyouvwe vwọ kẹ ihwo.

Uyota: Avwanre davwẹngba vwo ruẹse, je dia ihwo rẹ ufuoma kẹdẹ kẹdẹ. (Isẹ 11:25; Rom 2:18) Kerẹ udje, Avwanre ruẹ iyono vẹ aghwoghwo rẹ avwanre nene odjekẹ rẹ Jesu: “Ọphẹ ovwan mrẹrẹ, ọphẹ ovwan je vwọ kẹ rhe.” (Matiu 10:8) Vwọba, avwanre vuẹ ihwo kpahen Uvie rẹ Ọghẹnẹ kerẹ iphiẹrophiyọ vuọvo rẹ ihworakpọ vwori.—Matiu 10:7.

Diesorọ Iseri rẹ Jihova re orẹ rẹ Ikrismasi-i?

  • Jesu tare nẹ a karophiyọ ughwu rọyen, ọ dia ẹdevwiẹ rọye-en.—Luk 22:19, 20.

  • Iyinkọn rẹ Jesu vẹ Inenikristi rẹsosuọ re orẹ rẹ Ikrismasi-i. New Catholic Encyclopedia tare nẹ “ukpe rẹ 243 [C.E.] teri tavwen a ke ton orẹ na phiyọ,” kọyen ọ vrẹ ẹgbukpe ujorin rẹ ọyinkọn rọkoba vwo ghwu nu.

  • O vwo emu vuọvo ro djerephia nẹ December 25 yen vwiẹ Jesu-u; e si ọke re vwo vwiẹ phiyọ Baibol na-a.

  • Avwanre vwo esegbuyota nẹ Ọghẹnẹ rhọvwen phiyọ Ikrismasi-i, kidie ọyen orẹ rẹ egedjọ.—2 Kọrẹnt 6:17.

Diesorọ ovwan vwọ guọnọ nẹ ihwo vwẹ ẹro phovwin vwo ni ovwan kidie nẹ ovwan ruẹ Ikrismasi-i?

Ihwo beubun ji ruẹ Ikrismasi, dede nẹ ayen riẹnre nẹ ọyen orẹ rẹ egedjọ, nẹ Baibol na rhọvwen phiyọ-ọ. Ihwo tiọyena ke nọ: Diesorọ Inenikristi vwọ ta nẹ ayen che ruo-o? Diesorọ ovwan vwọ guọnọ nẹ ihwo vwẹ ẹro phovwin vwo ni ovwan kidie nẹ ovwan ruẹ Ikrismasi-i?

Baibol jiriro kẹ avwanre nẹ a “davwe emu kemu ejobi ni.” (1 Tẹsalonaika 5:21) O yonori nẹ a vwẹ ẹro ọghanghanre vwo ni uyota na. (Jọn 4:23, 24) Ọtiọyena, dede nẹ avwanre davwerhọ rẹ ẹro rẹ ihwo efa vwo nẹ avwanre, avwanre yọnrọn irhi rẹ Baibol na, ọ da tobọ dianẹ ọ cha nẹrhẹ ihwo vwẹ ẹro phovwin vwo ni avwanre.

Dede nẹ avwanre re orẹ rẹ Ikrismasi-i, avwanre ji muọghọ kẹ ihwo ri brorhiẹn ayen vwo ruo, kidie ayen vwo uturhi ayen vwo ru obo ri je ayen. Avwanre vwobọ vwẹ orẹ rẹ Ikrismasi rẹ ihwo efa ruẹ-ẹ.