Amono yen e che dede sasasa na? Kohwo kohwo rọ rhe omẹvwa rẹ avwanre, te ihwo kpokpọ vẹ igbeyan ra mrẹ krire. (Rom 15:7; Hib. 13:2) Ọ sa dia oniọvo ro nẹ ẹkuotọ ọfa rhe yẹrẹ oniọvo rọ dobọ rẹ ẹga ji ọke grongron re rọ rhoma ton uyono ẹra phiyọ. Vwẹro roro obo rọ cha dia ọ da dianẹ wẹ yehẹ ẹdia yena. Uyeren re sasasa tiọyena cha vwerhen owẹ oma? (Mat. 7:12) Davwẹngba wo vwo kpo asan rẹ ihwo hepha vwẹ Ọguan Ruvie na re yeren ayen tavwen uyono ke tonphiyọ vẹ ọke ro de kuphiyọ nu. Ọnana toroba oyerinkugbe rẹ ẹguọnọ rọhẹ uvwre rẹ avwanre, ọ je ghwa urinrin bru Jihova ra. (Mat. 5:16) Vwọrẹ uyota, ọ dia ihwo eje re rhere yen avwanre se yerin ọke evo-o. Ẹkẹvuọvo, oma cha vwerhen ihwo eje siẹrẹ avwanre de ru ẹkẹn ro te avwanre. *

Ọ dia ọke rẹ Ẹkarophiyọ na ọvo yen e vwo dede ihwo-o, ẹkẹvuọvo, e se ru ọtiọyen kọke kọke. Siẹrẹ ihwo kpokpọ da mrẹ ẹguọnọ tiọyena re dje kẹ ayen, ọnana se mu ayen vwo jiri Ọghẹnẹ, ji kuomakugbe avwanre vwẹ ẹga rẹ uyota. ​—Jọn 13:35.

^ e?ko. 3 Iji rẹ Baibol nẹrhẹ avwanre kẹnoma kẹ ihwo ra djẹ nẹ ukoko yẹrẹ ihwo rẹ ayen ọvo sioma reyọ re rhere.​—1 Kọr. 5:11; 2 Jọn 10.