Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 AKPEYEREN RẸ INENIKRISTI

“Pọl Da Kpẹvwẹ Ọghẹnẹ Udu Rọye Da Ga”

“Pọl Da Kpẹvwẹ Ọghẹnẹ Udu Rọye Da Ga”

Ọke rẹ ukoko rohẹ Rom vwo nyo nẹ Pọl cha, ayen de ji ẹko iniọvo evo re yan oyan ro te omarẹ imaili 40 bro te idjerhe. Mavọ yen ẹguọnọ rẹ omaevwoze rayen na djobọte Pọl wan? “Rọ vwọ mrẹ ayen Pọl da kpẹvwẹ Ọghẹnẹ udu rọye da ga.” (Iruo 28:15) Dede nẹ a riẹn Pọl phiyọ ohwo rọ bọn ikoko na gan siẹrẹ o de kin ayen, jẹ vwẹ ẹdia nana, ọyen yen a bọn gan, kidie e mu ro.—2 Kọr. 13:10.

Nonẹna, iniruo okinriariẹ nẹ ukoko ọvo kpo ọfa rẹ ayen vwọ bọn iniọvo na gan. Kirobo rẹ ihwo rẹ Ọghẹnẹ ejobi rhiẹromrẹ, oma je sa bẹn iniruo okinriariẹ vwẹ ọke evo, ayen je sa ro ẹnwan, ofu ji se dje ayen. Ọke ọfa rẹ oniruo okinriariẹ vẹ aye rọyen de kin ukoko wẹn, die yen wo se ru vwo phiuduphiyọ ayen awọ, rere ovwan se vwo “ru esegbuyota rẹ ohwohwo gan”?—Rom 1:11, 12.

  • Bicha ọrhuẹrẹphiyotọ rẹ emẹvwa rẹ aghwoghwo. Oma vwerhan iniruo okinriariẹ siẹrẹ ighwoghwota de ru ọrhuẹrẹphiyotọ rẹ ayen vwo vwobọ vwẹ udughwrẹn rẹ oghẹresan na vọnvọn. (1 Tẹsa. 1:2, 3; 2:20) Wọ sa reyọ ọkobaro rẹ ubrọke vwẹ emeranvwe ro che kin na. Wẹ vẹ ọyen kugbe aye rọyen sa wian kugbe vwẹ aghwoghwo na yẹrẹ tobọ tanẹ ayen nene uwe kpo asan rẹ ohwo rẹ wọ vwẹ Baibol yono? Ayen guọnọ nene ighwoghwota sansan wian kugbe, tobọ te ighwoghwota kpokpọ yẹrẹ e re ghwa tẹn ona rẹ aghwoghwo na-a.

  • Dje uruemu ra vwọ ghọ ọrhorha phia. Wọ sa rhọvwen nẹ ayen dia uwevwin wẹn yẹrẹ rhe riemu vwẹ uwevwin wẹn? Ọnana nẹrhẹ oniruo okinriariẹ na vẹ ayen rọyen riẹn nẹ wo vwo ẹguọnọ rayen. Ayen ghwa guọnọ emu buebu-un.—Luk 10:38-42.

  • Nene odjekẹ vẹ uchebro rọyen. Oniruo okinriariẹ chọn avwanre uko vwọ riẹn asan ro de fo nẹ avwanre ru yovwinphiyọ vwẹ ẹga rẹ Jihova. Ọke evo, ọ sa vwẹ uchebro ọgangan kẹ avwanre. (1 Kọr. 5:1-5) Oma vwerhọn siẹrẹ avwanre da vwomakpotọ nene odjekẹ.—Hib. 13:17.

  • Dje ọdavwaro. Vuẹ oniruo rẹ okinriariẹ na vẹ aye rọyen oborẹ ẹgbaẹdavwọn rayen fierere kẹ wẹ. Wọ sa vwẹ unu vuẹ ayen yẹrẹ si ọbe yẹrẹ vwẹ ikadi rhe ayen.—Kọl. 3:15.