Vwo nẹ September yanran, Ọbe Uyono rẹ Akpeyeren vẹ Iruo Uvie Na che vwo ona re se vwo phi ayen phiyọ ada ọkpokpọ ro vwo uyovwinrota na: “Yono Uyota Na.” Ọdavwẹ rẹ avwanre ọyen a vwọ reyọ onọ vẹ ẹkpahọnphiyọ vwọ kanrunumu uyota rẹ Baibol ọvo kiriguo.

Avwanre de noso nẹ ohwo na dje omavwerhowẹn phia, avwanre sa vwẹ ẹbe avwanre vwọ kẹ yẹrẹ hworo ividio ọvo kẹ vwẹ jw.org rere a vwọ rhariẹn oruru rọyen hẹrhẹ orhivwinbura. E jẹ avwanre hwe ọke tavwen a ke rhoma rhivwi-in. A cha reyọ ona kpokpọ nana kugbe ẹbẹre ro vwo eta erha: Obọ Rẹsosuọ, Orhivwinbrura vẹ Uyono rẹ Baibol vwo nẹ ọdjẹkoko rẹ iyovwinreta rẹ ọbe na Die Yen Baibol na Se Yono Avwanre? Vwevunrẹ ọbe na, avwanre cha mrẹ enọ vẹ ẹkpo rẹ Baibol efa re sa vwẹ ukẹcha kẹ avwanre vwọ vwẹ Baibol na ọvo vwo ru orhivwinbrura yẹrẹ uyono rẹ Baibol.

Idjerhe vuọvo yen herọ ro sun ohwo kpo arhọ. (Mat. 7:13, 14) Rọ vwọ dianẹ avwanre ta ota kẹ ihwo ri kpo ẹga sansan, ri ji nẹ asan sansan rhe na, ko fori nẹ a vwẹ uyota rẹ Baibol na phia vwẹ idjerhe ro de te ubuidu rẹ ohwo ọvuọvo. (1 Tim. 2:4) Rẹ avwanre vwọ nabọ riẹn iyovwinreta rẹ Baibol sansan, ji ruẹ yovwẹnphiyọ vwẹ ona ra vwọ “nabọ yọnre ota rẹ uyota na,” aghọghọ rẹ avwanre che bunphiyọ, avwanre ji che phikparobọ vwẹ eyono rẹ ihwo uyota na.—2 Tim. 2:15.