Pho kpẹ obo revun rọyen

Pho kpẹ mẹnu rivẹ

Iseri ri Jihova

Urhobo

Mavọ Me Sa Vwọ Dia Oseri rẹ Jihova?

Mavọ Me Sa Vwọ Dia Oseri rẹ Jihova?

Jesu dje owọẹjẹ sansan vwẹ Matiu 28:19, 20 re sa nẹrhẹ ohwo dia Oseri rẹ Jihova. Ẹkpo rẹ Baibol yena djunute oborẹ ohwo se ru ọ sa vwọ dia odibọ rẹ Jesu, o churobọ si ra vwọ ta ota kpahen JIhova.

Owọẹjẹ 1: Riẹn oborẹ Baibol na yonori. Jesu yono idibọ rọyen nẹ ayen gbe odibọ ji “yono ihwo.” (Matiu 28:19, 20) Ubiota ra fan kpo “odibọ” mudiaphiyọ “ohwo ro yono.” Baibol na vọnre vẹ evuẹ wọ guọnọre rere wo se vwọ yerin uvi rẹ akpeyeren rẹ omavwerhovwẹn, ma rho kẹ iyono rẹ Jesu Kristi rehẹ evun rọyen. (2 Timoti 3:​16, 17) Avwanre guọnọ chọn wẹ uko vwo yono Baibol na womarẹ ọrhuẹrẹphiyotọ rẹ uyono rẹ Baibol rẹ ọphẹ.​—Matiu 10:​7, 8; 1 Tẹsalonaika 2:​13.

Owọẹjẹ 2: Reyọ obo wo yonori vwo ruiruo. Jesu tare nẹ ihwo re yono na “riẹn otọ rẹ imu na ejobi [ro] dje kẹ [ayen] na.” (Matthew 28:20) Ọnana mudiaphiyọ nẹ uyono rẹ Baibol wẹn cha vrẹ wọ de vwọ riẹn oborẹ Baibol na tare, ofori nẹ o mu we vwọ ru ewene kiriguo vwẹ iroro vẹ uruemu wẹn. (Iruo Rẹ Iyinkọn Na 10:42; Ẹfesọs 4:​22-​29; Hibru 10:24, 25) Ihwo ri reyọ uji rẹ Jesu vwo ruiruo, ki vwo owenvwe rẹ ayen vwọ vwomakpahotọ kẹ Jihova Ọghẹnẹ, ji nene.​—Matiu 16:24.

Owọẹjẹ 3: Bromaphiyame. (Matiu 28:19) Vwevunrẹ Baibol na, a reyọ omaebrophiyame vwọ dje ughwu. (Ni Rom 6:​2-4.) Kọ ghwa họhọ ohwo ro ghwu kẹ akpeyeren rẹ awanre rọyen, ọ da tọn ọkpokpọ phiyọ. Omaebrophiyame wẹn, ọyen odjephia nẹ wọ jowọ rẹsosuọ vẹ ọrivẹ ri Jesu djunute na re, ku wọ vuẹ Jihova nẹ ọ kẹ vwẹ ẹwẹn obrorhiẹn rọ fonro.​—Hibru 9:​14; 1 Pita 3:​21.

Mavọ me cha vwọ riẹn nẹ mi muegbe rẹ omaebrophiyame re?

Vuẹ ekpako rẹ ukoko na. Ayen che nene uvwe ta ota rere ayen sa vwọ riẹn se wo vwo ẹruọ rẹ obo ro mudiaphiyọ, wọ reyọ obo wo yono na vwo ruiruo, kugbe wọ je vwomakpahotọ kẹ Jihova re.​—Iruo Rẹ Iyinkọn Na 20:28; 1 Pita 5:​1-3.

Emọ rẹ ihwo rẹ Iseri rẹ Jihova je jowọ nana eje?

E. Avwanre yono emọ rẹ avwanre nene “ẹghwọ kuo kugbe uyono rẹ Ọrovwohwo,” kirobo rẹ Baibol na tare. (Ẹfesọs 6:4) Jẹ ayen vwọ ghwanra na, ayen ọvo yen che brorhiẹn rẹ ayen vwo yono, rhiabọreyọ, je vwẹ oborẹ ayen yono vwẹ Baibol na vwo ruiruo tavwen ayen ki muwan rẹ omaebrophiyame. (Rom 12:2) Kọyen, ohwo vuọvo yen che brorhiẹn rẹ ẹga rọyen.​—Rom 14:12; Galesha 6:5.