Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Ọbe Uyono rẹ Akpeyeren Avwanre vẹ Iruo Ruvie Na  |  November 2016

 AKPEYEREN RẸ INENIKRISTI

Die Yen Baibol na se Yono Avwanre?—Obo ra Reyọ Vwo Ruiruo Wan

Die Yen Baibol na se Yono Avwanre?—Obo ra Reyọ Vwo Ruiruo Wan

Ọbe rẹ Yono Avwanre kugbe Bible Teach na họhọ ọma. Ẹbe ivẹ nana rehẹ ekpeti rẹ iruo rẹ avwanre, reyọ uyota na vwọ phia vwẹ idjerhe ọvuọvo. Ẹkẹvuọvo, eta re pha lọlọhọ yen evwo si ọbe rẹ Yono Avwanre na. E ruro vwọ kẹ ihwo ri vwo ebẹnbẹn rẹ ayen vwo vwo ẹruọ rẹ ọbe rẹ Bible Teach na. Ukperẹ apẹndisi, ọbe rẹ Yono Avwanre na vwo eta rẹ odjefiotọ ri dje ẹkpo evo lọlọhọ. Iyovwinreta na vwo enọ rẹ ọtonphiyọ yẹrẹ ekpeti rẹ ọdjẹkoko-o. Ukperẹ ọtiọyen, vwẹ oba rẹ uyovwinrota ọvuọvo, o vwo ọdjẹkoko rẹ uyota rẹ Baibol re dje fiotọ. Kerẹ ọbe rẹ Bible Teach na, e se phi ọbe rẹ Yono Avwanre na phiyọ ada ọke ro je avwanre, ọ da tobọ dianẹ ọ dia ọyen yen e phiẹ phiyọ ada vwẹ emeranvwe yena-a. Mavọ yen avwanre sa vwọ vwẹ ẹkpo kpokpọ rehẹ ọbe rẹ Yono Avwanre na vwo ruiruo ọke re de yono ohwo Baibol na?

ỌDJẸKOKO: Vwọ kẹ ihwo buebun, ona re vwo yono ihwo womarẹ e vwo se ẹkoreta na tavwen a ke nọ enọ na vwẹ ọbe rẹ Bible Teach na ji shephiyọ. Kẹ ọ da rha dianẹ ohwo re yono na ghwa riẹn ejajẹ na-a, yẹrẹ ọ ghwa riẹn obo re se-e. Vwẹ ẹdia yena, wọ sa reyọ ọbe rẹ Yono Avwanre na vwo ruiruo. Wọ sa reyọ ọdjẹkoko re uyovwinrota yena vwo yono, rere o se uyovwinrota na komobọ rọyen. A sa reyọ ibrẹro 15 vwo yono uyota rẹ Baibol ọvuọvo. Rọ vwọ dianẹ ọ dia ẹkpo eje rehẹ uyovwinrota na yehẹ ọdjẹkoko na-a, ko fori nẹ oyono na nabọ muegbe, o ji roro kpahen ọdavwẹ rẹ ohwo ro che yono na. Ọ da dianẹ uyovwinrota na yen oyono na vwo ru uyono na, ọ sa reyọ ọdjẹkoko na vwọ rhoma fuẹrẹn uyono na.

ETA RẸ ODJEFIOTỌ: A rhuẹrẹ eta rẹ odjefiotọ na vwo nene oborẹ ayen vwomaphia kpahen ohwohwo vwevunrẹ uyovwinrota na. Oyono na se brorhiẹn sẹ ọke re vwo ru uyono na yen ọ cha vwọ ta ota kpahen eta rẹ odjefiotọ rọhẹ ọbe rẹ Yono Avwanre na.